Te Muamua Tupu

8 I te taimi tenā ne fakamaopoopo ne Solomona+ a toeaina o Isalaelu, ulu katoa o matakāiga mo takitaki o kāiga o Isalaelu.+ Ne o‵mai latou ki te Tupu ko Solomona i Ielusalema o ave te pusa o te feagaiga a Ieova mai te Fakai o Tavita,+ telā ko Siona.+ 2 Ne maopoopo a tāgata Isalaelu katoa i mua o te Tupu ko Solomona i te taimi o te ‵kaiga fiafia* i te masina o Etanima,* telā ko te fitu o masina.+ 3 Tenā ne olo atu ei a toeaina katoa o Isalaelu, kae sau aka ne faitaulaga a te Pusa.+ 4 Ne aumai ne latou te Pusa a Ieova, te faleie o maopoopoga,+ mo meāfale tapu katoa i loto i te faleie. Ne aumai ne faitaulaga mo tino Levi a mea konā. 5 A te Tupu ko Solomona mo te maopoopoga kātoa o tino Isalaelu, kolā ne fakatonu ki ei ke fetaui mo ia, ne ‵tu atu i mua o te Pusa. Ko oko eiloa i te uke o mamoe mo pulumakau ne ofo atu+ telā ko se mafai ei o lau aka io me iloa atu te aofaki.

6 Tenā ne aumai ei ne faitaulaga a te pusa o te feagaiga a Ieova ki tena tulaga,+ i loto i te potu tafa ki loto o te fale, ko te Potu Tafasili i te Tapu, mai lalo i kapakau o kelupi.+

7 A kapakau o kelupi ne ‵fola mai luga o te tulaga o te Pusa, ko te mea ke fakamalu ne kelupi a te Pusa mo ana amo.+ 8 A amo+ e ‵loa ‵ki telā ko mafai ei o lavea atu a mata o amo mai te Potu Tapu i mua o te potu tafa ki loto, kae e se mafai o lavea mai i tua. Kae koi tuku eiloa i konā ke oko mai ki te aso nei. 9 E seai ne mea i loto i te Pusa kae ko papa fatu fua e lua+ kolā ne tuku atu ne Mose ki loto i ei+ i Holepa, i te taimi ne fai ei ne Ieova se feagaiga+ mo tino Isalaelu i te lotou o‵maiga ki tua mo te fenua o Aikupito.+

10 I te taimi ne o‵mai ei a faitaulaga ki tua mo te koga tapu, ne ‵fonu eiloa te fale o Ieova+ i te kaumana.+ 11 Ne seki mafai ne faitaulaga o ‵tu o tavini atu ona ko te kaumana, me ko ‵fonu eiloa te fale o Ieova i te ‵malu o Ieova.+ 12 I konā loa ne fai mai a Solomona: “Muna a Ieova i a ia ka nofo i te pouliga matolu.+ 13 Ko oti ne faite ne au se fale gali mō koe, se koga tumau mo ou nofo ki te se-gata-mai.”+

14 Tenā ne mafuli mai ei a te tupu kae kamata o fakamanuia ne ia a te fakapotopotoga kātoa o Isalaelu kae ko te fakapotopotoga kātoa o Isalaelu e ‵tu eiloa i luga.+ 15 Ana muna: “Ke vikia a Ieova te Atua o Isalaelu, te tino telā ne fai tena tautoga ki toku tamana ko Tavita, kae e auala i tena lima ne fakataunu eiloa ne ia, ana muna, 16 ‘Mai te aso ne aumai ei ne au oku tino Isalaelu ki tua mo Aikupito, ne seki filifili ne au se fakai mai matakāiga katoa o Isalaelu ke faite i ei se fale mō toku igoa ke tumau i ei,+ kae ne filifili ne au a Tavita ke pule atu ki oku tino Isalaelu.’ 17 Kae ko te manakoga eiloa o te loto o toku tamana ko Tavita ke faite se fale mō te igoa o Ieova te Atua o Isalaelu.+ 18 Kae ko Ieova ne fai ki toku tamana ko Tavita, ‘Ko te manakoga eiloa o tou loto ke faite se fale mō toku igoa, kae se mea ‵lei ke isi se manakoga penei i tou loto. 19 Kae ka se faite ne koe te fale, kae ko tau tama tonu eiloa telā ka fanau mai ne koe ka faite ne ia te fale mō toku igoa.’+ 20 Ne fakataunu eiloa ne Ieova te folafolaga telā ne fai ne ia, me ne sui ne au toku tamana ko Tavita kae ko sagasaga au i luga i te nofogaaliki o Isalaelu, e pelā eiloa mo te tautoga a Ieova. Ko oti foki ne faite ne au te fale mō te igoa o Ieova te Atua o Isalaelu+ 21 kae fakatoka se koga i konā mō te Pusa e tuku i ei a te feagaiga+ telā ne fai ne Ieova mo ‵tou tupuga i te taimi ne aumai ei ne ia latou ki tua mo te fenua o Aikupito.”

22 Tenā ne tu aka ei a Solomona i mua o te fatafaitaulaga a Ieova i mua o te fakapotopotoga kātoa o Isalaelu, kae ‵fola ana lima ki te lagi,+ 23 ana muna: “Ieova te Atua o Isalaelu, e seai se Atua e ‵pau mo koe+ i te lagi i luga io me i te lalolagi i lalo, e tausi ki te feagaiga kae fakaasi atu te alofa fakamaoni+ ki au tavini kolā e sa‵sale i ou mua mo olotou loto kātoa.+ 24 Ne tausi ne koe te tautoga ne fai ne koe ki tau tavini ko Tavita toku tamana. Ne tauto koe i tou gutu, kae i te aso nei ne fakataunu eiloa ne koe ki tou lima.+ 25 Nei la, e Ieova te Atua o Isalaelu, tausi ki te tautoga ne fai ne koe ki tau tavini ko Tavita toku tamana i te taimi ne fai atu ei koe: ‘Kafai e ‵saga tonu au tama tāgata ki te lotou auala mai te sa‵sale i oku mua, e pelā eiloa mo tau sasalega i oku mua, ka isi faeloa se tagata i tou gafa e sagasaga i luga i te nofogaaliki o Isalaelu i oku mua.’+ 26 Nei la, e te Atua o Isalaelu, fakamolemole ke taunu eiloa a te tautoga ne fai ne koe ki tau tavini ko Tavita toku tamana.

27 “Kae e mata, ka nofo eiloa a te Atua i te lalolagi?+ Kiloke! A te lagi, ao, a te lagi o lagi e se mafai o ofi koe i ei;+ kae sili atu la te foliki o te fale tenei ne faite ne au!+ 28 Ke na saga atu nei koe ki te ‵talo a tau tavini mo tena fakatagi mō se fakamagaloga, e Ieova toku Atua, kae fakalogo ki te ‵tagi mō se fesoasoani mo te ‵talo a tau tavini telā e ‵talo atu i ou mua i te aso nei. 29 Ke saga tonu mai eiloa ou mata ki te fale tenei i te po mo te ao, ki te koga telā ne fai mai ei koe, ‘A toku igoa e maua i te koga tenā,’+ o fakalogo ki te ‵talo a tau tavini telā e ‵talo kae saga atu ki te koga tenei.+ 30 Kae fakalogo mai ki te fakatagi a tau tavini mō se fakamagaloga mo te fakatagi mai ou tino Isalaelu kolā e ‵talo kae ‵saga atu ki te koga tenei, kae ke lagona ne koe mai tou koga nofo i te lagi;+ ao, ke lagona eiloa ne koe kae fakamagalo ne koe.+

31 “Kafai se tagata e agasala ki te suā tagata kae ‵tau o fai ne ia se tautoga* kae ko ‵tau o fakataunu ne ia te tautoga* tenā, kae vau a ia ki mua o tau fatafaitaulaga i te fale tenei i te taimi koi nofo ei mai lalo i te tautoga,*+ 32 ke fakalogologo eiloa koe ki ei mai te lagi kae gasuesue kae fakamasino au tavini mai te fai atu me i te tino masei e ‵se kae fakasala a ia e ‵tusa mo ana mea ne fai, kae fai atu me i te tino amiotonu e seai sena ‵se kae taui atu ki a ia e ‵tusa mo tena amiotonu.+

33 “Kafai ko fakatakavale ou tino Isalaelu ne se fili me e tumau eiloa latou i te agasala ki a koe,+ kae e ‵foki mai latou ki a koe o avatu a vikiga ki tou igoa+ kae ‵talo kae fakamolemole atu ki a koe i te fale tenei ki se taliaga mai i a koe,+ 34 ke fakalogologo eiloa koe ki ei mai te lagi kae fakamagalo a te agasala a ou tino Isalaelu kae faka‵foki mai latou ki te fenua telā ne tuku atu ne koe ki olotou tupuga.+

35 “Kafai ko ‵pono a te lagi kae seai ne vaiua+ me ne agasala faeloa latou ki a koe,+ kae ‵talo atu latou kae ‵saga mai ki te koga tenei kae tavae ne latou tou igoa kae ‵fuli kea‵tea mai te lotou agasala me ne fai ne koe latou ke loto maulalo,*+ 36 ke fakalogologo eiloa koe mai te lagi kae fakamagalo a te agasala a au tavini, ko ou tino Isalaelu, me ka akoako ne koe latou+ e uiga ki te auala ‵lei e ‵tau o sa‵sale latou i ei; kae aumai ne koe te vaiua ki tou fenua+ telā ne tuku ne koe ki ou tino e pelā me se tofi.

37 “Kafai e poko se oge i te fenua,+ io me se famai, se matagi ‵vela, taelagoa,+ mumuga seakelise, io me ne seakelise* fe‵kai; io me kafai e nikoi latou ne te lotou fili i loto i so se fakai o te fenua io me ‵poko latou i so se vaegā mala io me se masaki,+ 38 so se ‵talo, mo so se fakatagi mō se fakamagaloga+ e fai ne so se tagata io me ko ou tino Isalaelu katoa (me e iloa ne tino taki tokotasi a puapuaga i tena loto)+ māfai ko ‵fola atu olotou lima kae ‵saga atu ki te fale tenei, 39 ke fakalogologo eiloa koe mai te lagi, ko tou koga nofo,+ kae ke fakamagalo ne koe+ kae fai sau faiga; kae taui atu ki tino taki tokotasi e ‵tusa mo olotou auala katoa,+ me iloa ne koe a mea i olotou loto (ko koe tokotasi fua e iloa tonu ne koe a loto o tino),+ 40 ko te mea ke ma‵taku latou ki a koe i aso katoa e ola ei latou i te fenua ne tuku ne koe ki omotou tupuga.

41 “E pelā foki mo te tino fakaa‵tea telā e se aofia i ou tino Isalaelu kae ne vau mai se fenua ‵mao ona ko tou igoa+ 42 (me ka ‵logo latou e uiga ki tou igoa sili+ mo tou lima malosi mo tou lima mafi), kae e vau a ia o ‵talo kae saga mai ki te fale tenei, 43 ke fakalogologo eiloa koe mai te lagi, ko tou koga nofo,+ kae fai a mea katoa e fakamolemole atu ki ei a te tino fakaa‵tea tenā, ko te mea ke iloa ne tino katoa i te lalolagi a tou igoa kae ke ma‵taku ki a koe,+ e pelā eiloa mo ou tino Isalaelu, kae ke iloa ne latou me e takutaku eiloa tou igoa i te fale tenei ne faite ne au.

44 “Kafai e olo ou tino o taua ki olotou fili i te auala ne uga ei ne koe latou,+ kae ‵talo atu latou+ ki a Ieova kae ‵fuli mai ki te fakai telā ne filifili ne koe+ kae ‵saga atu ki te fale telā ne faite ne au mō tou igoa,+ 45 tenā ko fakalogologo ei koe mai te lagi ki olotou ‵talo mo olotou fakatagi mō se fakamagaloga kae fai te fakamasinoga mō latou.

46 “Kafai e agasala latou ki a koe (me e seai se tagata e se agasala),+ kae kaitaua koe ki a latou kae tiaki ne koe latou ki te fili, kae puke fakapagota latou ne tino o ave ki te fenua o te fili, faitalia me ‵mao io me pili mai;+ 47 kae ne toe ala aka olotou mafaufau i te fenua ne ave fakapagota latou ki ei,+ kae toe ‵foki atu ki a koe+ kae fakamolemole atu mō se fakamagaloga i te fenua o olotou fili,+ olotou muna, ‘A matou ko agasala kae fai mea ‵se; ne fai ne matou a mea ma‵sei,’+ 48 kae toe ‵foki atu latou ki a koe mo olotou loto kātoa+ mo olotou foitino kātoa i te fenua o olotou fili telā ne ave fakapagota latou ki ei, kae e ‵talo atu latou ki a koe kae ‵fuli ki te lotou fenua telā ne tuku atu ne koe ki olotou tupuga mo te fakai ne filifili ne koe mo te fale ne faite ne au mō tou igoa,+ 49 tenā ko fakalogologo ei koe mai te lagi, ko tou koga nofo,+ ki te lotou ‵talo mo te lotou fakatagi mō se fakamagaloga, kae fai te fakamasinoga mō latou 50 kae fakamagalo ou tino kolā ne agasala ki a koe, fakamagalo atu olotou amioga solitulafono katoa ne fai ki a koe. Ka fai ne koe latou e pelā me ne tino fakaa‵lofa i mua o olotou fili, kae ka a‵lofa eiloa olotou fili ki a latou+ 51 (me i a latou ko ou tino mo tou tofi+ telā ne aumai ne koe ki tua mai Aikupito,+ mai loto i se ogaumu telā e ‵sunu i ei a fiti).+ 52 Ke ‵pula mai ou mata ki te fakatagi a tau tavini mō se fakamagaloga+ mo te fakatagi a ou tino Isalaelu mō se fakamagaloga mai te fakalogologo ki a latou i so se taimi e ka‵laga atu ei ki a koe.*+ 53 Ko oti ne ‵vae kea‵tea ne koe latou e pelā me ko tou tofi mai tino katoa o te lalolagi,+ e pelā eiloa mo te folafolaga ne fai ne koe e auala i tau tavini ko Mose i te taimi ne aumai ei ne koe omotou tupuga ki tua mai Aikupito, e te Aliki Sili ko Ieova.”

54 Kae i te otiga eiloa ne fai atu ne Solomona a te ‵talo kātoa tenei ki a Ieova mo te fakatagi mō se fakamagaloga, ne tu aka a ia i mua o te fatafaitaulaga a Ieova telā ne totuli a ia i ei mo ana lima e ‵fola ki te lagi.+ 55 Ne tu aka a ia kae fakamanuia atu te fakapotopotoga kātoa o Isalaelu i se leo maluga, ana muna: 56 “Ke vikia a Ieova, telā ne tuku mai ne ia se koga malōlō ki ana tino Isalaelu, e ‵tusa eiloa mo tena tautoga.+ E seai eiloa se pati e tasi mai i ana folafolaga ‵lei katoa ne fai e auala i tena tavini ko Mose ne seki taunu.+ 57 Ke fakatasi mai eiloa a Ieova te ‵tou Atua ki a tatou e pelā mo tena fakatasi atu ki ‵tou tupuga.+ Ke mo a eiloa e tiaki ne ia tatou io me fakapuli ne ia tatou.+ 58 Ke fai eiloa ne ia ‵tou loto ke pili atu ki a ia,+ ke sa‵sale i ana auala katoa kae faka‵logo ki ana fakatonuga, ana tulafono fo‵liki, mo ana fakamasinoga, kolā ne fakatonu ne ia ‵tou tupuga ke faka‵logo ki ei. 59 Kae ke fai aku pati konei ne fakamolemole atu ei au ki a Ieova mō se fakamagaloga ke masaua ne Ieova te ‵tou Atua i te ao mo te po, ko te mea ke fai ne ia se fakamasinoga mō tena tavini mo ana tino Isalaelu e ‵tusa mo mea e manakogina i aso takitasi, 60 ko te mea ke iloa ne tino katoa i te lalolagi me i a Ieova ko te Atua tonu.+ E seai eiloa se isi Atua!+ 61 Tela la, ke tuku katoatoa atu otou loto+ ki a Ieova te ‵tou Atua mai te sa‵sale i ana tulafono fo‵liki kae faka‵logo ki ana fakatonuga e pelā mo te aso nei.”

62 Ne ofo fakatasi atu ne te Tupu mo Isalaelu kātoa se taulaga gali i mua o Ieova.+ 63 Ne ofo atu ne Solomona a taulaga ‵kai fakatasi+ ki a Ieova: Ne ofo atu ne ia a pulumakau e 22,000 mo mamoe e 120,000. Tenā ne fakaulufale ei ne te tupu mo tino Isalaelu katoa a te fale o Ieova.+ 64 I te aso tenā ne ‵tau o fakatapu ne te tupu a te kogaloto o te koga ateatea i mua o te fale o Ieova, me tenā te koga ne ofo atu ei ne ia a taulaga ‵sunu, taulaga meakai, mo gako o taulaga ‵kai fakatasi, me i te fatafaitaulaga kopa+ i mua o Ieova ko tō foliki ke tuku i ei a taulaga ‵sunu, taulaga meakai, mo gako+ o taulaga ‵kai fakatasi. 65 I te taimi tenā ne fai ei ne Solomona a te ‵kaiga fiafia+ fakatasi mo tino Isalaelu katoa, se fakapotopotoga lasi eiloa mai Lepo-hamata* ke oko ifo ki te Vanu o Aikupito,+ i mua o Ieova te ‵tou Atua i aso e 7 mo nisi aso aka e 7, e 14 katoa a aso. 66 I te aso mai tua ifo i ei,* ne uga atu ne ia a tino ke olo, kae ne fakamanuia atu latou ki te tupu kae olo ki olotou fale mo te fia‵fia kae ‵lifu i olotou loto ona ko te aga‵lei+ ne fakaasi atu ne Ieova ki tena tavini ko Tavita mo ana tino Isalaelu.