Esoto
11 Tenā ne fai atu ei a Ieova ki a Mose: “Toe tasi eiloa te mala ka avatu ne au ki luga i te Falao mo Aikupito. Ka oti, ko uga atu ei ne ia a koutou ke olo kea‵tea mai i konei.+ I te taimi e uga atu ei ne ia koutou ke olo, ka afuli ne ia koutou kea‵tea mai i konei.+ 2 Nei la, fai atu ki tino me e ‵tau mo tāgata mo fāfine katoa o fakamolemole atu ki olotou tuakoi ke avatu ma latou a mea e faite ki siliva mo mea e faite ki aulo.”+ 3 Kae ne fai ne Ieova ke fia‵fia a tino Aikupito ki tino Isalaelu. E se gata i ei, ne takutakua malosi a Mose i te fenua o Aikupito, i mata o tavini a te Falao e pelā foki mo tino katoa.
4 Tenā ne fai atu ei a Mose: “Konei a pati a Ieova ne fai mai, ‘Au ka fano ki loto i Aikupito i te valuapo,+ 5 kae ko toekimua katoa i te fenua o Aikupito ka ‵mate,+ mai te toekimua a te Falao telā e sagasaga i luga i tena nofogaaliki ke oko ki te toekimua a te pologa fafine telā e galue i te koga tuki saito, e pelā foki mo toekimua katoa a lafu manu.+ 6 Ka ‵tagi paka‵laga a tino i te fenua kātoa o Aikupito, se mea telā e seki tupu aka eiloa i aso mua kae ka se toe tupu eiloa fakamuli.+ 7 Kae ka seai eiloa se kuli e tagi* ki se tino Isalaelu, ki tāgata io me ko olotou lafu manu, ko te mea ke iloa ne koutou me e mafai ne Ieova o faka‵kese a tino Aikupito mo tino Isalaelu.’+ 8 Kae ko au tavini katoa ka o‵mai ki a au o ifo ki lalo i a au, kae fai mai, ‘Olo, ko koe mo tino konā e tau‵tali atu i a koe.’+ Ka oti, ko fano ei au ki tua.” Tenā ne fano ei a ia ki tua mai i te Falao mo te kaitaua lasi.
9 Tenā ne fai atu ei a Ieova ki a Mose: “A te Falao ka se fakalogo atu eiloa ki a koutou,+ ko te mea ke fai ne au aku vavega e uke i te fenua o Aikupito.”+ 10 Ne fai ne Mose mo Alona a vavega katoa konei i mua o te Falao,+ kae ne talia ne Ieova a te loto o te Falao ke makeke, ko te mea ke se uga atu ne ia a tino Isalaelu ke olo kea‵tea mai tena fenua.+