Гайсә пәйгамбәр безне коткара. Ничек итеп?
Изге Язмалар нигезендә җавап
Гайсә пәйгамбәр үз тормышын корбанга китереп, кешеләрне коткарган (Маттай 20:28). Шуңа күрә Изге Язмаларда ул «дөньяны коткаручы» дип аталган (1 Яхъя 4:14). Инҗилдә аның турында шулай ук болай диелгән: «Безне аңардан башка беркем дә коткара алмый, чөнки җир йөзендә кешеләргә бирелгән исемнәр арасында безне коткара алырдай башка исем юк» (Рәсүлләр 4:12).
Гайсә Мәсих аңа иман итүче «һәркем өчен үлемне татыган» (Еврейләргә 2:9; Яхъя 3:16). Әмма «Аллаһы аны терелткән». Шуннан бирле Гайсә рухи зат буларак күктә яшәвен дәвам итә (Рәсүлләр 3:15). Ул «үзе аркылы Аллаһыга якынлашучыларны, чыннан да коткара ала, чөнки ул алар хакына Аллаһыга ялварып торыр өчен мәңге яши» (Еврейләргә 7:25).
Ни өчен без Гайсәнең безнең хакка Аллаһыга ялварып торуына мохтаҗ?
Без барыбыз да гөнаһлы (Римлыларга 3:23). Гөнаһ безнең һәм Аллаһы арасына чөй кага, һәм гөнаһ үлемгә китерә (Римлыларга 6:23). Әмма Гайсә үзенең йолым корбанына иман итүчеләрнең яклаучысы булып тора (1 Яхъя 2:1, искәрмә). Ул Аллаһыга аларның догаларын ишетсен һәм йолым корбаны нигезендә гөнаһларын кичерсен дип ялварып тора (Маттай 1:21; Римлыларга 8:34). Аллаһы Гайсә Мәсихнең үтенечләренә колак сала, чөнки алар аның күңеленә хуш килә. Аллаһы Гайсәне җиргә бер ният белән җибәргән: Ул «дөньяның аның [Гайсә] аша коткарылган булуын» теләгән (Яхъя 3:17).
Коткарылыр өчен, Гайсәгә иман итү генә җитәрлекме?
Юк. Гайсәгә иман итү генә җитми (Рәсүлләр 16:30, 31). Изге Язмаларда: «Тән рухсыз үле, ә иман эшләр белән күрсәтелмәсә үле»,— диелә (Ягъкуб 2:26). Котылыр өчен, безгә:
Гайсә пәйгамбәр һәм аның Атасы Йәһвә турында белем алырга кирәк (Яхъя 17:3).
Икесенә дә иман итәргә кирәк (Яхъя 12:44; 14:1).
Аларның әмерләренә буйсынып яшәргә кирәк (Лүк 6:46; 1 Яхъя 2:17). Гайсә әйткәнчә, аны «Хуҗам» дип атаучылар түгел, ә «күктәге [Атасының] ихтыярын үтәүчеләр» генә котылачак (Маттай 7:21).
Авырлыкларга карамастан иман күрсәтергә кирәк. Гайсә пәйгамбәр: «Ахырга кадәр нык калган кеше котылыр»,— диеп, шуңа басым ясаган (Маттай 24:13).