Ka nikigarramu amaani kukimanya ngu Yahwe naagonza abantu be boona nk’ekitebe! Baibuli egamba ngu: “[Yahwe] nasemere’rwa abantube.” (Zab. 149:4) Baitu obwire obumu, abamu nibasobora kuhwamu amaani nibekaguza bati: ‘Mali Yahwe nangonza nyowe nk’omuntu?’ Abamu h’abaheereza ba Yahwe abesigwa abarukubazibwaho omu Baibuli, haroho obu baayehurraga omu mulingo nk’ogu. (1 Sam. 1:​6-10; Yob. 29:​2, 4; Zab. 51:11) Baibuli eyoleka ngu n’abantu abatahikiriire nibasobora kusiimwa Yahwe. Omu mulingo ki? Tusemeriire kwikiririza omuli Yesu Kristo kandi tubatizibwe. (Yoh. 3:16) Obu tukora eki, tukyoleka omu rwijwire ngu twegarukiremu ebibi byaitu kandi twehaireyo hali Yahwe kukora ebi agonza. (Ebik. 2:38; 3:19) Yahwe asemererwa obu tukora ebintu ebi nukwo tusobole kuba n’enkoragana enungi na uwe. Obu turagumizaamu nitukora eki turukusobora kuhikiiriza eki twamuraganiize, naija kusemererwa kandi atutwale kuba banywani be.—Zab. 25:14. w24.03 26 ¶1-2

Nitusobora kwegera ha kyokurorraho kyʼabakwenda kuraba omu kugumizaamu nitutebeza ab’obusobozi n’obubalengaho kututanga. Nitusobora kukigumya ngu Yahwe naija kutukonyera kuhikiiriza obuheereza bwaitu. Nahabweki saba obumanzi n’amagezi. Saba Yahwe akukonyere kugumira ebizibu. Baingi omuliitwe nitutalibanizibwa oburwaire, okwetuntura, tuferiirwe omuntu waitu, twine ebizibu omu maka, nituhiiganizibwa rundi twine ekizibu ekindi. Emitalibaine endi nk’okucwekaho kw’oburwaire rundi obulemu biretiire obwomeezi kweyongera kugumangana. Gambira Yahwe byona ebikuli ha mutima kandi omusoborre enyikara yaawe nk’okuwakugambiire munywani waawe nfenanfe. Okigumye ngu Yahwe naija kukukonyera (Zab. 37:​3, 5) Kwekamba kusaba nikiija kutukonyera ‘kugumiisiriza omu bujune.’ (Bar. 12:12) Yahwe amanyire abaheereza be ebibarukurabamu kandi ‘ahurra okurra kwabo.’—Zab. 145:​18, 19. w23.05 5-6 ¶12-15

Obu tuba twine encwamu ez’okukora, tusemeriire kumanya “eki [Yahwe] ekyarukugonza” kandi nikyo tukole. (Bef. 5:17) Obu tuserra emisingi ya Baibuli erukukwata ha nyikara yaitu, twoleka ngu nitugonza kumanya Yahwe eki arukugonza tukole. Kandi obu turateeka omu nkora emisingi egi, nitwija kukora encwamu enungi. Omunyanzigwa waitu Sitaani naagonza kutulemesa kuheereza Yahwe. (1 Yoh. 5:19) Naagonza tuteeke omutima ha kuserra ebintu by’ensi nukwo tuburwe obwire obw’okuheereza Ruhanga. Omukristaayo naasobora kuteeka omutima ha kuserra sente, obwegese, rundi naayebembeza omulimo gwe omu kiikaro ky’okwebembeza kuheereza Yahwe. Kakuba eki kibaho, kiba nikyoleka ngu atandikire kutunga entekereza y’ensi. Ky’amananu ngu ebintu binu tibiri bibi, baitu tinibyo tusemeriire kwebembeza omu bwomeezi bwaitu. w24.03 24 ¶16-17