Te Muamua Tupu

21 Mai tua o mea konei, e isi se mea ne tupu e uiga ki te togavine o Napota te tino Ieseleelu; e tu te togavine tenā i Ieseleelu+ i tafa o te palesi o Aapo te tupu o Samalia. 2 Ne fai atu a Aapo ki a Napota: “Tuku mai ma aku tau togavine ke fakaaoga ne au mo fai taku fatoaga vesiapolo, me e pili ki toku fale. Kae ka tuku atu ne au ki a koe se togavine e ‵lei atu ke sui ki ei. Io me kafai e ‵lei ki a koe, ka ‵togi tupe atu ne au.” 3 Kae ne fai atu a Napota ki a Aapo: “E seki mafaufau eiloa au ke tuku atu ki a koe a te tofi o oku tupuga, me e se talia ne Ieova te mea tenei.”+ 4 Ne fanatu a Aapo ki tena fale, mo te loto mafatia kae e se fiafia ona ko te tali ne fai atu ne Napota te tino Ieseleelu ki a ia i ana muna: “Ka se tuku atu ne au ki a koe a te tofi o oku tupuga.” Tenā ne takato ifo ei a ia ki tena moega, ‵fuli kea‵tea ana mata, kae ita ma kai.

5 Ne vau tena avaga ko Iesepela+ ki loto i a ia kae fesili atu ki ei: “Kaia e fanoanoa malosi ei koe kae ita ma kai?” 6 Ne tali atu a ia ki tou fafine: “Au ne fai ki a Napota te tino Ieseleelu, ‘Tuku mai tou togavine ke ‵togi ne au. Io me kafai e ‵lei ki a koe, ka tuku atu ne au te suā togavine ke sui ki ei.’ Kae ne fai mai a ia, ‘Ka se tuku atu ne au taku togavine ki a koe.’” 7 Ne fai atu tena avaga ko Iesepela ki a ia: “E a, e se ko koe te tino e pule e pelā me ko te tupu i Isalaelu? Tu ki luga o kai kae fakafiafia tou loto. Ka tuku atu ne au ki a koe a te togavine o Napota te tino Ieseleelu.”+ 8 Ne tusi ne ia a tusi i te igoa o Aapo kae fakamailoga ne ia ki te fakamailoga a te tupu+ kae avatu a tusi konā ki toeaina+ mo tino tāua kolā e ‵nofo i te fakai o Napota. 9 Ne tusi atu tou fafine i tusi konā: “Fai ke fakaliki‵liki a tino, kae fai ke sagasaga a Napota i mua o tino katoa. 10 Kae fai ke saga‵saga i ana mua a tāgata ma‵sei e tokolua kae ke molimau lāua e uiga ki a ia,+ penei, ‘A koe ne pati masei ki te Atua mo te tupu!’+ Tenā ko aumai ei a ia ki tua kae peipei ki fatu ke mate.”+

11 Tenā ne fai ei ne tāgata o te fakai, toeaina mo tino tāua kolā e ‵nofo i te fakai a mea katoa kolā ne tusi i loto i tusi kolā ne avatu ne Iesepela ki a latou. 12 Ne fai ne latou ke fakaliki‵liki a tino kae fakasagasaga a Napota i mua o tino katoa. 13 Tenā ne o‵mai ei a tāgata ma‵sei e tokolua kae saga‵saga i ana mua kae kamata o molimau atu e uiga ki a Napota i mua o tino, penei: “A Napota ne pati masei ki te Atua mo te tupu!”+ Oti aka, ne ave ne latou a ia ki te koga mai tua o te fakai kae peipei ki fatu ke mate.+ 14 Ne avatu ne latou te fakailoaga ki a Iesepela, olotou muna: “A Napota ko oti ne peipei ki fatu ke mate.”+

15 I te taimi ne logo ei a Iesepela i a Napota ko oti ne peipei ki fatu ke mate, ne fai atu tou fafine ki a Aapo: “Tu ki luga, puke te togavine o Napota te tino Ieseleelu,+ telā ne ita ma ‵togi tupe ne koe, me i a Napota ko mate.” 16 I te logoga a Aapo i a Napota ko mate, ne tu aka a Aapo o fano ki te togavine o Napota te tino Ieseleelu ke puke ma ia.

17 Kae ne oko mai te fakatonuga a Ieova ki a Elia+ te tino Tisepi, ana muna: 18 “Tu ki luga, fanaifo o fakafetaui ki a Aapo te tupu o Isalaelu, telā e nofo i Samalia.+ Ko nofo atu tou tagata i te togavine o Napota, me ko fano o puke ma ia. 19 E ‵tau mo koe o fai atu ki a ia, ‘Konei a pati a Ieova ne fai mai: “E a, ko oti ne tamate ne koe se tagata+ kae puke foki a tena laukele?”’+ Ko fai atu ei ki a ia, ‘Konei a pati a Ieova ne fai mai: “I te koga telā ne sepo ei ne kuli a toto o Napota, ka sepo foki i ei ne kuli ou toto.”’”+

20 Ne fai atu a Aapo ki a Elia: “Toku fili, ko maua ne koe au!”+ Ne tali atu a ia: “Ko maua ne au koe. ‘Ona ko koe ne fakaiku* aka ke fai a mea ma‵sei i te kilokiloga a Ieova,+ 21 ka aumai nei ne au a te puapuaga ki luga i a koe, kae ka ‵teu faka‵ma ne au a mea i ou tua kae fakaseai a tāgata* katoa mai te kāiga o Aapo,+ e aofia i ei a tino sē ma‵losi mo tino vāi‵vai i Isalaelu.+ 22 Kae ka fai ne au tou kāiga ke pelā mo te kāiga o Ielopoamo+ te tama tāgata a Nepata ke pelā foki mo te kāiga o Paasa+ te tama tagata a Aita, me ko oti ne fai ne koe au ke kaitaua kae fai a Isalaelu ke agasala.’ 23 Ne fai mai foki a Ieova e uiga ki a Iesepela: ‘Ka kai ne kuli a Iesepela i se kogā laukele o Ieseleelu.+ 24 So se tino i te kāiga o Aapo e mate i te fakai ka kai ne kuli, kae ko so se tino e mate i te vao ka kai ne manu eva o te lagi.+ 25 E tonu, e seai eiloa se tino ne ‵pau mo Aapo,+ telā ne fakaiku* aka ke fai a mea ma‵sei i te kilokiloga a Ieova, kae fakamalosi aka ne tena avaga ko Iesepela.+ 26 Ne fai ne ia a toe mea fakatakalia‵lia mai te tautali atu i tua o tupua fakatakalia‵lia,* e pelā eiloa mo mea ne fai ne tino Amoli katoa kolā ne afuli kea‵tea ne Ieova i mua o tino Isalaelu.’”+

27 I te logoga eiloa a Aapo i pati konā, ne saesae ne ia ana gatu kae pei ki gatu lautaga; ne fakalilkiliki a ia kae takato sāle ki lalo i tena gatu lautaga kae sasale mo te mafatia. 28 Tenā ne oko mai ei te fekau a Ieova ki a Elia te tino Tisepi: 29 “Kai lavea ne koe te auala ne loto maulalo ei a Aapo ona ko au?+ Me ne loto maulalo tou tagata i oku mua, ka se aumai ne au a puapuaga ki a ia i te taimi e ola ei a ia. Ka aumai eiloa ne au a puapuaga ki tena kāiga i aso o tena tama tagata.”+