Te Muamua Tupu
22 E tolu tausaga ne seki ai eiloa ne taua i te va o Sulia mo Isalaelu. 2 I te tolu o tausaga ne fanaifo ei a te tupu o Iuta ko Iosefatu+ ki te tupu o Isalaelu.+ 3 Tenā ne fai atu ei te tupu o Isalaelu ki ana tavini: “E iloa ne koutou i a Lamota-kileata+ se fakai o tatou? Kae ko tatou e tuai o toe puke mai te fakai mai te tupu o Sulia.” 4 Ne fai atu a ia ki a Iosefatu: “E a, e vau koe ke olo tāua o taua i Lamota-kileata?” Ne tali atu a Iosefatu ki te tupu o Isalaelu: “Au e ‵pau eiloa mo koe. A oku tino e ‵pau eiloa mo ou tino. Aku solofanua e ‵pau eiloa mo au solofanua.”+
5 Kae ne fai atu a Iosefatu ki te tupu o Isalaelu: “Fakamolemole, fesili muamua+ ki a Ieova me ne a ana pati.”+ 6 Ne fakamaopoopo mai ne te tupu o Isalaelu a te kau pelofeta, kāti se toko 400 tāgata, kae fai atu ki a latou: “E mata, e ‵tau mo au o fano o taua atu ki Lamota-kileata, io me se ‵tau mo au o fano?” Ne fai atu latou: “Fano, kae ka tuku atu ne Ieova te fakai ki lima o te tupu.”
7 Tenā ne fai atu ei a Iosefatu: “E a, e seai aka foki se pelofeta a Ieova i konei? E mafai o fesili atu tatou e auala i a ia.”+ 8 I konā ne fai atu ei te tupu o Isalaelu ki a Iosefatu: “E toe tokotasi te tagata telā e mafai o fesili atu tatou ki a Ieova e auala i a ia;+ kae ko au e takalialia i a ia,+ me e se ‵valo sāle ne ia a mea ‵lei e uiga ki a au, kae ne mea ma‵sei fua.+ A ia ko Mikaio te tama tagata a Imila.” Kae ne fai atu a Iosefatu: “E se ‵tau o fai ne te tupu a vaegā pati penā.”
9 Ne kalaga atu a te tupu o Isalaelu ki se ofisa kae fai atu: “Aumai fakavave a Mikaio te tama tagata a Imila.”+ 10 A te tupu o Isalaelu mo Iosefatu te tupu o Iuta ne saga‵saga eiloa i lā nofogaaliki takitasi, kae ‵pei ki lā gatu fakatupu, i te koga tuki saito i te mataloa o Samalia, kae ko pelofeta katoa e fai olotou faifaiga fakapelofeta i lā mua.+ 11 Tenā ne faite ei ne Setekaia te tama tagata a Kenaana ne sau fiti ma ia kae fai atu: “Konei a pati a Ieova ne fai mai, ‘Konei a mea ka ‵ta* ne koutou ki ei a tino Sulia ke oko ki te taimi ko fakaseai atu ei latou.’” 12 E ‵pau eiloa a mea ne ‵valo mai ne nisi pelofeta katoa, olotou muna: “Fano ki Lamota-kileata kae ka manuia koe; ka tuku atu ne Ieova a te fakai ki lima o te tupu.”
13 A te avefekau telā ne fano o ‵kami mai a Mikaio ne fai atu ki a ia: “Kiloke! A pati a te kau pelofeta e fiafia ki ei a te tupu. Fakamolemole, fai foki ke ‵pau au pati mo olotou pati, kae fai atu se pati ‵lei.”+ 14 Kae ne fai atu a Mikaio: “E pelā eiloa mo Ieova e ola, so se pati e fai mai ne Ieova ki a au ka faipati atu ne au.” 15 Tenā ne fanatu ei a ia ki te tupu, kae ne fesili atu a te tupu ki a ia: “Mikaio, e mata, e ‵tau mo matou o olo o taua atu ki Lamota-kileata io me e se ‵tau mo matou o olo?” I konā ne tali atu a ia: “Olo kae ka manuia eiloa koutou; ka tuku atu ne Ieova a te fakai ki lima o te tupu.” 16 Ne fai atu te tupu ki a ia: “Ko fakafia taimi ne fai ei ne au koe ke tauto mai ke mo a ma faipati mai ne koe ki a au se isi mea aka kae na ko te munatonu i te igoa o Ieova?” 17 Tenā ne fai atu ei a ia: “E lavea ne au a tino Isalaelu katoa e salalau i luga i mauga,+ e pelā me ne mamoe e seai se lotou tausi mamoe. Muna a Ieova: ‘A latou konei e seai se lotou matai. Tuku atu a tino taki tokotasi ke ‵foki ki olotou fale mo te filemu.’”
18 Tenā ne fai atu ei te tupu o Isalaelu ki a Iosefatu: “E a, ne seki fai atu au ki a koe, ‘Ka se ‵valo ne ia a mea ‵lei e uiga ki a au, kae ko mea ma‵sei fua’?”+
19 Ne fai atu a Mikaio: “Tela la, faka‵logo mai ki pati a Ieova: E lavea ne au a Ieova e sagasaga i luga i tena nofogaaliki+ kae ko kautau katoa o te lagi e ‵tu i ana tafa, i tena feitu fakaatamai mo tena feitu fakamaui.+ 20 Tenā ne fai aka ei a Ieova, ‘Ko oi ka fakaloiloi ne ia a Aapo, ko te mea ke fano a ia ki Lamota-kileata ke takavale i ei?’ Kae ne fai mai ne se agelu e tokotasi se manatu e tasi, kae fai mai ne te suā agelu se isi manatu aka. 21 Tenā ne vau ei se agelu+ kae tu atu i mua o Ieova, ana muna, ‘Ka fakaloiloi ne au a ia.’ Ne fesili atu a Ieova, ‘Ka fai pefea ne koe te mea tenā?’ 22 Ne tali atu a ia, ‘Au ka fano o fai ana pelofeta katoa ke ‵loi.’+ Tenā ne fai atu ei a ia, ‘Ka fakaloiloi eiloa ne koe a ia, kae sili atu i ei, ka manuia eiloa koe. Fano o fai te mea tenā.’ 23 I te taimi nei ko oti ne fai ne Ieova au pelofeta katoa ke ‵loi,+ kae ko Ieova ko oti ne folafola mai ne ia a te puapuaga ka oko ki a koe.”+
24 Ne vau a Setekaia te tama tagata a Kenaana kae ‵pa ne ia a Mikaio i te kalafou, ana muna: “Ko te auala fea ne fakaseke ei te agaga o Ieova mai i a au o faipati atu ki a koe?”+ 25 Ne tali atu a Mikaio: “Kiloke! Ka iloa ne koe te auala i te aso e ulu atu ei koe ki te potu tafa ki loto o ‵muni i ei.” 26 Tenā ne fai atu ei te tupu o Isalaelu: “Puke a Mikaio kae ave ki a Amone te pule o te fakai mo Ieoasa te tama tagata a te tupu. 27 Fai atu ki a lāua penei, ‘Konei a pati a te tupu ne fai mai: “Puke te tagata tenei o ‵loka i te falepuipui+ kae fakati‵titi ana meakai mo vai ke oko ki te taimi e foki mai ei au mo te filemu.”’” 28 Kae ne fai atu a Mikaio: “Kafai e foki mai koe mo te filemu, a Ieova e seki faipati mai ki a au.”+ Kae ne toe fai atu a ia: “Tino katoa, ke masaua ne koutou te mea tenā.”
29 Tenā ne olo ei a te tupu o Isalaelu mo Iosefatu te tupu o Iuta ki Lamota-kileata.+ 30 Ne fai atu te tupu o Isalaelu ki a Iosefatu: “Au ka ‵funa oku foliga kae fano ki te taua, kae e ‵tau mo koe o pei ou gatu fakatupu.” Tenā ne ‵funa ei ne te tupu o Isalaelu ana foliga+ kae olo atu lāua o taua. 31 Ne fakatonu atu te tupu o Sulia ki ana tāgata pule i kaliota e toko 32:+ “Sa taua atu ki so se tino, faitalia me se tino malalo io me se tino maluga, kae na ko te tupu fua o Isalaelu.” 32 I te laveaga eiloa ne tāgata pule i kaliota a Iosefatu, ne fai aka latou: “Tenei eiloa te tupu o Isalaelu.” Tenā ne ma‵fuli atu ei latou o taua atu ki a ia; kae ko Iosefatu ne kamata o kalaga ki se fesoasoani. 33 I te iloaga ne tāgata pule i kaliota me e se ko te tupu o Isalaelu, ne seki toe tau‵tali atu latou i ana tua.
34 Kae e tokotasi te tagata ne sona* sana atu fua tena matasana kae tu i te tupu o Isalaelu i te sokoga o tena gatu tau fiti. Tenā ne fai atu ei te tupu ki tena tino fakatele kaliota: “‵Fuli o ave au kea‵tea mo te taua, i a au ko pakia masei.”+ 35 Ne malosi eiloa te taua i te aso tenā, kae ne ‵tau o fakatu aka te tupu i loto i te kaliota, kae fakasaga atu ki te kau Sulia. Ne ‵sali ifo a toto mai te koga pakia ki loto i te kaliota, kae ne mate eiloa a ia i te afiafi tenā.+ 36 I te tōga o te mata o te la, ne oko atu te kalaga ki te koga e ‵nofo ei te kautau: “Tino katoa toe ‵foki ki otou fakai! Tino katoa toe ‵foki ki te otou fenua!”+ 37 Ne mate te tupu kae ne aumai ki Samalia; ne tanu ne latou te tupu i Samalia. 38 I te taimi ne ‵fulu ei ne latou te kaliota tau i te vai o Samalia, ne sepo ne kuli ana toto kae ne o‵mai a fāfine talitāgata o kou‵kou i konā,* e ‵tusa eiloa mo pati a Ieova ne fai.+
39 Kae ko te tala fakasolopito kātoa o Aapo, ana mea katoa ne fai mo te fale* ne faite ki nifo o elefane+ mo fakai katoa ne faite ne ia, e a, e se tusi katoa i te tusi o tala fakasolopito i taimi o tupu o Isalaelu? 40 Tenā ne takato ifo ei a Aapo o malō‵lo fakatasi mo ana tupuga;+ kae ko tena tama tagata ko Aasaia+ ne fai mo tupu e sui ei a ia.
41 A Iosefatu+ te tama tagata a Asa ne fai mo tupu i Iuta i te fa o tausaga o te pulega a te tupu o Isalaelu ko Aapo. 42 A Iosefatu ko 35 ana tausaga i te taimi ne fai ei a ia mo tupu, kae ne pule a ia i Ielusalema i tausaga e 25. A te igoa o tena mātua ko Asupa te tama fafine a Sili. 43 Ne tumau a ia i te sasale i auala katoa o tena tamana ko Asa.+ Ne seki ‵fuli kea‵tea a ia mai i ei, kae ne fai ne ia a mea kolā e ‵tonu i te kilokiloga a Ieova.+ Kae ko koga ma‵luga ne seki fakaseai, kae ko tino koi ofo atu eiloa a taulaga kae fai ke fanaka te au mai olotou taulaga i luga i koga ma‵luga konā.+ 44 Ne fai eiloa ne Iosefatu ke tumau te fesokotakiga filemu o lāua mo te tupu o Isalaelu.+ 45 Kae ko te tala fakasolopito kātoa o Iosefatu, tena malosi i te faiga o ana mea mo te auala e taua atu ei a ia, e a, e se tusi katoa i te tusi o tala fakasolopito i taimi o tupu o Iuta? 46 Ne faka‵ma foki ne ia mai te fenua a te ‵toega o tāgata talitāgata o te faletapu+ kolā ne ‵toe mai i aso o tena tamana ko Asa.+
47 Mai te taimi tenā ne seki ai se tupu i Etoma;+ kae ne fai a te sui tupu e pelā me ko te tupu.+
48 Ne fai foki ne Iosefatu a vaka Talasisi* ke olo atu o puke mai a aulo i Ofeila,+ kae ne seki olo me ne ‵kasa a vaka i Esionikepa.+ 49 Tenā te taimi ne fai atu ei a Aasaia te tama tagata a Aapo ki a Iosefatu: “Konei aku tavini ke olo tasi mo au tavini i luga i vaka,” kae ne seki talia ne Iosefatu te mea tenā.
50 Tenā ne takato ifo ei a Iosefatu o malō‵lo fakatasi mo ana tupuga+ kae ne tanu fakatasi mo ana tupuga i te Fakai o Tavita tena tupuga; kae ko tena tama tagata ko Iolama+ ne fai mo tupu e sui ei a ia.
51 Ne fai a Aasaia+ te tama tagata a Aapo mo tupu i Isalaelu i Samalia i te 17 tausaga o te pulega a te tupu o Iuta ko Iosefatu, kae ne pule a ia ki Isalaelu i tausaga e lua. 52 Kae ne fai faeloa ne ia a mea ma‵sei i te kilokiloga a Ieova kae sasale i te auala o tena tamana+ mo tena mātua+ mo te auala o Ielopoamo te tama tagata a Nepata, telā ne fai ne ia a tino Isalaelu ke agasala.+ 53 Ne tumau a ia i te tavini atu ki a Paala+ kae ifo ki a ia kae fai faeloa ne ia ke kaitaua a Ieova te Atua o Isalaelu,+ e pelā eiloa mo mea ne fai ne tena tamana.