Te Muamua Tupu

7 E 13 tausaga ne faite ei ne Solomona tena fale,*+ ke oko ki te taimi ne palele ei tena fale kātoa.+

2 Kae ne faite ne ia te Fale o te Vao o Lepanona+ e 100 kupita* te loa, 50 kupita te lauefa, kae 30 kupita te maluga i luga i laina e fa o pou alasi; kae e isi ne ‵saga alasi+ i luga i pou konā. 3 Ne ‵fola a laupapa alasi i luga i ‵saga kolā ne fakata‵kato i luga i pou; e 45 te lotou aofaki, kae taki 15 i te laina. 4 E tolu a laina o foitino famalama, kae ko famalama takitasi e fakafesagai ki te suā famalama i laina e tolu. 5 A foitino mataloa katoa mo pou o mataloa e sikuea, e pelā eiloa mo feitu ki mua o famalama kolā e fakafesagai ki suā famalama i laina e tolu.

6 Kae ne faite ne ia te Potu o Pou e 50 kupita te loa kae 30 kupita te lauefa, kae e isi se fakaosoga i mua i ei fakatasi mo pou mo se fakamalumalu.

7 Ne faite foki ne ia te Potu o te Nofogaaliki,+ telā e fai i ei a fakamasinoga—ko te Potu o Fakamasinoga+—kae ne ‵pui ne latou ki alasi mai te fola ke oko ki fuafua.

8 A te fale* telā e nofo a ia i ei, i te suā koga ateatea,+ ne fakatu mai tua o te Potu,* kae ‵pau eiloa te faitega. Ne faite foki ne ia se fale e tai ‵pau mo te Potu tenei mō te tamaliki fafine a te Falao, telā ne puke mai ne Solomona mo fai tena avaga.+

9 A mea katoa konei ne faite ki fatu ‵togi ‵mafa+ kolā ne ‵kati ki te lasi e manakogina, ne ‵kati faka‵tonu ki soa fatu i te feitu ki loto mo te feitu ki tua, mai te fakavae ke oko ki te gataga o te ‵pui ki luga, mo te feitu ki tua ke oko atu ki te koga ateatea lasi.+ 10 Kae ne fakatakato te fakavae ki fatu ‵lasi kae ‵togi ‵mafa; a nisi fatu e sefulu kupita, kae ko nisi fatu e valu kupita te ‵lasi. 11 Kae mai luga i mea konei ko fatu ‵togi ‵mafa kolā ne ‵kati ki te lasi e manakogina, e pelā foki mo alasi. 12 E fakatamilo mai tua o te koga ateatea lasi ko laina e tolu o fatu kolā ne ‵kati mo te laina o ‵saga alasi, e pelā mo te koga ateatea i loto+ i te fale o Ieova mo te fakaosoga o te fale.+

13 Ne uga te fekau a te Tupu ko Solomona ke aumai a Hilamo+ mai i Tulo. 14 A ia ko te tama tagata a te fafine ko mate tena avaga mai te matakāiga o Nafatali, kae ko tena tamana se tagata Tulo telā e faite mea ki kopa;+ kae ne lasi ‵ki tena atamai, tena malamalama+ mo tena apo i te faitega o mea kese‵kese ki kopa.* Ne vau a ia ki te Tupu ko Solomona kae fai ne ia ana galuega katoa.

15 Ne faite ne ia a pou kopa e lua;+ a pou takitasi e 18 kupita te ma‵luga, kae ne manakogina se uka e 12 kupita te loa ke fakatamilo ne ia a pou* takitasi e lua konā.+ 16 Kae ne faite ne ia e lua ulupou kopa ke tuku mai luga o pou. A te ulupou e tasi e lima kupita te maluga, kae ko te suā ulupou e lima kupita te maluga. 17 A ulupou i luga i pou takitasi e isi ne mea valavala i ei mo filifili kolā ne ‵fili;+ e fitu i te ulupou e tasi, kae fitu i te suā ulupou. 18 Kae ne faite ne ia a laina e lua o pomekalanite e fakatamilo i te mea valavala e tasi mo teu fakagaligali a ulupou i luga i pou konā; ne fai ne ia penā i ulupou e lua. 19 Kae ko ulupou i luga i pou i te fakaosoga e foliga pelā me se pula o te lili, e fa kupita te ma‵luga. 20 A ulupou e ‵tu i luga i pou e lua, mai luga fua o te koga pukupuku telā e soko atu ki te mea valavala; kae e 200 a pomekalanite i laina kolā e fakatamilo i ulupou takitasi.+

21 Ne faka‵tu ne ia a pou o te fakaosoga o te faletapu.*+ Ne fakatu ne ia te pou fakaatamai* kae fakaigoa ki a Iakini,* oti aka fakatu ei ne ia te pou fakamaui* kae fakaigoa ki a Poasa.*+ 22 Kae ko te koga tafa ki luga o pou e foliga pelā me ne pula o te lili. Tenā ne oti ei te galuega ki te faitega o pou.

23 Tenā ne faite ei ne ia te pesini vai lasi telā e fakaigoa ki te Tai kopa.+ E foliga pukupuku, e 10 kupita mai te kaugutu ki te suā kaugutu kae 5 kupita te maluga, kae e fua ki se uka telā e 30 kupita te loa ke fakatamilo i ei.*+ 24 Kae e isi ne mea fakagali‵gali puku‵puku e pelā me ne meleni vao+ mai lalo i ana kaugutu, e fakatamilo i ei, e sefulu i te kupita e tasi, e fakatamilo katoa i te Tai fakatasi mo laina e lua o meleni vao kolā ne faite ke ‵piki ki ei. 25 Ne tu a te mea tenā i luga i pulumakau tāgata e 12,+ e 3 e ‵fuli ki mātū, e 3 e ‵fuli ki togala, e 3 e ‵fuli ki saute, kae 3 e ‵fuli ki saegala; kae ko te Tai ne tuku i luga i ei, kae ko olotou feitu ki tua e ‵fuli katoa ki te kogaloto. 26 Kae ko tena matolu e ‵pau mo te alofilima;* kae ko tena kaugutu ne faite ke pelā mo te kaugutu o se ipu, e pelā me se pula o te lili e matala. E mafai o ofi i ei te 2,000 paita.*

27 Tenā ne faite ei ne ia a kā*+ kopa e sefulu. A kā takitasi e fa kupita te ‵loa, e fa kupita te lauefa, kae tolu kupita te ma‵luga. 28 Kae tenei te auala ne faite ei a kā: E isi ne olotou ‵pui i feitu, kae ko ‵pui i feitu e ‵tu i va o fiti faka‵lava. 29 Kae i luga i ‵pui konā i te va o fiti faka‵lava e isi ne ata o leona,+ pulumakau tāgata mo kelupi,+ kae e ‵pau eiloa mo ata i luga i fiti faka‵lava. I te feitu ki luga mo te feitu ki lalo o leona mo pulumakau tāgata e isi ne mea ne ‵fili e tau‵tau i ei. 30 Kae ko kā takitasi e taki fa a teka kopa i ei mo siafu kopa, kae ko ana ‵kōna e fa e fai pelā me ne lagolago o mea konā. Mai lalo o te pesini ko ana lagolago kolā e isi ne mea ne ‵fili i ana feitu. 31 A te gutu o te pesini i loto i te koga tafa ki luga e tasi te kupita te maluga; kae ko tena gutu e pukupuku, a tena tulaga e tasi mo te āfa kupita, kae isi ne teuga fakagaligali i ana kaugutu. Kae ko ana ‵pui e sikuea, kae e se pukupuku. 32 A teka e fa e ‵tu mai lalo i ‵pui, kae ko lagolago o teka e ‵piki ki luga i te kā, kae ko te ma‵luga o teka takitasi e tasi mo te āfa kupita. 33 Kae ko teka konā ne faite e pelā mo teka o kaliota. A olotou lagolago, uila, gaogao mo te vaega i te kogaloto ne fiti katoa kolā ne ‵sunu ki te afi. 34 E isi ne lagolago e fa i ‵kōna e fa o kā takitasi; a olotou lagolago ne ‵sunu ke ‵piki tasi mo te kā. 35 I te feitu ki luga o te kā, e isi se fusi pukupuku e āfa kupita te maluga, kae i te feitu ki luga o te kā, a vaega fo‵liki i ei mo ana feitu ne ‵sunu ke ‵piki tasi ki ei. 36 I feitu ki tua o vaega fo‵liki konā mo ana ‵pui ne koli ne ia a ata o kelupi, leona mo lakau ko pama e ‵tusa mo te lasi o te avanoaga i luga i feitu takitasi, mo mea e ‵fili fakatamilo i ei.+ 37 Tenei te auala ne faite ei ne ia a kā e sefulu;+ e ‵pau katoa te faiga o latou,+ e ‵pau te ‵lasi kae ‵pau foki olotou foliga.

38 E sefulu a pesini kopa ne faite ne ia;+ e 40 paita e mafai o ofi i pesini takitasi. A pesini takitasi e taki fa kupita.* E tofu a kā e sefulu mo pesini takitasi. 39 Tenā ne tuku ei ne ia e lima a kā i te feitu fakaatamai o te fale kae lima i te feitu fakamaui o te fale, kae ne tuku ne ia te Tai i te feitu fakaatamai o te fale, ki te feitu ki saute-saegala.+

40 Ne faite foki ne Hilamo+ a pesini, sevolo+ mo pōla.+ Ne fakaoti ne Hilamo a galuega katoa ne fai ne ia mō te Tupu ko Solomona i te fale o Ieova:+ 41 ko pou e lua+ mo ulupou e foliga pelā me ne pōla i luga i te avā pou konā; ko mea valavala e lua+ e ufi ki ei a ulupou e lua e foliga pelā me ne pōla i luga i pou; 42 ko pomekalanite e 400+ mō mea valavala e lua, ko laina e lua o pomekalanite mō mea valavala takitasi, ke ufi ki ei a ulupou e foliga pelā me ne pōla i luga i pou e lua; 43 ko kā e sefulu+ mo pesini e sefulu+ i luga i kā; 44 te Tai+ mo pulumakau tāgata e 12 mai lalo o te Tai; 45 mo kāpa, sevolo, pōla, mo nisi mea aka katoa ne faite ne Hilamo ki kopa kolā ne ‵fulu ke matilo‵tilo ma te Tupu ko Solomona mō te fale o Ieova. 46 Ne fai ne te tupu a mea konei ki te kele i te kogā fenua o te Iolitana, i te va o Sukota mo Saletana.

47 Ne seki fua ne Solomona a mea katoa konā me ko tō uke. A te ‵mafa o kopa e se iloa tonu.+ 48 Ne faite ne Solomona a meāfale katoa mō te fale o Ieova: te fatafaitaulaga+ aulo; te taipola aulo+ e tuku i ei a falaoa ne ofo atu ki te Atua; 49 ko tugamoli+ mai tinā aulo, e lima i te feitu fakaatamai kae lima i te feitu fakamaui mai mua o te potu tafa ki loto; mo pulalakau,+ mo moli, mo sikofi, ne faite ki aulo;+ 50 ko pesini, mea tamate moli,+ pōla, ipu,+ mea tuku malala ‵ka,+ mai tinā aulo; mo mea mo faka‵mau a mataloa o te fale tafa ki loto,+ telā ko te Potu Tafasili i te Tapu, mo mataloa o te fale kātoa o te faletapu,+ ne faite ki aulo.

51 Ne fakapalele ne te Tupu ko Solomona a galuega katoa ne ‵tau o fai ne ia ki te fale o Ieova. Tenā ne aumai ei ne Solomona ki loto a mea ne fakatapu ne tena tamana ko Tavita,+ kae tuku atu ne ia a siliva, aulo mo nisi mea ki loto i te potu ‵teu koloa o te fale o Ieova.+