Ebikorwa by’Abakwenda
4 Babiri obu bakaba nibakyabaza n’abantu, banyakatagara, omukuru w’abalinzi ba yekaru, hamu n’Abasadukaayo baija nambere bali. 2 Bakaba babiihiirwe habwokuba abakwenda bakaba nibeegesa abantu kandi bakaba nibarangirra murwijwire okuhumbuuka kwa Yesu kuruga omu bafu. 3 Nahabweki baabakwata baabatwara omu nkomo, kuhikya ekiro ekirukuhonderaho habwokuba bukaba buli bwire bwa rwebagyo. 4 Baitu baingi hali abo abaahuliire ebi baabalize bakaikiriza, kandi omuhendo gw’abasaija gwahika nka 5,000.
5 Ekiro ekyahondiireho, abalemi baabo, abakuru b’abantu, hamu n’abahandiiki, bakeesorooza hamu omu Yerusaalemu, 6 bali hamu na mukuru wa banyakatagara Anasi, Kayaafa, Yohaana, Alekizanda, n’abanyabuzaale boona aba mukuru wa banyakatagara. 7 Baayemereza Petero na Yohaana hagati yabo, kandi baatandika kubakaguza bati: “Maani ki agabasobozeseze kukora kinu, rundi mukikozere omu ibara ly’oha?” 8 Hanyuma Petero, aijwirwe omwoyo ogurukwera, yabagambira ati:
“Inywe abalemi b’abantu n’abakuru b’abantu, 9 obu muraaba nimutukaguza ha kintu ekirungi, ekikozerwe ha musaija omulema kandi nimugonza kumanya ow’akirize omusaija onu, 10 mukimanye inywe n’abantu ab’omu Isaleeri* boona ngu, omu ibara lya Yesu Kristo Omunyanazaleesi, ou mwaitiire ha muti baitu Ruhanga yamuhumbuura kuruga omu bafu, kuraba omuli uwe, omusaija onu ow’ayemeriire omu maiso ganyu akizire. 11 Linu niryo ‘ibaale abombeki eri baagayire erifookere ibaale erikuru erya ha nsonda.’* 12 Ekindi, busaho kujunwa kuraba omu muntu ondi weena, habwokuba busaho ibara erindi hansi y’iguru eryahairwe abantu nambere tusemeriire kutungira okujunwa.”
13 Obu baarozere Petero na Yohaana nibabaza n’obumanzi,* kandi baakyetegereza ngu bali basaija abateegesiibwe* kandi aba buli kiro, baahunirra muno. Kandi baakyetegereza ngu baikaraga na Yesu. 14 Obu bakaba nibarora omusaija ow’akaba akiziibwe ayemeriire na bo, baaburwa eky’okugarukamu. 15 Nubwo baabaragira kugenda aheeru y’ekyombeko ky’Orukurato Orukuru kandi baatandika kwehanuzaahongana, 16 nibagamba bati: “Abasaija banu tubakorre ki? Habwokuba amananu gali ngu, bakozere ekyamahano ekirukuhuniiriza kandi kyarorwa abaikazi ba Yerusaalemu boona, kandi titusobora kukihakaniza. 17 Nahabweki kurora ekintu kinu tikyayongera kumanywa abantu, leka tubatiinisirize kandi tubagambire batongera kubaza n’omuntu ondi weena ebirukukwata ha ibara linu.”
18 Nubwo baabeeta kandi baabaragira kutongera kubaza ekintu kyona rundi kwegesa omu ibara lya Yesu. 19 Baitu Petero na Yohaana baabagarukamu bati: “Obu kiraaba kihikire omu maiso ga Ruhanga kuhuliiriza inywe, omu kiikaro ky’okuhuliiriza Ruhanga, mwecweremu. 20 Baitu itwe titurukwija kuleka kubazaaho ebintu ebi twarozere kandi twahurra.” 21 Hanyuma y’okwongera kubatiinisiriza, baabalekera, habwokuba bakaba bataine eki barukusigikirraho kubafubira, na habw’okutiina abantu, habwokuba boona bakaba nibakugiza Ruhanga habw’ekikaba kibaireho. 22 Omusaija onu ow’akaba akiziibwe omu mulingo ogw’ekyamahano* akaba aine emyaka erukuhingura omu 40.
23 Hanyuma y’okulekerwa, baagenda hali abantu baabo, baabagambira ebintu bakuru ba banyakatagara,* n’abakuru b’abantu, ebi bakaba babagambiire. 24 Obu baahuliire eki, boona baimukiza hamu amaraka gaabo nibasaba Ruhanga nibagamba bati:
“Mukama, Omulemi wa Byona, Niiwe wakozere iguru, n’ensi, n’enyanja, hamu n’ebintu byona ebirumu, 25 kandi ayagambire naakozesa omwoyo ogurukwera kuraba omu kanwa ka isenkuruitwe Daudi omuheereza waawe, oti: ‘Habwaki amahanga gabiihiirwe kandi n’abantu nibateekereza ebintu ebitarumu? 26 Abakama b’ensi beeteekaniize kandi n’abalemi beesoroize hamu kurwanisa Yahwe* hamu n’ogu ou yaseesereho amagita.’* 27 Mananu kwo, Herodi na Pontio Piraato bali hamu n’abasaija b’amahanga n’abantu ba Isaleeri, bakeesorooleza hamu omu rubuga kurwanisa omuheereza waawe arukwera Yesu ou waseesereho amagita, 28 okaleetera kinu kubaho habw’amaani gaawe kusigikirra ha kigendererwa kyawe. 29 Kandi hati Yahwe,* rora okutiinisiriza kwabo kandi okoonyere abairu baawe kwikara nibabaza ekigambo kyawe n’obumanzi bwona, 30 kandi ogorre omukono gwawe kukiza n’okukora obwokurorraho n’ebirukuhuniiriza kuraba omu ibara ly’omuheereza waawe arukwera Yesu.”
31 Kandi obu baamazire kwesengereza,* ekiikaro nambere bakaba beesorooliize kyatengeeta, kandi boona baijura omwoyo ogurukwera kandi bakaba nibabaza ekigambo kya Ruhanga n’obumanzi.
32 Kandi ekitebe ky’abantu abaikiriize bakaba baine omutima gumu, n’enteekereza emu, kandi busaho n’omu hali bo ow’akaba naasobora kugamba ngu ebintu ebi akaba aine bikaba biri bye wenka, baitu byona ebi bakaba baine baabibaganaga. 33 Kandi n’amaani maingi, abakwenda bakaikara nibaha obwakaiso oburukukwata ha kuhumbuuka kwa Mukama waitu Yesu, kandi embabazi za Ruhanga zikaba ziri hali bo boona omu bwingi. 34 Amananu gali, busaho n’omu omuli bo akaba ali omu bwetaago, habwokuba abo boona abakaba baine ebibanja rundi amaju, baabitundaga nibaleeta sente ezirugiremu, 35 nibazikwasa abakwenda. Kandi abakwenda baazigabiraga buli omu kusigikirra ha bwetaago bwe. 36 Yusufu, Omulevi ayazaaliirwe Kupuro, abakwenda ou baayesere Bbaranabba (erirukumanyisa “Omwana w’Okuhuumuza”), 37 akaba aine itaka kandi yalitunda yaleeta sente yazikwasa abakwenda.