IVYO TINGACHITA APO MITENGO YA VINTHU YIKUKWERA
Muzomerezgenge Umo Vinthu Viliri
Nyengo zinyake tingamanya viŵi yayi kuti vinthu vyakwera mitengo, para malipiro ghithu nayo ghakusazgikira. Kweni para malipiro ghithu ghakusazgikira yayi, chingaŵa chipusu kumanya kuti vinthu vikukwera mitengo. Ndipo ivi vingapangiska kuti mwambe kwenjerwa chomene, kusuzgika chomene maghanoghano usange muli na mbumba yakuti muyipwelelere.
Palije icho tingachita kuti vinthu vileke kukwera mitengo. Kweni para tikuzomerezga umo vinthu viliri, vikutiyendera makora.
CHIFUKWA WULI NTCHAKUZIRWA KUZOMEREZGA UMO VINTHU VILIRI?
Ŵanthu awo ŵakuzomerezga kuti palije icho ŵangachita kuti ŵalekeske kukwera kwa vinthu, chikuŵa chipusu kuti . . .
ŵakhazikiske mtima pasi. Para mtima uli m’malo, tikughanaghana na kusankha makora vinthu.
ŵagege kuchita vinthu mwambura mahara. Mwachiyelezgero, ntchamahara yayi kuti munthu walekerenge dala kulipira mabilu panji kusakaza ndalama pa vinthu vyambura kuzirwa.
ŵaleke kugazgana na ŵamumbumba yawo pa nkhani ya ndalama.
ŵasange nthowa zakovwira kuti ŵazizipizge masuzgo gha ndalama, na kusintha vinthu vinyake kuti ŵagure vinthu vyekha ivyo ŵakukhumbikwira nadi.
IVYO MUNGACHITA
Muŵe ŵakunozgeka kusintha. Para vinthu vikukwera mitengo, ntchamahara kuchepeskako vinthu ivyo tikugura usange tingafiska. Ŵanthu ŵanyake ŵakuyezga kukhala umoyo wapachanya chomene uwo ŵangakwaniska yayi, ivi vikupangiska kuti vinthu vinangikirethu pa umoyo wawo! Paumaliro, ŵanthu ŵanthena ŵakujiziyamo ŵekha. Usange muli na mbumba, mungafipaso mtima umo mungapwelelera mbumba yinu! Kweni kumbukani kuti: Ŵamumbumba yinu ŵakukhumba nyengo yinu, chitemwa chinu, kweniso mukwenera kulongora kuti mukuŵaghanaghanira kuluska chinyake chilichose.
Kuyezga kukhala umoyo wapachanya vingapangiska kuti vinthu vinangikirethu pa umoyo