Te Lua Samuelu

19 Ne avatu te fakailoaga ki a Ioapo: “A te tupu telā e tagi mautuutu kae fanoanoa ona ko Apisaloma.”+ 2 Tela la, a te manumalo* i te aso tenā ne ‵fuli ki te fanoa‵noa o tino katoa, me ne ‵logo latou i te tupu e tagi fanoanoa ona ko tena tama. 3 Ne ‵foki lēmū atu a tino ki te fakai+ i te aso tenā e pelā me ne tino ko masiasi i a latou ne ‵tele kea‵tea mai te taua. 4 Ne ‵pono ne te tupu ana mata kae tagi pakalaga faeloa: “Taku tama ko Apisaloma! Apisaloma taku tama, taku tama!”+

5 Tenā ne fanatu ei a Ioapo ki te tupu i tena fale kae fai atu: “I te aso nei, ko oti ne fakamasiasi ne koe au tavini katoa kolā ne faka‵sao ne latou tou ola i te aso nei, mo ola o au tama tāgata,+ au tama fāfine,+ au avaga mo au avaga fakasalasala.+ 6 E alofa koe ki a latou kolā e takalia‵lia ki a koe kae takalialia koe ki a latou kolā e a‵lofa ki a koe, me ko oti ne fakaasi faka‵lei mai ne koe i te aso nei me e seai se aoga o au takitaki mo au tavini ki a koe, au e talitonu me moi ne ola mai a Apisaloma i te aso nei kae ‵mate katoa matou, e ‵lei eiloa te mea tenā ki a koe. 7 Nei la, tu ki luga, fano ki tua kae fakamalosi* atu au tavini, me e tauto atu au e auala i a Ieova me kafai e se fano koe ki tua, e seai se tagata e ‵toe mai i te po nei. Ko sili atu la te masei o te mea tenei ki a koe i lō fakamaseiga katoa kolā ne oko mai ki a koe mai te taimi ne talavou ei koe ke oko mai ki te taimi nei.” 8 Tenā ne tu aka te tupu fano ei o sagasaga i te mataloa o te fakai, kae ne fakailoa atu ki tino katoa: “A te tupu telā ko sagasaga i te mataloa.” Tenā ne o‵mai ei a tino katoa ki mua o te tupu.

Kae ko tino Isalaelu ne ‵tele katoa ki olotou fale.+ 9 A tino katoa mai matakāiga katoa o Isalaelu ne kinau kae fai aka: “A te tupu ne faka‵sao ne ia tatou mai ‵tou fili,+ kae faka‵sao ne ia tatou mai tino Filisitia; kae nei ko tele kea‵tea a ia mai te fenua ona ko Apisaloma.+ 10 Kae ko Apisaloma telā ne fakasopo aka ne tatou ke pule i a tatou,+ ko oti ne mate atu i te taua.+ Tela la, kaia e seai ei se mea e fai ne koutou ke toe fakafoki mai a te tupu?”

11 Ne avatu ne te tupu ko Tavita te fekau tenei ki faitaulaga ko Satoka+ mo Aviata:+ “Fai‵pati ki toeaina o Iuta,+ kae fai atu, ‘Kaia e fakatuai ei koutou o fakafoki mai te tupu ki tena palesi, me ko oti ne oko atu ki te fale o te tupu a pati katoa a tino Isalaelu? 12 A koutou ko oku taina; a koutou ko oku ivi mo oku ‵kano.* Kaia e fakatuai ei koutou o fakafoki mai te tupu?’ 13 Kae e ‵tau o fai atu koutou ki a Amasa,+ ‘E a, a koe e se ko oku ivi mo oku ‵kano? Ke fai eiloa ne te Atua te mea tenei ki a au kae toe fakaopoopo ne ia ki ei māfai e se fai koe mo fai taku takitaki kautau mai te taimi nei o fano ki mua i lō Ioapo.’”+

14 Tenā ne ‵fuli ei ne ia a loto o tino Iuta katoa ke tasi, kae ne avatu te lotou fekau ki te tupu: “Foki mai, ko koe mo au tavini katoa.”

15 Ne kamata o foki atu te tupu kae oko atu ki te Iolitana, kae ko tino Iuta ne olo atu ki Kilikala+ ke fakafetaui ki te tupu kae ke olo tasi mo ia ki te suā feitu o te Iolitana. 16 A Simei+ te tama tagata a Kela, te tino Peniamina mai Paulima, ne fanaifo fakavave fakatasi mo tāgata Iuta o fakafetaui ki te Tupu ko Tavita, 17 kae e toko 1,000 tāgata mai Peniamina ne olo atu mo ia. A Sipa,+ te tino fesoasoani i te fale o Saulo, fakatasi mo ana tama tāgata e toko 15 mo tavini e toko 20, ne olo fakavave ifo ki te Iolitana i mua o te tupu. 18 Ne fanatu a ia* i te asaga o aumai a te kaukāiga o te tupu kae ke fai so se mea e manako a ia ki ei. Kae ko Simei te tama tagata a Kela ne ifo atu i mua o te tupu kae koi tuai o fanatu a ia ki te suā feitu o te Iolitana. 19 Ana muna ki te tupu: “Toku aliki ke mo a eiloa e saga atu koe ki taku agasala, kae ke mo a eiloa e masaua ne koe te mea ‵se a tau tavini ne fai+ i te aso ne fano kea‵tea ei toku aliki te tupu mai Ielusalema. Ke mo a eiloa e faka‵mafa ne te tupu te mea tenei i tena loto, 20 me iloa ne tau tavini i a au ko agasala; tela la, au ko te tino muamua i te aso nei mai te kāiga o Iosefa ke fanaifo o fakafetaui ki toku aliki te tupu.”

21 I konā eiloa, ne fai atu a Apisai+ te tama tagata a Seluia,+ “E a, e se ‵tau o tamate a Simei ona ko te mea tenei, me ne fakamalaia ne ia te tino ne fakaeke ne Ieova?”+ 22 Kae ne fai atu a Tavita: “Se a te lua fekau i te mea tenei, koulua e tama tāgata a Seluia,+ ke ‵teke mai koulua ki a au i te aso nei? E a, e ‵tau o tamate se tino i te aso nei i Isalaelu? E a, e se iloa ne au me ka fai au mo tupu i Isalaelu i te aso nei?” 23 Tenā ne fai atu ei te tupu ki a Simei: “A koe ka se mate.” Kae ne tauto atu te tupu ki a ia.+

24 A Mefiposeta+ te mokopuna tagata o Saulo, ne vau foki o fakafetaui ki te tupu. Ne seki ‵fulu ne ia ana vae io me ‵vele tena talafa io me ‵ta ana gatu mai te aso eiloa ne fano ei te tupu ke oko ki te aso ko foki mai ei a ia mo te filemu. 25 I tena vauga ki Ielusalema o fakafetaui ki te tupu, ne fai atu te tupu ki a ia: “Kaia ne seki vau ei koe i a au e Mefiposeta?” 26 Kae ne fai atu a ia: “Toku aliki te tupu, au ne fakatogafiti ne taku tavini.+ Ne fai atu tau tavini tenei, ‘Ke fakatoka aka taku asini ko te mea ke mafai o sopo au i ei o olo mo te tupu,’ me i tau tavini e ‵pili.+ 27 Kae ne fatufatu ne ia tau tavini ki toku aliki te tupu.+ Kae ko toku aliki te tupu e pelā me se agelu a te Atua tonu, tela la, ke fai eiloa te mea telā e ‵lei ki a koe. 28 A te kāiga kātoa o toku tamana ne ‵tau eiloa o tamate ne toku aliki te tupu, kae ui i ei ne tuku ne koe tau tavini fakatasi mo tino kolā e ‵kai i tau taipola.+ Tela la, se a foki te mea e ‵tau ei au o fakatagi atu ki te tupu?”

29 Kae ne fai atu te tupu ki a ia: “Kaia e faipati sāle ei koe penei? Ko oti ne fai taku fakaikuga ke fakaaoga fakatasi ne koulua mo Sipa a te manafa.”+ 30 I konā ne fai atu ei a Mefiposeta ki te tupu: “Tuku atu ke puke katoa ne ia, me nei la ko oti ne foki mai toku aliki te tupu ki tena fale mo te filemu.”

31 Kae ko Pasilai+ te tino Kileata ne fanaifo mai Lokelima ki te Iolitana ke ‵taki ne ia te tupu ki te Iolitana. 32 A Pasilai ko toeaina, ko 80 ana tausaga, kae ne avatu ne ia a meakai ki te tupu i te taimi ne nofo ei i Manaima,+ me i a ia se tagata maumea. 33 Ne fai atu te tupu ki a Pasilai: “Vau ke olo tāua ki te suā feitu, kae ka avatu ne au a meakai ma koe i Ielusalema.”+ 34 Kae ne fai atu a Pasilai ki te tupu: “E toe fia nei a aso* o toku olaga koi ‵toe ke fanatu au o olo mo te tupu ki Ielusalema? 35 Au ko 80 oku tausaga i te aso nei.+ E mata, e mafai o iloa ne au te mea ‵lei mo te mea masei? E mata, e mafai ne au, tau tavini, o tami aku meakai mo meainu? E mata, koi mafai ne au o fakalogo ki leo o tāgata mo fāfine usuusu?+ Tela la, kaia fua la e fai ei tau tavini mo fai se amoga fakaopoopo ki toku aliki te tupu? 36 Ko lava loa i te vauga o tau tavini o ave te tupu ki te Iolitana. Kaia e ‵tau ei o toe ‵togi mai ne te tupu a te taui tenei ki a au? 37 Fakamolemole tuku mai tau tavini ke foki, kae tuku mai au ke mate i toku fakai telā e pili ki te koga ne tanu ei toku tamana mo toku mātua.+ Kae tenei tau tavini ko Kimeama.+ Puke ke olo tasi mo toku aliki te tupu, kae ke fai ne koe ki ei a te mea telā e ‵lei ki a koe.”

38 Tenā ne fai atu ei te tupu: “Ka olo maua mo Kimeama ki te suā feitu, kae ka fai ne au ki ei a te mea telā e ‵lei ki a koe; so se mea e fakamolemole mai koe ki ei ka fai ne au mō koe.” 39 Ne kamata o olo atu a tino katoa ki te suā feitu o te Iolitana, kae i te taimi ne fano ei te tupu ki te suā feitu, ne sogi atu te tupu ki a Pasilai+ kae fakamanuia atu ki ei; ko Pasilai loa ko foki ki tena fale. 40 I te fanatuga a te tupu ki te suā feitu o Kilikala,+ ne olo tasi lāua mo Kimeama. A tino Iuta katoa mo te āfa o tino Isalaelu ne ave ne latou te tupu ki te suā feitu.+

41 Tenā ne olo atu ei a tāgata Isalaelu katoa ki te tupu kae fai atu ki a ia: “Kaia ne kaisoa ei koe ne omotou taina ko tāgata Iuta kae avatu te tupu mo tena kāiga ki te suā feitu o te Iolitana, fakatasi mo tāgata katoa a Tavita?”+ 42 Ne tali atu a tāgata Iuta katoa ki tāgata Isalaelu: “Me i te tupu e kāiga matou.+ Kaia e ita ei koutou i te mea tenei? E mata, ne ‵kai matou ki mea a te tupu, io me se meaalofa ne aumai ki a matou?”

43 Kae ne tali atu a tāgata Isalaelu ki tāgata Iuta: “E sefulu a vaega o matou i te tupu, tela la, e lasi atu te motou tusaga i a Tavita i lō koutou. Kaia ne fakatauemu ei ne koutou a matou? E a, e se ko matou ne ‵tau o mua o fakafoki mai te motou tupu?” Kae ne ma‵losi atu a pati a tino Iuta i lō tino Isalaelu.