Te Muamua Tupu

6 I te 480 tausaga mai tua o te taimi ne olo kea‵tea ei a tino Isalaelu mai te fenua o Aikupito,+ i te fa tausaga mai tua o te faiga o Solomona mo fai te tupu i Isalaelu, i te masina o Sivi*+ (telā ko te lua o masina), ne kamata ei o faite ne ia te fale o Ieova.*+ 2 A te fale telā ne faite ne te Tupu ko Solomona mō Ieova e 60 kupita* te loa, 20 kupita te lauefa kae 30 kupita te maluga.+ 3 A te fakaosoga+ i mua o te faletapu* e 20 kupita te loa,* telā e ‵pau mo te lauefa o te fale. Kae ko tena ‵mao mai te feitu ki mua o te fale e sefulu kupita.

4 Ne faite ne ia a famalama o te fale kolā e ‵lasi i loto kae fo‵liki i tua.+ 5 E se gata i ei, ne faite fakatamilo ne ia se ‵pui mai tua o te ‵pui o te fale; telā ko ‵pui o te faletapu* mo te potu tafa ki loto,+ kae faite ne ia a potu i ei.+ 6 A te fata tafa ki lalo o potu i ana feitu, e lima kupita te lauefa, a te fata i te kogaloto e ono kupita te lauefa, kae ko te fata i te tolu e fitu kupita te lauefa, me ne fai ne ia a fakanifonifoga i te fale kātoa, ke seai se mea e faka‵piki ki luga i ‵pui o te fale.+

7 A te fale ne faite ki fatu kolā ne keli aka kae fakatoka faka‵lei,+ ko te mea ke seai se samala io me se takū io me se mea faigaluega fiti e lagona atu i loto i te fale i te taimi e faite i ei. 8 A te mataloa o te potu tafa ki lalo ne tu i te feitu ki saute* o te fale,+ kae e isi se kakega telā e fanaka ki te fola i te kogaloto, kae mai te fola i te kogaloto ki te fola i te tolu. 9 Ne faite eiloa ne ia te fale kae fakaoti ne ia.+ Ne faka‵mau ne ia a ‵saga i te tuafale, kae pulou ne ia ki laupapa ne faite mai alasi.+ 10 Ne faite ne ia a potu i feitu katoa o te fale,+ e taki lima kupita te ma‵luga o potu takitasi, kae ne ‵soko atu ki te fale mai te fakaaogaga o laupapa mai alasi.

11 I te taimi tenā, ne oko mai ei te fekau a Ieova ki a Solomona, ana muna: 12 “E pelā mo te fale tenei e faite ne koe, kafai e sasale koe i aku tulafono fakavae kae fai ne koe aku fakamasinoga kae fakalogo ki aku fakatonuga katoa mai te sasale i ei,+ ka fai foki ne au ki a koe a taku tautoga telā ne fai ki a Tavita tou tamana,+ 13 kae ka ‵nofo fakatasi au mo tino Isalaelu,+ kae ka se tiaki eiloa ne au oku tino Isalaelu.”+

14 Ne faite eiloa ne Solomona a te fale ke oti. 15 Ne faite ne ia a ‵pui i te feitu ki loto o te fale ki laupapa mai te lakau ko te alasi. Ne fakagaligali ne ia a te ‵pui i loto ki laupapa, mai te fola o te fale ke oko ki lakau o te fakaalo, kae fai ne ia te fola o te fale ki laupapa mai te lakau ko te iunipa.+ 16 Ne faite ne ia se vaega i te feitu ki tua o te fale ki laupapa mai te lakau ko te alasi telā e 20 kupita, mai te fola ke oko ki fuafua, kae faite ne ia i loto i ei* a te potu tafa ki loto,+ ko te Potu Tafasili i te Tapu.+ 17 Kae ko te faletapu*+—ko te vaega o te fale i te feitu ki mua—e 40 kupita. 18 A alasi i loto i te fale ne koli ki ei a ata fakagaligali o te lakau e pelā mo meleni vao+ mo pulalakau ko ma‵tala.+ A mea konā ne alasi katoa; e seai eiloa se fatu e lavea atu i ei.

19 Kae ne fakatoka ne ia te potu tafa ki loto+ i te fale ke tuku i ei te pusa o te feagaiga a Ieova.+ 20 A te potu tafa ki loto e 20 kupita te loa, e 20 kupita te lauefa, kae 20 kupita te maluga;+ kae ne ufi ne ia ki te tinā aulo; kae ufi ne ia te fatafaitaulaga+ ki te alasi. 21 Ne ufi ne Solomona a te feitu ki loto o te fale ki te tinā aulo,+ kae ‵tau ne ia a filifili aulo i te feitu ki mua o te potu tafa ki loto,+ telā ne ufi ki te aulo. 22 Ne ufi ne ia te fale kātoa ki te aulo ke oko ki te taimi ko palele ei te fale kātoa; ne ufi foki ne ia ki te aulo te fatafaitaulaga kātoa+ telā e tu pili ki te potu tafa ki loto.

23 I te potu tafa ki loto ne faite ne ia a kelupi e lua+ mai te lakau ko te paina, e taki sefulu kupita te ma‵luga o kelupi takitasi.+ 24 A te kapakau e tasi o te kelupi e lima kupita, kae ko te suā kapakau e lima kupita. Mai te mata o te kapakau e tasi ke oko ki te mata o te suā kapakau e sefulu kupita. 25 E sefulu foki a kupita o te lua o kelupi. A kelupi e lua konā e ‵pau te ‵lasi kae ‵pau foki a lā foliga. 26 A te maluga o te kelupi e tasi e sefulu kupita, e pelā eiloa mo te suā kelupi. 27 Tenā ne tuku ei ne ia a kelupi+ ki loto i te potu tafa ki loto.* Ne ‵fola a kapakau o kelupi ko te mea ke oko atu te kapakau o te kelupi e tasi ki te ‵pui e tasi kae ko te kapakau o te suā kelupi ki te suā ‵pui, ne ‵fola foki a lā kapakau ki loto i te kogaloto o te fale, ko te mea ke patele te suā kapakau ki te suā kapakau. 28 Kae ne ufi ne ia a kelupi ki aulo.

29 Kae ko ‵pui katoa o te fale ke oko ki potu i loto mo potu i tua, ne koli ne ia a ata o kelupi,+ lakau ko pama+ mo pulalakau ko ma‵tala.+ 30 Ne ufi ne ia te fola o te fale i potu i loto mo tua ki aulo. 31 Kae ko mataloa o te potu tafa ki loto ne faite ne ia ki lakau ko paina, mo pou i ana feitu, mo pou o mataloa, e pelā me ko te lima o vaega.* 32 A mataloa e lua ne faite ki lakau ko paina, kae ne koli ne ia ki luga i ei a ata o kelupi, lakau ko pama, mo pulalakau ko ma‵tala, kae ufi ne ia ki aulo; kae ne ufi ne ia a kelupi mo lakau ko pama ki te aulo. 33 Kae ko te mataloa o te faletapu,* tenā te auala ne faite ei ne ia a pou o mataloa ki lakau ko paina, ko te fa o vaega tenā.* 34 Kae ne faite ne ia se avā mataloa ki te lakau ko te iunipa. A te mataloa e tasi e lua ana feitu e ‵fetu, kae ko te suā mataloa e lua foki ana feitu e ‵fetu.+ 35 Ne koli ne ia a ata o kelupi, lakau ko pama mo pulalakau ko ma‵tala, kae ufi ne ia ki aulo.

36 Ne faite ne ia te koga ateatea+ i loto ki laina e tolu o fatu kolā ne ‵kati mo te laina o ‵saga alasi.+

37 I te fa o tausaga, i te masina o Sivi,* ne fakatakato i ei te fakavae o te fale o Ieova;+ 38 kae i te 11 o tausaga, i te masina o Pulu* (telā ko te valu o masina), ne oti i ei a vaega likiliki katoa o te fale e ‵tusa mo tena ata.+ E fitu tausaga ne faite ei ne ia te faletapu.