Esoto

19 I te aso eiloa ne kātoa ki ei te tolu o masina ne tiakina ei ne tino Isalaelu a te fenua o Aikupito, kae oko atu latou ki te koga lavaki o Sinai. 2 Ne tiaki ne latou a Lefiti+ kae oko atu ki te koga lavaki o Sinai, ‵nofo ei latou i konā i te koga lavaki. Ne ‵nofo a tino Isalaelu i konā i mua o te mauga.+

3 Tenā ne fanaka ei a Mose ki te Atua tonu, kae kalaga atu a Ieova ki a ia mai luga i te mauga,+ ana muna: “Konei au pati e ‵tau o fai atu ki te kāiga o Iakopo mo tino Isalaelu, 4 ‘Ko oti ne lavea ne koutou a mea ne fai ne au ki tino Aikupito,+ ko te mea ke ave koutou i luga i kapakau o aeto kae aumai koutou ki a au.+ 5 Nei la, kafai e faka‵logo faka‵lei koutou ki toku leo kae tausi taku feagaiga, ka fai eiloa koutou mo oku tino fakapito* mai tino katoa,+ me i te lalolagi kātoa i o oku.+ 6 Ka fai a koutou mo fai se malo o faitaulaga mo se fenua tapu+ ki a au.’ Konei a pati e ‵tau o fai atu ne koe ki tino Isalaelu.”

7 Ne fanatu a Mose o fakamaopoopo mai a toeaina o te fenua kae fakailoa atu ki a latou a pati katoa kolā ne fakatonu atu ne Ieova ki a ia.+ 8 Oti aka, ne tali fakatasi mai a tino katoa: “A matou e loto fia‵fia o fai a mea katoa konā ne fai mai ne Ieova.”+ I konā eiloa, fakailoa atu ei ne Mose a te tali a tino ki a Ieova. 9 Kae ne fai atu a Ieova ki a Mose: “Kiloke! Au ka vau ki a koe i se kaumana pouli, ke lagona ne tino māfai au e faipati atu ki a koe, ko te mea ke tali‵tonu faeloa latou ki a koe.” Tenā ne fakailoa atu ei ne Mose a pati a tino ki a Ieova.

10 Ne fai atu a Ieova ki a Mose: “Fano ki tino konā kae fakatapu latou i te aso nei mo te aso taeao, kae e ‵tau o ‵ta ne latou olotou gatu. 11 Kae e ‵tau o toka latou mō te tolu o aso, me i te tolu o aso ka fanaifo ei a Ieova ki luga i te mauga o Sinai kae ka lavea a ia ne tino katoa. 12 E ‵tau o fakasino ne koe a tuakoi o tino i tafa o te mauga kātoa kae fai atu ki a latou, ‘Fakaeteete ke mo a ma olo aka koutou ki luga i te mauga io me fakapa‵tele atu ki ana tuakoi. So se tino e fakapatele ki te mauga ka tamate eiloa. 13 E seai se lima e ‵tau o patele atu ki a ia, me ka peipei eiloa a ia ki fatu io me sana ki se matasana. Faitalia me se manu io me se tino, ka tamate eiloa a ia.’+ Kae kafai ko tagi te pu*+ ko mafai ei o olo aka latou ki luga i te mauga.”

14 Tenā ne fanaifo ei a Mose mai te mauga ki ana tino, kae ne kamata o fakatapu ne ia a tino, kae ne ‵ta ne latou olotou gatu.+ 15 Ne fai atu a ia ki tino: “Fakatoka mō te tolu o aso. ‵Kalo kea‵tea mai faifaiga fakatauavaga.”*

16 I te tafataeao o te tolu o aso ne ‵pa a fa‵tili kae ‵lapa a uila, kae isi se kaumana matolu+ i luga i te mauga mo te maluga o te ‵tagi o te pu, kae ne kamata o pole‵pole a tino katoa i te ma‵taku.+ 17 Ne aumai ne Mose a tino mai te lotou koga ‵nofo ke fakafetaui atu ki te Atua tonu, kae ne ‵tu atu latou i olotou tulaga i te tafito o te mauga. 18 Ne ‵fonu te mauga o Sinai i te au, me ne fanaifo a Ieova ki luga i ei i loto i te afi;+ kae ne fanaka eiloa te au ki luga e pelā mo te au o se ogaumu tao puliki, kae ne galulu malosi+ te mauga kātoa. 19 I te taimi ne gasolo aka ei o maluga atu te ‵tagi o te pu, ne faipati atu a Mose, kae ne tali mai ki a ia te leo o te Atua tonu.

20 Ne fanaifo a Ieova ki te Mauga o Sinai i te taulu o te mauga. Tenā ne kalaga atu ei a Ieova ki a Mose ke fanaka ki te taulu o te mauga, fanaka ei a Mose.+ 21 Ne fai atu a Ieova ki a Mose: “Fanaifo ki lalo kae fakailoa atu ki tino ke mo a ma taumafai o olo aka ki luga ke lavea ne latou a Ieova, me e tokouke a tino ka ‵mate i ei. 22 Kae fai ki faitaulaga kolā e o‵mai sāle ki tafa o Ieova ke fakatapu latou, ko te mea ke se ‵ta+ latou ne Ieova.” 23 Tenā ne fai atu ei a Mose ki a Ieova: “E se mafai ne tino o olo aka ki te mauga o Sinai me ko leva ne fakailoa mai ne koe ki a matou, ‘Fakasino a tuakoi i tafa o te mauga kātoa kae fakatapu.’”+ 24 Kae ne fai atu a Ieova ki a ia: “Fanaifo ki lalo, kae toe foki mai ki luga, ko koe fakatasi mo Alona, kae ke mo a eiloa e taumafai a faitaulaga mo tino o olo aka ki luga i a Ieova, ko te mea ke mo a ma ‵ta+ ne ia latou.” 25 Ne fanaifo eiloa a Mose ki lalo kae fakailoa atu ki tino a pati konā.