Iopu
2 E tupu aka a ia e pelā me se pulalakau ko magemage ei;*+
E tele kea‵tea a ia e pelā me se ata ko galo atu ei.+
4 Ko oi e mafai o fanau mai ne ia se tino ‵ma mai se tino sē ‵ma?+
E seai se tino e mafai ne ia!
5 Kafai ko oti ne fakaiku aka ana aso,
A te aofaki o ana masina e nofo mo koe;
Ko oti ne fai ne koe se tapula mō ia ko te mea ke se mafai o mumea atu ki mua.+
6 Kilo fakaa‵tea mai i a ia ko te mea ke mafai o malōlō a ia,
Ke oko ki te taimi ko palele ei tena aso+ e pelā me se tino galue ‵togi.
7 Me i te lakau e isi foki sena fakamoemoega.
Kafai e ‵kati ki lalo, ka toe ‵somo aka,
Kae ko ana tamā kaula ka ola faeloa.
8 Kafai ko ma‵tua ana aka i lalo i te laukele
Kae ko tena tafito e mate i luga i te one,
9 I te motiga fua o te vai ka toe ola aka ei;
Kae ka toe ‵somo aka ana kaula e pelā eiloa me se lakau fou.
10 Kae ko te tagata e mate ko takato ei e aunoa mo se malosi;
Kafai ko mate se tino, tefea a ia?+
11 A vai e ‵galo mai i te tai,
Kae ko te vaitafe e tafe kea‵tea, ko masa ei.
12 A te tagata e takato foki ki lalo kae e se toe tu aka ki luga.+
Ke oko ki te taimi ko se toe ai ei se lagi, ka se toe ala aka eiloa latou,
Io me ‵fagu aka latou mai te moe.+
13 Me ka faka‵muni ne koe au i te Tanuga,*+
Me ka ‵funa ne koe au ke oko ki te taimi ko seke ei tou kaitaua,
Me ka fakatoka ne koe se tapula mō oku kae masaua mai au!+
14 Kafai e mate se tagata, e mafai o toe ola mai a ia?+
15 Ka kalaga mai koe, kae ka tali atu au ki a koe.+
Ka manako malosi koe ki galuega a ou lima.
16 Kae nei la, e lau eiloa ne koe oku kalafaga;
E kilo mai fua koe ki taku agasala.
17 A taku amioga solitulafono e ‵pono faka‵mau i loto i se ato,
Kae faka‵mau ne koe a taku mea ‵se ki se kulū.
18 Kafai e siga se mauga kae takafili kea‵tea,
Mo se kaupapa ko unu kea‵tea mai te koga ne tu i ei,
19 Kafai ko kaina a fatu ne vai
Kae ko ‵tafe i ei a one i te laukele,
Ko fakaseai ei ne koe te fakamoemoega o te tagata.
20 E pule atu faeloa koe ki a ia ke oko ki te taimi ko mate ei;+
E ‵fuli ne koe ana foliga, kae uga atu ne koe ke fano.
21 Ana tama tāgata e fakaaloalogina, kae e se iloa ne ia;
E fakamalalogina latou, kae e se iloa ne ia.+
22 Ka lagona fua ne ia te ‵mae i te taimi koi ola ei a ia;
E fanoanoa fua a ia i te taimi koi ola ei a ia.”