Te Lua Samuelu

12 Ne uga atu ne Ieova a Natano+ ke fano ki a Tavita. Ne fanatu a ia ki ei+ kae fai atu: “E isi ne tāgata e tokolua i se fakai e tasi, e tokotasi e maumea kae ko te suā tino e mativa. 2 A te tagata maumea e uke ana mamoe mo pulumakau;+ 3 kae ko te tagata mativa e seai ne ana mea kae na ko tena tamā mamoe fafine fua e tasi telā ne ‵togi mai ne ia.+ Ne tausi faka‵lei ne ia, kae ne ola fakatasi mo ia mo ana tama tāgata. E kai mai i mu meakai a tou tagata, kae inu mai i tena ipu kae moe i ana lima. Ne fai a te mamoe tenā e pelā eiloa me se tama fafine a ia. 4 Fakamuli ifo, ne vau se mālō a te tagata maumea, kae ne seki puke mai ne ia se manu mai i ana mamoe mo pulumakau ke fakatoka ki ei a meakai ma te tagata faimalaga telā ne fanatu ki a ia. Kae ne puke mai ne ia te mamoe a te tagata mativa kae fakatoka ne ia ke kai ki ei te tagata telā ne vau ki a ia.”+

5 I konā ne kaitaua malosi a Tavita ki te tagata tenā, ana muna ki a Natano: “E pelā eiloa mo Ieova e ola,+ a te tagata telā ne fai ne ia te mea tenei e ‵tau o mate! 6 Kae e ‵tau o ‵toe ‵togi atu ne ia te mamoe fakafa taimi,+ me ne fai ne ia te mea tenei kae e se fakaasi atu ne ia te alofa atafai.”

7 Tenā ne fai atu ei a Natano ki a Tavita: “A koe ko te tagata tenā! Konei a pati a Ieova te Atua o Isalaelu: ‘Ne ‵tofi ne au a koe ke fai mo tupu i Isalaelu,+ kae ne fakasao ne au koe mai i lima o Saulo.+ 8 Au ne loto fiafia o avatu ki a koe te pulega i te fale+ o tou matai kae tuku atu a avaga+ a tou matai ki ou lima, kae ne tuku atu ne au ki a koe a kāiga o Isalaelu mo Iuta.+ Kae kafai e se lava a mea konā, ne loto fiafia au o tuku atu a nisi mea e uke atu ki a koe.+ 9 Kaia ne takalialia ei koe ki pati a Ieova mai te faiga o mea ma‵sei i tena kilokiloga? Ne tamate ne koe a Ulia te tagata Heti ki te pelu!+ Kae puke ne koe tena avaga mo fai tau avaga+ i te otiga ne tamate ne koe tou tagata ki te pelu a tino Amoni.+ 10 Nei la, ka se mafai o galo te pelu mai tou fale,+ me i a koe ne takalialia mai ki a au i te pukega ne koe a te avaga a Ulia te tagata Heti mo fai tau avaga.’ 11 Konei a pati a Ieova ne fai: ‘Ka aumai ne au a fakalavelave ki tou kāiga;+ kae i ou mua eiloa, ka puke ne au au avaga kae tuku atu ki te suā tagata,+ kae ka ‵moe fakatasi a ia mo au avaga i te ao malamalama.*+ 12 E tiga ne fai ne koe te mea tenā i se auala ‵funa,+ kae ka fai ne au te mea tenei i mua o Isalaelu kātoa i te ao malamalama.’”*

13 Tenā ne fai atu ei a Tavita ki a Natano: “Au ko agasala ki a Ieova.”+ Ne tali atu a Natano ki a Tavita: “Ko fakamagalo ne Ieova tau agasala.*+ A koe ka se mate.+ 14 Tela la, ona ko tou sē āva ki a Ieova i te faiga o te mea tenei, ka mate eiloa a tau tamaliki tagata tenā ne fanau mai.”

15 Tenā ne fano ei a Natano ki tena fale.

Kae ne ta ne Ieova te tamaliki a Tavita i te avaga a Ulia, kae ne masaki ei a ia. 16 Ne fakamolemole atu a Tavita ki te Atua tonu e uiga ki te tamaliki. Ne fakalikiliki a Tavita kae fanatu ki tena potu kae moe sāle i te fola i po.+ 17 Ne olo atu a toeaina o tena kāiga ki a ia kae taumafai ke fakatu aka a ia ki luga, kae ne ita tou tagata kae e se fia ‵kai fakatasi mo latou. 18 I te fitu o aso ne mate ei te tamaliki, kae ne ma‵taku a tavini a Tavita ma fakailoa atu ne latou ki a ia i te tamaliki ko mate. Olotou muna: “I te taimi ne ola ei te tamaliki ne fai‵pati tatou ki a ia, kae ne seki fakalogo mai a ia ki a tatou. Tela la, e mafai pefea o fakailoa atu ne tatou ki a ia i te tamaliki ko mate? E mafai loa o fai ne ia se mea sē ‵lei.”

19 I te laveaga ne Tavita ana tavini e musu‵musu i a latou eiloa, ne iloa ne ia i te tamaliki ko mate. Ne fai atu a Tavita ki ana tavini: “E a, ko mate a te tamaliki?” Ne tali atu latou: “Ko mate.” 20 Tenā ne tu aka ei a Tavita ki luga. Ne koukou a ia, ‵mili tena foitino ki te sinu,+ sui ana gatu, kae fanatu ki te fale+ o Ieova kae totuli ki lalo. Oti aka, fano ei a ia ki tena fale* kae fakamolemole atu ke aumai ne meakai ki a ia, kae ne kai ei a ia. 21 Ne fesili atu ana tavini ki a ia: “Kaia ko fai ei koe penei? I te taimi koi ola ei te tamaliki, a koe ne fakalikiliki kae tagi mautuutu; kae i te taimi eiloa ne mate ei te tamaliki, ne tu aka koe ki luga o kai ki meakai.” 22 Ne tali atu a ia: “I te taimi koi ola ei te tamaliki, au ne fakalikiliki+ kae tagi mautuutu me ne fai ifo au ki a au eiloa, ‘Ko oi e iloa ne ia māfai e fiafia mai a Ieova ki a au kae tuku ke ola te tamaliki?’+ 23 Nei la, ko mate a ia, se a te pogai e ‵tau ei o fakalikiliki au? E mata, e mafai o toe fakafoki mai ne au a ia?+ Kafai au e mate ko fano ei au ki ei,+ kae ka se foki mai a ia ki a au.”+

24 Tenā ne fakamafanafana ei ne Tavita a tena avaga ko Patisepa.+ Ne fanatu a ia ki loto i tou fafine kae ne ‵moe fakatasi lāua. Fakamuli ifo, ne fanau ne ia se tamaliki tagata kae fakaigoa ki a Solomona.*+ Kae ko Ieova ne alofa ki a ia,+ 25 kae ne fai atu a ia e auala i te pelofeta ko Natano+ ke fakaigoa a te tamaliki ki a Ietitaia,* me i a Ieova ne alofa ki a ia.

26 Ne tumau eiloa a Ioapo i te taua atu ki Lāpa+ te fenua o tino Amoni,+ kae ne puke ne ia te fakai o te malo.+ 27 Ne uga ne Ioapo a avefekau ki a Tavita kae fai atu: “Au ne taua ki Lāpa,+ kae ko oti ne puke ne au te fakai o vai.* 28 Nei la, fakamaopoopo mai a te ‵toega o kautau ke olo o taua kae puke ne latou te fakai. I te mea ma puke ne au te fakai, ko fai ei a tino me ko au ne puke ne au te fakai.”*

29 Tenā ne fakamaopoopo ei ne Tavita a kautau katoa kae fanatu ki Lāpa o taua atu ki ei kae puke ne ia. 30 Tenā ne puke ei ne ia te kalauna o Malikama mai tena ulu. A te ‵mafa o te kalauna tenā e ‵tusa mo te taleni* aulo e tasi, fakatasi mo nisi fatu tāua, kae ne tuku atu ki luga i te ulu o Tavita. Ne puke foki ne ia a mea e uke ne maua i te taua+ mai te fakai+ tenā. 31 Kae puke mai ne ia a tino kolā ne ‵nofo i ei kae fakaga‵lue ne ia ke soa a fatu, kae ga‵lue foki ki mea faigaluega fiti mata ‵kai mo takū fiti, kae faite puliki. Tenā te mea ne fai ne ia ki fakai katoa o tino Amoni. Oti aka, toe ‵foki atu ei a Tavita mo kautau katoa ki Ielusalema.