Te Lua Samuelu

18 Tenā ne lau aka ei ne Tavita a tāgata kolā ne ‵nofo mo ia kae ‵tofi ne ia ne takitaki ke pule atu ki taki tokoafe mo taki tokoselau.+ 2 Kae ne uga atu ne Tavita te tasi-vae-tolu o tāgata mai lalo i te takitakiga a Ioapo,+ e tasi-vae-tolu mai lalo i te takitakiga a te taina o Ioapo ko Apisai+ te tama tagata a Seluia,+ kae tasi-vae-tolu mai lalo i te takitakiga a Itai+ te tino Kata. Tenā ne fai atu ei te tupu ki tāgata konā: “Au foki e fanatu i a koutou.” 3 Kae ne fai atu latou: “E se ‵tau mo koe o vau,+ me kafai ko ‵tele matou, ko se fia ‵saga mai latou ki a matou; kae kafai e ‵mate te āfa o matou, ko se fia ‵saga mai latou ki a matou, me i a koe e ‵pau eiloa mo te toko 10,000 o matou.+ Tela la, e ‵lei atu ke fesoasoani mai koe ki a matou mai te fakai.” 4 Ne fai atu te tupu ki a latou: “A te mea telā e ‵lei ki a koutou, ka fai ne au.” Tenā ne tu ei te tupu i tafa o te mataloa o te fakai, kae ko tāgata katoa ne olo atu ki tua i taki tokoselau mo taki tokoafe. 5 Tenā ne tuku atu ei ne te tupu a te fakatonuga tenei ki a Ioapo mo Apisai mo Itai: “Fai faka‵lei a te tamataene ko Apisaloma ona ko au.”+ A tāgata katoa ne lagona ne latou a te faiatuga ne te tupu ki takitaki katoa a te fakatonuga e uiga ki a Apisaloma.

6 Ne olo atu a tāgata ki tua o taua ki Isalaelu, kae ne fai te taua i te vao o Efalaima.+ 7 Ne takavale a tino Isalaelu+ i tavini a Tavita i konā,+ kae ne tokouke ‵ki a tino ne ‵mate i te aso tenā​—e toko 20,000 tāgata. 8 Ne salalau atu te taua tenā ki te kogā koga kātoa. E se gata i ei, e tokouke atu a tino ne ‵mate i te vao i lō tino ne ‵mate i te pelu i te aso tenā.

9 Fakamuli ifo, ne iloa aka ne Apisaloma i a ia e taua atu ki tavini a Tavita. Ne tele kea‵tea a Apisaloma i te miula, kae ne tele te miula mai lalo o kaula ‵lasi o se lakau lasi, kae ne ‵lave tena ulu i se lakau lasi, tenā ne tautau ei tou tagata i luga i ei kae ko te miula ne sopo a ia i ei ne tele eiloa. 10 Tenā ne lavea ei a ia ne se tagata kae fai atu ki a Ioapo:+ “Kiloke! Ne lavea ne au a Apisaloma e tautau i se lakau lasi.” 11 Ne tali atu a Ioapo ki te tagata telā ne fai atu ne ia te tala tenā: “Kafai ne lavea ne koe, kaia ne seki tamate ei ne koe a ia i te taimi tenā ke tō ki te laukele? Moi penei ko avatu ne au mo te fiafia ki a koe e sefulu tupe siliva mo se fusi.” 12 Kae ne tali atu te tagata tenā ki a Ioapo: “Faitalia me tuku mai ki a au e 1,000 tupe siliva, e se mafai lele eiloa ne au o fakaoko oku lima ki te tama a te tupu; me ne lagona ne matou a te fakatonuga a te tupu ki a koe mo Apisai mo Itai penei, ‘Ke onoono faka‵lei koutou ki te tamataene ko Apisaloma.’+ 13 Kafai au e se fakalogo kae tamate ne au a ia, e se mafai eiloa o ‵funa aka te mea tenā mai te tupu, kae ka se puipui foki ne koe au.” 14 Tenā ne fai atu ei a Ioapo: “Ka se toe fakamāumāu ne au oku taimi ki a koe!” Ne puke ne ia a fiti makai‵kai* e tolu i tena lima kae ‵suki ne ia ki loto i te fatu o Apisaloma i te taimi koi ola ei a ia kae tautau mai i te lakau lasi. 15 Tenā ne olo atu ei a tavini e tokosefulu kolā e ave ne latou a meatau a Ioapo kae ta ne latou a Apisaloma ke oko ki te taimi ko mate ei.+ 16 Ne ili ne Ioapo te pu, kae ne ‵foki mai a tāgata mai te afuliga o tino Isalaelu; ne kalaga atu a Ioapo ke ‵tu mai latou. 17 Ne puke ne latou a Apisaloma kae ‵pei ki loto i se lua lasi i te vao kae fakaputu ne latou se faka‵tuga fatu lasi i luga i a ia.+ Kae ko tino Isalaelu katoa ne ‵tele atu ki olotou fale.

18 I te taimi koi ola ei a Apisaloma, ne faite ne ia se pou fakamanatu mō ia i te Vanu o te Tupu,+ me ne fai aka a ia: “E seai saku tamaliki tagata ke fakaola ne ia toku igoa.”+ Tenā ne fakaigoa ei ne ia te pou fakamanatu ki a ia, kae ne taku ko te Mā Fakamanatu o Apisaloma ke oko mai ki te aso nei.

19 Ne fai atu a Aimaasu+ te tama tagata a Satoka: “Fakamolemole, tuku mai ke tele au o fakailoa atu te tala ki te tupu, me ko oti ne fai ne Ieova te fakamasinoga tonu ki a ia e auala i te fakasaolotoga o ia mai i ana fili.”+ 20 Kae ne fai atu a Ioapo ki ei: “E se ko koe ka fakailoa atu ne koe te tala i te aso nei. E mafai o fakailoa atu ne koe te tala i te suā aso, kae i te aso nei ka se fakailoa atu ne koe te tala, me i te tama tonu a te tupu ko oti ne mate.”+ 21 Tenā ne fai atu ei a Ioapo ki te tino Kusi:+ “Fano o fakailoa ki te tupu a te mea ne lavea ne koe.” Ne ifo atu a te tino Kusi ki a Ioapo kae tele. 22 Ne toe fai atu a Aimaasu te tama tagata a Satoka ki a Ioapo: “Faitalia me se a te mea e tupu, fakamolemole tuku mai foki au ke tele atu i tua o te tino Kusi.” Kae ne fai atu a Ioapo: “Kaia e ‵tau ei koe o tele, e taku tama, me e seai se tala e ‵tau o fai atu ne koe?” 23 Kae ne toe fai atu a ia: “Faitalia me se a te mea e tupu, tuku mai au ke tele.” Tenā ne fai atu ei a Ioapo ki a ia: “Tele!” Ne tele a Aimaasu i te auala o fanatu ki te kogā fenua o te Iolitana, kae ne fakasili o tele i mua o te tino Kusi.

24 I te taimi nei a Tavita ne sagasaga i te va o mataloa e lua o te fakai,+ kae ne fanaka te tagata leoleo+ ki te tuafale o te mataloa i te ‵pui. Ne kilo atu a ia kae lavea ne ia se tagata e tele tokotasi mai. 25 Ne kalaga atu te tagata leoleo kae fai atu te mea tenā ki te tupu. Muna a te tupu: “Kafai e tele tokotasi mai, e isi sena tala e vau mo ia.” I te taimi ko pili mai ei a ia, 26 ne lavea ne te tagata leoleo a te suā tagata e tele mai. Tenā ne kalaga atu ei te tagata leoleo ki te tino tausi mataloa: “Kiloke! E isi aka foki se tagata tenei e tele tokotasi mai!” Muna a te tupu: “E isi foki se tala e vau mo te tino tenei.” 27 Muna a te tagata leoleo: “E lavea ne au a te tagata muamua e tele eiloa e pelā mo Aimaasu+ te tama tagata a Satoka,” tenā ne fai atu ei te tupu: “A ia se tagata ‵lei, kae aumai ne ia se tala ‵lei.” 28 Tenā ne kalaga mai ei a Aimaasu ki te tupu: “E ‵lei a mea katoa!” I konā ne ifo atu tou tagata ki te tupu kae punou ki lalo. Ana muna: “Ke vikia a Ieova tou Atua, telā ne fakatakavale ne ia a tāgata kolā ne ‵teke atu ki toku aliki te tupu!”+

29 Kae ne fai atu te tupu: “E a, e ‵lei a te tamataene ko Apisaloma?” Tenā ne fai atu ei a Aimaasu: “Ne lavea ne au te lasi o te ua‵te i te taimi ne uga mai ei ne Ioapo te tavini a te tupu mo tau tavini, kae e se iloa ne au me se a te mea tenā.”+ 30 Ne fai atu te tupu: “Fakaseke mai penei, tu i konei.” Tenā ne fakaseke atu ei tou tagata kae tu i te koga tenā.

31 Tenā ne oko mai ei te tino Kusi,+ kae ne fai atu te tino Kusi: “Ke talia ne toku aliki te tupu a te tala tenei: I te aso nei, ko oti ne aumai ne Ieova a te fakamasinoga tonu e auala i te fakasaolotoga o koe mai lima o tino katoa kolā ne ‵teke atu ki a koe.”+ 32 Kae ne fai atu te tupu ki te tino Kusi: “E a, e ‵lei te tamataene ko Apisaloma?” Tenā ne fai atu ei te tino Kusi: “Ke fai katoa a fili o toku aliki te tupu mo latou katoa kolā ne ‵teke atu ki a koe o fakapakia koe ke pelā mo te tamataene tenā!”+

33 Ne mafatia a te tupu i te mea tenei, kae fanaka tou tagata ki luga i te potu i te tuafale mai luga o te mataloa kae tagi i ei, kae i te sasaleatuga ne fai aka a ia: “Taku tama ko Apisaloma, taku tama, taku tama ko Apisaloma! E ‵lei atu moi ne mate au i lō koe e Apisaloma taku tama, taku tama!”+