Iopu
27 Ne toe faka‵soko a te faipatiga* a Iopu, ana muna:
2 “E pelā eiloa mo te Atua e ola, telā ne ave kea‵tea ne ia te fakamasinoga tonu mai i a au,+
E pelā eiloa mo te Atua Malosi Katoatoa e ola, telā ne fakatigaina ne ia au,+
3 Me pefea eiloa te leva e mānava ei au
Kae ko te mānava mai te Atua e nofo i loto i oku puisu,+
4 A oku laugutu ka se faipati eiloa ki te sē amiotonu;
Io me ko toku alelo ke faipati ki te loi!
5 E seki mafaufau eiloa au ke taku koutou ne tāgata amio‵tonu!
Ke oko ki te taimi e mate ei au, ka se tiaki eiloa ne au* toku fakamaoni!+
6 Ka fakatumau ne au toku amiotonu kae ka se tuku tiaki eiloa ne au;+
Ka se taku fakamasei* au ne toku loto i te taimi e ola ei au.
7 Ke fai eiloa a toku fili e pelā mo te tino masei,
Ko latou kolā e ta ne latou au e pelā me se tino sē amiotonu.
8 Se a te fakamoemoega e maua ne te tagata masei* māfai ko fakaseai a ia,+
Māfai ko ave kea‵tea ne te Atua a tena ola?
9 E a, ka lagona ne te Atua tena tagi
Māfai ko oko atu te puapuaga ki a ia?+
10 Io me ka maua ne ia te fiafia i te Atua Malosi Katoatoa?
E a, ka kalaga atu a ia ki te Atua i taimi katoa?
11 Ka akoako ne au koutou e uiga ki te ‵mana* o te Atua;
Ka se ‵funa ne au se mea e uiga ki te Atua Malosi Katoatoa.
12 Kiloke! Kafai ne lavea ne koutou katoa a fakaasiga,
Kaia e seai ei ne aoga o otou fai‵patiga?
13 Tenei te vaega o te tagata masei mai te Atua,+
Ko te tofi e maua ne tino pule fakasaua mai i te Atua Malosi Katoatoa.
14 Kafai e tokouke ana tama tāgata, ka ‵mate latou i te pelu,+
Kae ko tino ne ‵tupu mai i a ia ka se lava olotou meakai.
15 A tino kolā ne ‵sao mai i a ia ka tanu e auala i se mala,
Kae ko olotou fāfine ko ‵mate olotou avaga ka se ‵tagi ki a latou.
16 Kafai e fakaputu ne ia a siliva e pelā me ne ‵pefu
Kae tausi a gatu ‵lei e pelā me ne kele,
17 E tiga eiloa e fakaputu mai ne ia a mea konā,
Ka pei eiloa ki ei a te tino amiotonu,+
Kae ko te tino e seai sena ‵se ka vaevae ne ia ana siliva.
18 A te fale e faite ne ia e vāivāi eiloa e pelā mo te fale o te kaveau,
E pelā me se fale fakamalumalu+ ne faite ne se tagata leoleo.
19 Ka takato a ia i tena moega mo te maumea kae ka seai ne ana mea e fakaputu;
Kafai e ‵pula aka ana mata, ko seai ne mea e ‵toe mai i ei.
20 Ka pule atu a te mataku ki a ia e pelā me se lofiaga;
Ka ave kea‵tea a ia ne se kaumatagi i te po.+
21 Ka ave a ia kea‵tea ne se matagi mai saegala ko galo atu ei a ia;
E ‵teu kea‵tea a ia ne te matagi mai tena koga.+