Te Lua Samuelu
11 I te kamataga o te tausaga,* i te taimi ne olo sāle atu ei a tupu o taua, ne uga atu ne Tavita a Ioapo mo ana tavini mo te kautau kātoa a Isalaelu o fakatakavale a tino Amoni, kae ne nikoi ne latou a Lāpa,+ kae ko Tavita ne nofo i Ielusalema.+
2 I te afiafi e tasi, ne tu aka a Tavita mai tena moega kae fano sāle i luga i te tuafale o te fale* o te tupu. Kae ne lavea ne ia mai luga i te tuafale se fafine e koukou, kae ko te fafine tenā ko oko eiloa i te tinogali. 3 Ne uga atu ne Tavita se tino ke ‵sala aka me ko oi te fafine tenā, kae ne fai mai a ia: “E a, e se ko Patisepa+ tenei te tama fafine a Eliamo+ te avaga a Ulia+ te tagata Heti?”+ 4 Tenā ne uga atu ei ne Tavita a avefekau ke puke mai tou fafine.+ Ne vau tou fafine kae ne ‵moe eiloa tou tagata mo ia.+ (Ne tupu te mea tenei i te taimi koi fai ei te faka‵māga o tou fafine mai tena tulaga sē ‵ma.*)+ Oti aka, foki ei tou fafine ki tena fale.
5 Ne faitama te fafine kae avatu tena fekau ki a Tavita: “Au ko faitama.” 6 Ne uga te fekau a Tavita ki a Ioapo: “Aumai a Ulia te tagata Heti ki a au.” Tenā ne uga ei ne Ioapo a Ulia ke fanatu ki a Tavita. 7 I te okomaiga a Ulia ki a ia, ne fesili atu a Tavita ki a ia me e a mai a Ioapo, e a mai te kautau, kae e a mai foki te taua. 8 Ne fai atu a Tavita ki a Ulia: “Fano ki tou fale o malōlō malie.”* I te tiakinaga ne Ulia te fale o te tupu, ne avatu fakamuli ne te tupu tena meaalofa* ki a ia. 9 Kae ko Ulia ne moe i te mataloa o te fale o te tupu fakatasi mo nisi tavini a tena aliki, kae ne seki fano a ia ki tena fale. 10 Ne fakailoa atu ki a Tavita: “A Ulia e seki fano ki tena fale.” Tenā ne fai atu ei a Tavita ki a Ulia: “E a, e seki vau koe i se malaga loa? Kaia e seki fano ei koe ki tou fale?” 11 Ne tali atu a Ulia ki a Tavita: “A te Pusa+ mo tino Isalaelu mo tino Iuta konā e ‵nofo i fale fakamalumalu, kae ko toku aliki ko Ioapo mo tavini a toku aliki e ‵nofo fua i se koga ateatea. E a, e ‵tau au o fano ki toku fale o kai kae inu kae ‵moe mo taku avaga?+ E pelā eiloa mo koe e ola, ka se fai ne au te mea tenei!”
12 Ne fai atu a Tavita ki a Ulia: “Nofo i konei i te aso nei kae ma taeao ko uga ei ne au koe ke fano.” Tenā ne nofo ei a Ulia i Ielusalema i te aso tenā mo te aso mai tua ifo. 13 Ne ‵kami mai ne Tavita a ia ke vau ke ‵kai kae inu lāua, tenā ne konā ei a ia. Kae i te afiafi ne fano a ia o moe i tena moega fakatasi mo tavini a tena aliki, kae ne seki fano a ia ki tena fale. 14 I te tafataeao ne tusi ne Tavita tena tusi ki a Ioapo kae tuku atu ke fano mo Ulia. 15 Ne tusi atu a ia penei: “Tuku atu a Ulia ke tu i te laina tafa ki mua i te koga telā e lasi te taua i ei. Kae ‵tele koutou o ‵muni i ana tua ko te mea ke pakia kae mate.”+
16 Ne onoono faka‵lei a Ioapo ki te fakai, kae ne avatu ne ia a Ulia ki te koga e iloa ne ia me isi ne toa ‵mafi i ei. 17 I te taimi ne o‵mai ei a tāgata o te fakai ki tua kae taua atu ki a Ioapo, ne ‵mate a nisi tavini a Tavita i ei, kae ko Ulia te tagata Heti ne aofia i a latou kolā ne ‵mate.+ 18 Ne fakailoa atu ne Ioapo a tala katoa o te taua ki a Tavita. 19 Ne fakatonu atu a ia ki te avefekau: “Kafai ko oti ne fai ne koe ki te tupu a tala katoa o te taua, 20 e mafai o kaitaua te tupu kae fai atu ki a koe, ‘Kaia ne olo ei koutou ke pili ki te fakai o taua i ei? E a, e se iloa ne koutou me ka sana mai ne latou a koutou mai luga i te ‵pui? 21 Ko oi ne tamate ne ia a Apimeleko+ te tama tagata a Ielupeseta?+ E a, e sē se fafine telā ne ‵pei ifo ne ia se fatu solo saito mai luga i te ‵pui ki luga i a ia, tenā ne mate ei a ia i Tepesa? Kaia ne olo atu ei koutou ke pili ki te ‵pui?’ Tenā ko fai atu ei koe, ‘A tau tavini ko Ulia te tagata Heti ne mate foki.’”
22 Tenā ne fano ei te avefekau kae fai atu ki a Tavita a mea katoa kolā ne fai atu ne Ioapo ki a ia. 23 Tenā ne fai atu ei te avefekau ki a Tavita: “Ne ma‵losi atu olotou tāgata i a matou, kae ne o‵mai latou ki tua o taua mai ki a matou i te koga ateatea; kae ne ‵teke atu eiloa ne matou a latou ke oko ki mataloa o te fakai. 24 Kae ne sana mai a kausana a olotou tino sana ki au tavini mai luga i te ‵pui, kae ne ‵mate i ei a nisi tavini a te tupu; a tau tavini ko Ulia te tagata Heti ne mate foki.”+ 25 I konā ne fai atu a Tavita ki te avefekau: “Fai atu ki a Ioapo a te mea tenei: ‘Sa fai te mea tenei mo mea e fakalavelave atu ki a koe, me i te pelu e ‵ta eiloa ne ia a tino valevale. Fakamalosi tau kautau kae taua atu kae fakatakavale te fakai.’+ Kae fakamalosi atu a ia.”
26 I te logoga a te avaga a Ulia i tena avaga ko Ulia ko mate, ne kamata o tagi fanoanoa a ia ona ko tena avaga. 27 I te otiga eiloa o aso fanoanoa konā, ne uga atu te fekau a Tavita ke puke mai tou fafine ki tena fale, kae ne fai tou fafine mo fai tena avaga+ kae fanau ne ia se tamaliki tagata. A te mea ne fai ne Tavita se mea fakafanoanoa ki* a Ieova.+