Iopu
15 Ne tali atu a Elifasa+ te tino Timanu:
2 “E a, ka tali atu se tino poto ki kinauga sē aoga,
Io me faka‵fonu tena tinae ki te matagi mai saegala?
3 A te polopoloki atu ki pati e se aoga,
Kae ko te faipati e se aoga.
4 Me i a koe ne manatu fatauva e uiga ki te mataku ki te Atua,
Kae manatu māmā koe ki so se mea e uiga ki te Atua.
5 Me i tau mea ‵se e fakaasi mai i au pati,*
Kae e filifili ne koe a pati faitogafiti.
6 Ko tou gutu eiloa e fakamasei ne ia koe, kae e se ko au;
E fakamaoni mai ne ou laugutu a mea e uiga ki a koe.+
7 E a, ko koe te tagata muamua ke fanau,
Io me ne fanau muamua koe i mauga?
8 E a, e fakalogo koe ki pati ‵funa a te Atua,
Io me e a, ko koe fua te tino e maua ne koe te poto?
9 Se a te mea e iloa ne koe kae e se iloa ne matou?+
Se a te mea e malamalama koe i ei kae e se malamalama matou i ei?
10 A tino ulu sinā mo tino ma‵tua konei e ‵nofo tasi tatou,+
Ko tāgata kolā e ma‵tua atu i tou tamana.
11 E a, e se lava a pati fakamafanafana a te Atua ki a koe,
Io me ko pati kolā e faipati faka‵lei atu ki a koe?
12 Kaia ko ave kea‵tea ei koe ne tou loto,
Kae kaia e ‵pula ei ou mata i te kaitaua?
13 Me ko ‵fuli tou loto o ‵teke atu ki te Atua,
Kae talia ne koe a vaegā pati penā ke ‵mai ki tua mo tou gutu.
14 Se a te tagata e ‵tau ei a ia o ‵ma,
Io me se tino ne fanau ne se fafine telā ko ‵tau ei a ia o amiotonu?+
15 Kiloke! E seai sena fakatuanaki ki ana tino tapu,
Ke oko ki te lagi e se ‵ma i tena kilokiloga.+
16 Kae masei atu la māfai a te tino e masei kae fai mea piko‵piko,+
Se tagata e inu ki te sē amiotonu e pelā eiloa me ne vai!
17 Ka fakailoa atu ne au; fakalogo mai ki a au!
Ka fakamatala atu ne au taku mea ne lavea,
18 Ko mea ne fakamatala ne tāgata ‵poto mai i olotou tamana,+
Ko mea ne seki ‵funa ne latou.
19 Ne tuku atu fua ki a latou a te fenua,
Kae e seai se tino fakaa‵tea ne fanatu i loto i ei.
20 A te tino masei e logo‵mae i puapuaga i ana aso katoa,
I loto i tausaga katoa kolā ne tausi mō te tino pule fakasaua.
21 A leo fakama‵taku e lagona ne ia ki ana taliga;+
I te taimi o te filemu, e taua atu a tino ‵fao mea ki a ia.
22 E se talitonu a ia me ka sao a ia mai te pouliga;+
Ne tausi a ia mō te pelu.
23 E fanofano sāle a ia o salasala ki meakai*—kofea la?
E iloa ‵lei ne ia me ko pili mai te aso o te pouliga.
24 A te puapuaga mo te mafatia e fakamatakutaku atu faeloa ki a ia;
E pule atu ki a ia e pelā me se tupu ko toka o kamata se taua.
25 Me e sisi aka tena lima o ‵teke atu ki te Atua
Kae taumafai ke se fakalogo ki* te Atua Malosi Katoatoa.
26 E tele atu a ia mo te loto makeke o ‵teke atu ki a Ia,
Fakatasi mo tena talita matolu kae malosi;
27 E ufi ne ia ana mata ki gako,
Kae ko ana kautega ko ‵fula eiloa i gako;
28 E nofo a ia i fakai kolā ka fakaseai atu,
I fale kolā e seai ne tino ka ‵nofo i ei,
Kolā ka fai pelā me ne fakaputuga fatu.
29 Ka se gasolo aka a ia o maumea, kae ko ana koloa ka se gasolo o uke,
Io me salalau atu ana kope i te fenua.
30 Ka se sao a ia mai te pouliga;
Ka malō tena tamā kaula* i te ulaga o te afi,
Kae ka mate a ia e auala i te mānava mai te gutu o te Atua.+
31 E se ‵tau o takasēsē a ia kae talitonu ki mea sē aoga,
Me i mea ka maua ne ia mai i ei ne mea sē aoga;
32 Ka tupu a te mea tenā mai mua o tena aso,
Kae ko ana kaula ka se mafai o ‵tupu olaola.+
33 Ka fai a ia pelā me se vine telā e lūlū ke ‵to ana fuagavine ‵moto,
Kae e pelā me se lakau olive telā ko ta‵tela ana pula.
34 Me i te fakapotopotoga o tino ma‵sei* e seai ne aoga,+
Kae ka ‵ka i te afi a faleie o tino ne ‵togi fakakolekole.
35 E fakafua mai ne latou a te fakalavelave kae fanau mai a te mea masei,
Kae e māfua mai i olotou moegatama a te fakaloiloi.”