Esoto

21 “Konei a ikuga o fakamasinoga e ‵tau o fakaoko+ atu ne koe ki a latou:

2 “Kafai e ‵togi mai ne koe se pologa Epelu,+ ka tavini atu a ia e pelā me se pologa i tausaga e ono, kae i te fitu o tausaga ka fakasaoloto ei a ia e aunoa mo se ‵togi.+ 3 Kafai ne vau a ia i a ia eiloa, ka fano a ia i a ia eiloa. Kafai e isi sena avaga, a tena avaga e ‵tau o olo fakatasi mo ia. 4 Kafai ne tuku atu ne tena matai se avaga ma ia kae ko isi ne ana tama tāgata io me ne tama fāfine, ka fai eiloa a tena avaga mo ana tama‵liki ma tena matai, kae ka fano fua a ia tokotasi.+ 5 Kae kafai e fakamolemole mai faeloa a te pologa, ‘Au e alofa ki toku matai, taku avaga mo aku tama‵liki; au e se manako ke saoloto au,’+ 6 e ‵tau o avatu ne tena matai a ia ki mua o te Atua tonu. Tenā ko fakatu ei a ia i tafa o te mataloa io me se pou o te mataloa, kae ka fakapu ne tena matai a tena taliga ki se mea fakapu taliga, kae ka fai tou tagata mo fai tena pologa i tena olaga kātoa.

7 “Kafai e fakatau atu ne se tagata a tena tama fafine mō fai se pologa, ka se fakasaoloto a tou fafine e pelā mo te auala e fakasaoloto ei a pologa tāgata. 8 Kafai e se fiafia a tena matai ki tou fafine kae e se fai foki ne ia mo fai sena avaga fakasalasala, kae talia ne ia ke fakatau atu ki se isi tino,* e se ‵tau o fakatau atu ne ia tou fafine ki tino mai fenua fakaa‵tea, me ko oti ne fakatogafiti ne ia tou fafine. 9 Kafai e filifili ne ia tou fafine mo fai te avaga a tena tama tagata, e ‵tau o fai ne ia e pelā eiloa me sena tamaliki fafine. 10 Kafai e fai ne te tama tagata a tena suā avaga, e se ‵tau o fakatamala a ia i te tausiga o tena avaga mua ki meakai, gatu mo mea kolā e ‵tau+ o maua ne ia e pelā me se avaga. 11 Kafai e se fai ne ia a mea e tolu konei ki tou fafine, ko ‵tau ei o fakasaoloto a ia e aunoa mo se ‵togi.

12 “So se tino e ta ne ia se tagata kae mate, e ‵tau a ia o tamate.+ 13 Kafai ne fai ne ia i se auala e seki fakamoemoegina, kae talia ne te Atua ke tupu te mea tenā, ka fakatoka ne au se koga ke tele+ a ia o lafi ki ei. 14 Kafai e kaitaua malosi se tagata ki tena tuakoi kae tamate ne ia,+ e ‵tau o tamate a te tagata tenā, faitalia me tele a ia ki taku fatafaitaulaga+ ke maua ne ia i ei se puipuiga. 15 A te tino e ta ne ia tena tamana io me ko tena mātua e ‵tau o tamate.+

16 “Kafai e kaisoa ne se tino se tagata+ kae fakatau atu ne ia, io me ‵poa atu te tagata tenā i a ia,+ e ‵tau a ia o tamate.+

17 “So se tino e fetū* ne ia tena tamana io me ko tena mātua e ‵tau o tamate.+

18 “Tenei te mea e ‵tau o fai māfai e kinau ne tāgata kae ‵pago ne te suā tino a tena tuakoi ki se fatu io me fusu* kae e se mate, kae ko moe fua i tena moega: 19 Kafai e mafai ne ia o tu ki luga kae sasale ki tua mo tena tokotoko, ko se ‵tau ei o fakasala a te tino telā ne ‵pago ne ia a ia. Ka taui fua ne ia te taimi e se galue ei te tagata pakia tenā ke oko ki te taimi ko ‵lei ei a ia.

20 “Kafai e ‵pago ne se tagata tena pologa tagata io me ko tena pologa fafine ki se lakau kae mate, a te tagata tenā e ‵tau o fakasala.+ 21 Kae kafai e ola a te tino tenā i se aso e tasi io me lua, e se ‵tau o fakasala a te tagata tenā me i te tino tenā ne ‵togi ne ia ki ana tupe.

22 “Kafai e ‵fusu ne tāgata kae pakia i ei se fafine faitama kae tō*+ tena tama kae e se mate,* e ‵tau o toe ‵togi atu ne te tino telā e ‵se a mea kolā ne fakamasei e ‵tusa mo mea kolā e fai mai ne te avaga a te fafine tenā; kae e ‵tau o ‵togi ne ia e auala i famasino.+ 23 Kafai e mate se tino, ko ‵tau ei mo koe o sui te ola ki te ola,+ 24 te mata ki te mata, te nifo ki te nifo, te lima ki te lima, te vae ki te vae,+ 25 te ‵paku ki te ‵paku, te pakia ki te pakia, te fusu ki te fusu.

26 “Kafai ne ‵kini ne se tagata a te mata o tena pologa tagata io me ko te mata o tena pologa fafine kae pakia malosi, e ‵tau o fakasaoloto ne ia te pologa ke fano ke taui ki ei tena mata.+ 27 Kae kafai e fusu ne ia te nifo o tena pologa tagata io me ko te nifo o tena pologa fafine ke tō, e ‵tau o fakasaoloto ne ia te pologa ke fano ke taui ki ei a tena nifo.

28 “Kafai e ‵tui ne se pulumakau tagata se tagata io me se fafine ki tena sau kae mate,+ e ‵tau o peipei a te pulumakau ki fatu ke mate kae e se ‵tau o kai ana ‵kano; ko se fakasala ei a te tino i a ia te pulumakau tenā. 29 Kae kafai e masani o ‵tui ne se pulumakau tagata a tino ki tena sau kae ko oti ne fakailoa atu a te mea tenā ki te tino i a ia te pulumakau, kae e se tausi faka‵lei ne ia, kae ne mate i ei se tagata io me se fafine, e ‵tau o peipei a te pulumakau tenā ki fatu ke mate, kae e ‵tau foki o tamate a te tino i a ia te pulumakau. 30 Kafai e isi se ‵togi* ne fai ke ‵togi ne ia, e ‵tau o tuku atu ne ia e pelā me ko te ‵togi o tena ola a mea katoa kolā ne fakatonu atu ke ‵togi ne ia. 31 Faitalia me ne ‵tui ne ia se tamaliki tagata io me se tamaliki fafine, e ‵tau o fai a te mea tenā ki te tino i a ia te pulumakau tagata e ‵tusa eiloa mo te ikuga o fakamasinoga. 32 Kafai ne ‵tui ne te pulumakau tagata se pologa tagata io me se pologa fafine, e ‵tau o ‵togi atu ne ia te 30 sekela* ki te matai o te pologa, ko peipei ei a te pulumakau ki fatu ke mate.

33 “Kafai e ‵suke io me keli ne se tagata se lua kae e se ‵pono ne ia, kae tō atu se pulumakau tagata io me se asini ki loto i ei, 34 e ‵tau o taui ne te tino i a ia te lua a te mea tenā.+ E ‵tau o ‵togi atu ne ia te ‵togi o te mea tenā ki te tino i a ia te manu, kae puke ma ia a te manu telā ko mate. 35 Kafai ne fakapakia ne se pulumakau tagata a se tino a te pulumakau tagata a te suā tino kae mate, e ‵tau o fakatau atu ne lāua a te pulumakau tagata telā e ola ko vaelua ei i a lāua a te ‵togi o te pulumakau; e ‵tau foki o vaelua i a lāua a te manu telā ko mate. 36 Io me kafai ko iloa ne tino me e masani o ‵tui ne se pulumakau tagata a manu ki tena sau kae e se tausi faka‵lei ne te tino i a ia te manu, e ‵tau o taui ne ia a te pulumakau tagata ki te pulumakau tagata, kae ka puke ma ia te pulumakau telā ko mate.