Te Lua Samuelu
21 E isi se oge+ ne poko i aso o Tavita i tausaga e tolu, tenā ne fesokotaki atu ei a Tavita ki a Ieova, kae ne fai mai a Ieova: “A Saulo mo tena kāiga e agasala i te fakamaligiga o toto, me ne tamate ne ia a tino Kipeona.”+ 2 Ne ‵kami mai ne te tupu a tino Kipeona+ kae faipati atu ki a latou. (A tino Kipeona e se ne tino Isalaelu kae ko tino Amoli+ kolā ne ‵toe mai, kae ne tauto atu a tino Isalaelu ke faka‵sao latou,+ kae ko Saulo ne taumafai o tamate latou ona ko tena loto finafinau mō tino Isalaelu mo tino Iuta.) 3 Ne fai atu a Tavita ki tino Kipeona: “Se a taku mea ka fai ki a koutou, kae e mafai pefea o fai ne au se faka‵māga, ko te mea ke fakamanuia ne koutou te tofi o Ieova?” 4 Ne fai atu a tino Kipeona ki a ia: “A te kinauga i te va o matou mo Saulo mo tino o tena kāiga e sē se mea e uiga ki siliva mo aulo;+ kae e se mafai foki o tamate ne matou se tagata Isalaelu.” Tenā ne fai atu ei a ia: “So se mea e fai mai koutou ki ei, ka fai eiloa ne au mō koutou.” 5 Ne fai atu latou ki te tupu: “A te tagata telā ne tamate ne ia matou kae taumafai o afuli kea‵tea matou mai te ‵nofo i se koga e pili ki Isalaelu+— 6 tuku mai ki a matou ana tama tāgata e tokofitu. Ka fakatau‵tau ne matou olotou foitino ‵mate*+ i mua o Ieova i Kipea+ te fakai o Saulo, te tino filifilia a Ieova.”+ Tenā ne fai atu ei te tupu: “Ka tuku atu ne au latou ki a koutou.”
7 Kae ne fakaasi atu ne te tupu a te alofa atafai ki a Mefiposeta,+ te tama tagata a Ionatana te tama tagata a Saulo, ona ko te feagaiga telā ne fai i mua o Ieova i te va o Tavita mo Ionatana,+ te tama tagata a Saulo. 8 Ne puke ne te tupu a Alimoni mo Mefiposeta, ko tama tāgata e tokolua a Lisepa+ te tama fafine a Aia i a Saulo, mo tama tāgata e tokolima a Mekala*+ te tama fafine a Saulo i a Atilielu+ te tama tagata a Pasilai te tino Meola. 9 Tenā ne tuku atu ei ne ia latou ki tino Kipeona, kae ne fakatau‵tau ne latou olotou foitino ‵mate i luga i te mauga i mua o Ieova.+ Ne ‵mate fakatasi a te tokofitu konā; ne tamate latou i te aso muamua o te ‵katiga o fuataga, i te kamataga o te ‵katiga o kalite. 10 Ne puke ne Lisepa+ te tama fafine a Aia a gatu lautaga kae ‵fola ne ia i luga i te kaupapa mai te kamataga o te ‵katiga o fuataga ke oko ki te taimi ne ‵to ifo te vaiua mai te lagi ki luga i foitino konā; ne seki talia ne ia ke ‵tu a manu o te lagi i luga i foitino konā i te ao io me ko manu fe‵kai ke fakapilipili atu ki ei i te po.
11 Ne fakailoa atu ki a Tavita a mea ne fai ne te avaga fakasalasala a Saulo ko Lisepa te tama fafine a Aia. 12 Tenā ne fano ei a Tavita o puke a ivi o Saulo mo ivi o tena tama ko Ionatana mai takitaki* o Iapese-kileata,+ kolā ne kaisoa mai ne latou mai te malae o Peta-sana, te koga ne fakatau‵tau ei ne tino Filisitia i te aso ne tamate ei ne tino Filisitia a Saulo i Kilipoa.+ 13 Ne aumai ne ia a ivi o Saulo mo ivi o Ionatana mai konā, kae ne ‵luku mai foki ne latou a ivi o tāgata kolā ne tamate.*+ 14 Oti aka tanu ei ne latou a ivi o Saulo mo tena tama ko Ionatana i te laukele o Peniamina i Siiela+ i te tanuga o tena tamana ko Kiso.+ I te otiga ne fai ne latou a mea katoa ne fakatonu atu ne te tupu, ne fakalogo eiloa a te Atua ki olotou fakamolemole e uiga ki te lotou fenua.+
15 Ne toe fakatau taua foki a tino Filisitia mo Isalaelu.+ Tenā ne olo atu ei a Tavita mo ana tavini o taua ki tino Filisitia, kae ne kamata o fi‵ta a Tavita. 16 E isi se tino mai Lefaima+ e igoa ki a Isipenopa, telā e 300 sekela*+ te ‵mafa o tena tao kopa, e isi sena pelu fou kae ne manako o tamate ne ia a Tavita. 17 I konā eiloa ne vau a Apisai+ te tama tagata a Seluia o fesoasoani ki a ia+ kae ta ne ia te Filisitia kae tamate ne ia. I te taimi tenā ne tauto atu a tāgata a Tavita ki a ia: “E se ‵tau mo koe o toe vau i a matou ki te taua!+ E se ‵tau o tamate ne koe te moli o Isalaelu!”+
18 Mai tua ifo, ne toe fai foki te taua mo tino Filisitia+ i Kopo. I te taimi tenā a Sipekai+ te tino Husa ne ta ne ia a Safo, telā se tino Lefaima.+
19 Kae ne toe fai foki te taua mo tino Filisitia+ i Kopo, kae ko Eleana te tama tagata a Iale-olekami te tino Peteleema ne ta ne ia a Koliata te tino Kata, telā e ‵pau a te kau o tena tao mo te fiti o te mea ‵laga laugatu.+
20 Ne toe fai foki te taua i Kata, kae e isi se matugā tagata lasi i ei telā e taki 6 a matikao i ana lima takitasi kae taki 6 a matikao i ana vae takitasi, telā ko 24 katoa i ei; kae ko ia foki se tino Lefaima.+ 21 Ne fakaitaita atu faeloa a ia ki tino Isalaelu.+ Tenā ne ta ei a ia ne Ionatana te tama tagata a Simei,+ te taina o Tavita.
22 A te tokofa konei ne tino Lefaima i Kata, kae ne taka‵vale latou i lima o Tavita mo lima o ana tavini.+