Te Lua Samuelu
9 Ne fai aka a Tavita: “E mata, e isi se tino koi ‵toe mai i te kāiga o Saulo ke fakaasi atu ne au ki ei te alofa fakamaoni ona ko Ionatana?”+ 2 E isi se tavini i te kāiga o Saulo e igoa ki a Sipa.+ Tenā ne aumai ei ne latou a ia ki a Tavita, kae ne fesili atu te tupu ki a ia: “A koe ko Sipa?” Ne tali atu a ia: “Au ko tau tavini.” 3 Ne toe fai atu te tupu: “E mata, e isi se tino koi ‵toe mai i te kāiga o Saulo ke fakaasi atu ne au ki ei te alofa fakamaoni o te Atua?” Ne tali atu a Sipa ki te tupu: “E isi se tama tagata a Ionatana koi ‵toe; kae e ‵pili ana vae.”+ 4 Ne fesili atu te tupu ki ei: “Tefea a ia?” Ne tali atu a Sipa ki te tupu: “Telā e nofo i te fale o Makila+ te tama tagata a Amielu i Lotepa.”
5 Ne uga fakavave atu te fekau a te Tupu ko Tavita kae ne aumai a ia mai te fale o Makila te tama tagata a Amielu i Lotepa. 6 I te okoatuga a Mefiposeta te tama tagata a Ionatana te tama tagata a Saulo ki a Tavita, ne totuli ifo a ia mo ana mata e ‵fuli ki lalo kae ifo atu ki tou tagata. Tenā ne fai atu ei a Tavita: “Mefiposeta!” kae ne tali atu a ia: “Tenei tau tavini.” 7 Muna a Tavita ki a ia: “Sa mataku, me ka fakaasi atu ne au te alofa fakamaoni+ ki a koe ona ko tou tamana ko Ionatana, kae ka toe faka‵foki atu ne au ki a koe a laukele katoa o tou tupuna ko Saulo, kae ko koe ka kai faeloa i taku taipola.”+
8 I konā loa ne ifo atu a ia ki lalo kae fai atu: “Ko oi la i ei tau tavini, ke saga faka‵lei mai koe ki se kuli mate+ e penei mo au?” 9 Ne uga te fekau a te tupu ke vau a Sipa, te tavini a Saulo, kae fai atu ki ei: “A mea katoa a Saulo mo tena kāiga ko tuku atu ne au ki te mokopuna o tou matai.+ 10 Ka fakagalue ne koe a te laukele mō ia—ko koe mo au tama tāgata mo au tavini—kae ka aumai ne koe a fuataga katoa ke fagai ki ei a tino katoa o te mokopuna o tou matai. Kae ko Mefiposeta, te mokopuna o tou matai, ka kai faeloa i taku taipola.”+
A Sipa e toko 15 ana tama tāgata kae toko 20 ana tavini.+ 11 Kae ne fai atu a Sipa ki te tupu: “Ka fai eiloa ne tau tavini a mea katoa ne fakatonu mai ne toku aliki te tupu ke fai ne tena tavini.” Tenā ne kai ei a Mefiposeta i te taipola a Tavita e pelā eiloa me se tama e tokotasi a te tupu. 12 A Mefiposeta e isi sena tamaliki tagata e igoa ki a Maika;+ kae ko tino katoa kolā ne ‵nofo i te fale o Sipa ne fai mo tavini a Mefiposeta. 13 Kae ko Mefiposeta ne nofo i Ielusalema, kae kai faeloa i te taipola a te tupu;+ kae ko ia e ‵pili ana vae.+