Esoto

10 Tenā ne fai atu ei a Ieova ki a Mose: “Fano ki loto i te Falao, me ko oti ne talia ne au tena loto mo loto o ana tavini ke ma‵keke,+ ko te mea ke fakaasi atu ne au a fakailoga konei i ana mua eiloa,+ 2 ko te mea foki ke fakailoa atu ne koe ki au tama tāgata mo ou mokopuna tāgata a faifaiga ‵mafa ne fai ne au i Aikupito mo fakailoga kolā ne fai ne au i loto i ei;+ kae ka iloa ei ne koutou i a au ko Ieova.”

3 Ne olo a Mose mo Alona ki loto i te Falao kae fai atu ki a ia: “Konei a pati a Ieova te Atua o tino Epelu ne fai mai, ‘Ka pefea te leva e ita ei koe ma fakalogo mai ki a au?+ Uga atu oku tino ke olo ko te mea ke tavini mai latou ki a au. 4 Kafai e tumau eiloa koe i te ita ma uga atu oku tino ke olo, ka aumai ne au a seakelise mai loto eiloa i te otou fenua ma taeao. 5 Ka ufi ne latou a te lalolagi kae ka se mafai o matea te laukele. Ka kai ne latou a mea kolā ne ‵sao mai i te vaiua fatu mō koutou, kae ka kai ne latou otou lakau katoa kolā e ola i te vao.+ 6 Ka ‵fonu otou fale i ei, ko fale o au tavini katoa mo fale katoa i Aikupito ki se tulaga telā e seki lavea aka eiloa ne otou tamana mo otou tupuna talu mai te taimi ne ‵nofo ei latou i te fenua tenei ke oko mai eiloa ki te aso nei.’”+ Oti aka, fano ei a ia ki tua mai i te Falao.

7 Tenā ne fai atu ei a tavini a te Falao ki a ia: “Ka pefea te leva e fakamatakutaku ei* tatou ne te tagata tenei? Uga atu a tāgata konā ke olo ko te mea ke tavini atu latou ki a Ieova te lotou Atua. E a, e seki matea ne koe me ko oti ne fakamaseigina a Aikupito?” 8 Ne toe aumai a Mose mo Alona ki te Falao, kae ne fai atu a ia ki a lāua: “Olo o tavini atu ki a Ieova te otou Atua. Kae ko oi la a tino ka olo?” 9 Tenā ne fai atu ei a Mose: “Ka olo atu matou mo omotou tama‵liki, omotou tino ma‵tua, omotou tama tāgata, omotou tama fāfine, omotou mamoe mo omotou pulumakau,+ me ka fai ne matou se ‵kaiga fiafia ki a Ieova.”+ 10 Ana muna ki a lāua: “Kafai e uga atu ne au koutou mo otou tama‵liki ke olo, ko tena uiga ko fakatasi atu eiloa a Ieova ki a koutou!+ E manino ‵lei me isi se mea matagā e ma‵nako koutou o fai. 11 Ikai! Ko otou tāgata fua e mafai o olo o tavini ki a Ieova, me tenā eiloa te mea ne fakatagi mai koutou ki ei.” Tenā ne afuli ei lāua ki tua mai i te Falao.

12 I konā loa ne fai atu a Ieova ki a Mose: “‵Fola tou lima ki luga i te fenua o Aikupito ke o‵mai a seakelise, ko te mea ke o‵mai a manu konā ki luga i te fenua o Aikupito o kai a lakau katoa i te fenua, ko mea katoa kolā ne ‵toe mai i te vaiua fatu.” 13 Ne ‵fola fakavave atu ne Mose tena tokotoko ki luga i te fenua o Aikupito kae ne fai ne Ieova ke agi mai se matagi mai te saegala ki luga i te fenua i te aso kātoa mo te po kātoa tenā. Ne oko atu ki te tafataeao kae ne aumai ne te matagi mai te saegala a seakelise. 14 Ne olo atu a seakelise ki luga i te fenua kātoa o Aikupito kae ‵nofo i luga i ei.+ Ne masei ‵ki eiloa te tulaga tenā;+ ne seki uke eiloa penei a seakelise, kae ka se toe uke eiloa penā fakamuli. 15 Ne ufi ne latou te fenua kātoa, kae ne pouli te fenua ona ko manu konā; ne kai ne latou a lakau katoa i luga i te fenua mo fuagalakau katoa i luga i lakau kolā ne ‵toe mai i te vaiua fatu; e seai eiloa se lau o se lakau e tasi ne ‵toe, ke oko foki eiloa ki lakau o te vao i te fenua kātoa o Aikupito.

16 Ne kalaga fakavave atu a te Falao ki a Mose mo Alona kae fai atu: “Au ko oti ne agasala ki a Ieova te otou Atua e pelā foki ki a koutou. 17 Nei la, fakamolemole fakamagalo mai taku agasala i te taimi tenei, kae fakatagi atu ki a Ieova te otou Atua ke tapale aka kea‵tea a te mala fakamataku tenei mai luga i a au.” 18 Ne fano kea‵tea a ia* mai i te Falao kae fakatagi atu ki a Ieova.+ 19 Tenā ne fai ei ne Ieova ke mafuli te matagi, kae ne agi malosi mai i te feitu ki togala, kae ne ave kea‵tea i ei a seakelise ki loto i te Tai Kula. E seai eiloa se seakelise e tasi ne ‵toe i te kogā fenua kātoa o Aikupito. 20 Kae ne talia ne Ieova ke makeke te loto o te Falao,+ tenā ne seki uga atu ei ne ia a tino Isalaelu ke olo.

21 Tenā ne fai atu ei a Ieova ki a Mose: “Sisi aka tou lima ki te lagi ko te mea ke pouli te fenua kātoa o Aikupito​—se matugā pouliga lasi eiloa.” 22 Ne sisi fakavave aka te lima o Mose ki te lagi, kae ne oko atu ei se matugā pouliga lasi ki luga i te fenua kātoa o Aikupito i aso e tolu.+ 23 Ne seki mafai o lavea ne te suā tino a te suā tino, kae e seai se tino ne tu aka ki luga mai te koga ne ‵nofo i ei latou i aso e tolu; kae ko tino Isalaelu katoa ne maina olotou koga ‵nofo.+ 24 Tenā ne kalaga atu ei te Falao ki a Mose kae fai atu: “Olo o tavini atu ki a Ieova.+ Ko otou mamoe fua mo otou pulumakau ke tuku. E mafai o olo koutou mo otou tama‵liki.” 25 Kae ne fai atu a Mose: “Ko koe eiloa ka tuku mai ne koe ki a matou* a manu mo fai a taulaga mo taulaga ‵sunu, kae ka ofo atu ne matou a mea konā ki a Ieova te motou Atua.+ 26 Ka olo foki matou mo omotou lafu manu. E seai eiloa se manu* e talia ke tuku, me ka fakaaoga ne matou a nisi manu i ei ke tapuaki atu ki a Ieova te motou Atua, kae e se iloa ne matou a mea ka ofo atu ne matou i te motou tapuakiga ki a Ieova seiloga ke oko atu matou ki te koga tenā.” 27 Ne talia ne Ieova a te loto o te Falao ke makeke, tenā ne seki lotomalie ei a ia ke uga atu a latou ke olo.+ 28 Muna a te Falao ki a ia: “Fano kea‵tea mai i a au! Ke mo a eiloa ma toe matea ne koe oku mata, me i te aso e toe matea ei ne koe au, a koe ka mate eiloa.” 29 Ne fai atu a Mose: “E pelā eiloa mo au pati, ka se toe taumafai au ke matea ne au ou mata.”