Te Lua Samuelu

4 I te taimi ne logo ei a te tama tagata a Saulo ko Isoposeta*+ i a Apinelu ko mate i Hepelona,+ ne loto vāivāi a ia* kae ko tino Isalaelu katoa ne manava‵se. 2 E tokolua a tāgata ne takitaki ne lāua te potukau o tino kai‵soa a te tama tagata a Saulo: e tokotasi e igoa ki a Paana kae ko te suā tino ko Lekapa. A lāua ko tama tāgata a Limoni te tagata Pelota, mai te matakāiga o Peniamina. (Me ne lau foki a Pelota+ e pelā me se vaega o Peniamina. 3 A tino Pelota ne ‵tele ki Kitaima,+ kae ne fai latou e pelā me ne tino fakaa‵tea i konā ke oko mai ki te aso nei.)

4 A te tama tagata a Saulo ko Ionatana+ e isi sena tama tagata telā e ‵pili ana vae.+ Ko lima ana tausaga i te taimi ne oko mai ei te tala e uiga ki a Saulo mo Ionatana mai Ieseleelu,+ ne puke aka tou tagata ne tena nesi kae tele, kae i te telega o tou fafine ona ko te manavase, ne tō te tamaliki ko te mea eiloa ko ‵pili. A tena igoa ko Mefiposeta.+

5 Ne olo atu a tama tāgata a Limoni te tagata Pelota, ko Lekapa mo Paana ki te fale o Isoposeta, i te taimi vela o te aso, kae ko fakamalolo tou tagata i te tutonu. 6 Ne olo atu lāua ki loto i te fale o fakaloiloi pelā me olo o puke mai a saito, kae ‵suki ne lāua tou tagata i te tinae; ‵tele ei a Lekapa mo tena taina ko Paana.+ 7 I te uluatuga a lāua ki loto i te fale, a tou tagata e moe i luga i tena moega i loto i tena potu ‵moe, ne ‵suki ne lāua, tenā ne mate ei a ia, oti aka ‵kati ei ne lāua tena ua. Ne puke ne lāua tena ulu kae sa‵sale atu i te po kātoa i te auala loa ki te Alapaa. 8 Kae aumai ne lāua te ulu o Isoposeta+ ki a Tavita i Hepelona kae fai atu ki te tupu: “Tenei te ulu o Isoposeta te tama tagata a Saulo tou fili+ telā ne taumafai o tamate koe.+ I te aso nei ko tuku mai ne Ieova ki toku aliki te tupu ke taui atu a mea ne fai ne Saulo mo tino mai tena gafa.”

9 Kae ne tali atu a Tavita ki a Lekapa mo tena taina ko Paana, ko tama tāgata a Limoni te tagata Pelota, ana muna ki a lāua: “E pelā eiloa mo Ieova e ola, telā ne fakasao ne ia au mai puapuaga katoa,+ 10 i te taimi ne fakaoko mai ei ne se tino se fakailoaga ki a au, ‘A Saulo ko mate,’+ kae ne mafaufau a ia me e aumai ne ia se tala ‵lei ki a au, ne puke ne au a ia kae tamate+ i Sikilaka. Tenā te taui ne maua ne te avefekau tenā mai i a au! 11 Kae sili atu te masei māfai ne tamate ne tāgata ma‵sei se tagata amiotonu i loto i tena fale i luga i tena moega. E a, e se ‵tau o taui atu ne au a tena toto ki oulua lima+ kae fakaseai atu koulua mai te lalolagi?” 12 Tenā ne fai ei te fakatonuga a Tavita ki tamataene ke tamate lāua.+ Ne ‵kati ne latou a lā lima mo vae kae fakatau‵tau+ i tafa o te vai i Hepelona. Kae ne puke ne latou te ulu o Isoposeta kae tanu i te koga ne tanu i ei a Apinelu i Hepelona.