Esoto
22 “Kafai ne kaisoa ne se tagata se pulumakau tagata io me se mamoe kae tamate io me fakatau atu ne ia, e ‵tau o sui ne ia a te pulumakau tagata ki pulumakau tāgata e lima, kae ko te mamoe ki mamoe e fa.+
2 (“Kafai e ‵poa aka se tino kaisoa+ e kaisoa ne ia a mea i loto i se fale kae ta a ia i ei mea loa ko mate, e se ‵tau o fakasala te tino ne tamate ne ia te tino kaisoa. 3 Kae kafai e tupu te mea tenei i te taimi ko oti ei ne sae aka te mata o te la, e ‵tau o fakasala te tino ne tamate ne ia te tino kaisoa.)
“E ‵tau mo ia o sui a mea ne kaisoa ne ia. Kafai e seai ne ana mea, e ‵tau mo ia o fakatau atu a ia ki tua ke sui ei ana mea ne kaisoa. 4 Kafai e maua atu i a ia a manu ne kaisoa ne ia kae koi ola a manu konā, faitalia me se pulumakau tagata io me se asini io me se mamoe, e ‵tau o sui fakalua ne ia a manu konā.
5 “Kafai e avatu ne se tagata ana manu ke kai‵kai i se malae io me se togavine, kae tuku atu foki ne ia ke kai‵kai i te malae o te suā tino, e ‵tau o sui ne ia a mea konā ki toe mea ‵lei mai tena malae io me ko toe mea ‵lei mai tena togavine.
6 “Kafai e ‵ka se afi kae ‵solo atu ki koga e ola ei a lakau tala‵tala kae ‵ka i ei a fusigā saito io me ko saito kolā e seki ‵kati io me ko te fatoaga saito kātoa, e ‵tau o sui ne te tino ne faka‵ka ne ia te afi a mea katoa kolā ne ‵ka i ei.
7 “Kafai e tuku atu ne se tagata ne tupe io me ne mea ke tausi ne tena tuakoi kae ko kaisoa ne se tino a mea konā mai te fale o tena tuakoi, kafai ko maua te tino kaisoa, e ‵tau o sui fakalua+ ne ia a mea konā. 8 Kafai e se maua a te tino kaisoa, e ‵tau o aumai a te tino e o ia te fale ki mua o te Atua tonu+ ke fakamaoni aka me ne puke ne ia a mea a tena tuakoi io me ikai. 9 So se mea e nofo mo se tino kae e se i a ia, faitalia me se pulumakau tagata, se asini, se mamoe, se gatu, io me se mea ne galo kae fai mai a ia, ‘A te mea tenei i a aku!’ e ‵tau o avatu ne tino e tokolua konā a tagi a lāua ki te Atua tonu.+ A te tino telā e fai mai te Atua me e loi, e ‵tau o sui fakalua ne ia a mea a tena tuakoi.+
10 “Kafai e tuku atu ne se tagata se asini io me se pulumakau tagata io me se mamoe io me se manu fagai ki tena tuakoi ke tausi ne ia, kae e mate io me pakia io me e ave ‵muni ne se tino te manu tenā, 11 e ‵tau o fai se tautoga i te va o lāua i mua o Ieova, me ne seki puke ne ia a mea a tena tuakoi; kae e ‵tau o talia ne te tino i a ia te manu a te mea tenā. Ko seai ei se mea e ‵tau o sui+ ne te suā tagata. 12 Kae kafai ne kaisoa a te manu tenā mai i a ia, e ‵tau o sui ne ia te mea tenā ki te tino i a ia te manu. 13 Kafai ne saesae a te manu tenā ne se manu fekai, e ‵tau o avatu ne ia te manu mate tenā e pelā me se fakamaoniga. E se ‵tau o sui ne ia a te manu telā ne saesae ne se manu fekai.
14 “Kae kafai e fakamolemole atu se tino ke fakaaoga ne ia se manu a tena tuakoi i se taimi toetoe, kae pakia io me mate te manu tenā kae galo te tino i a ia te manu, e ‵tau o sui ne te tino ne fakaaoga ne ia a te manu tenā. 15 Kafai e nofo atu a te tino i a ia te manu i te taimi tenā, e se ‵tau o sui ne te tino ne fakaaoga ne ia a te manu tenā. Kafai ne ‵togi ke fakaaoga a te manu tenā i se taimi toetoe, ko lava loa i te tupe tenā ke sui ki ei a te manu tenā.
16 “Kafai e takolekole ne se tagata se tamafine telā e seki ‵sai feagaiga mo se tagata kae ‵moe mo tou fafine, e ‵tau o ‵togi ne ia te ‵togi o te tamafine ke fai mo fai tena avaga.+ 17 Kafai e ita fitifiti tena tamana ma tuku atu tou fafine ke avaga mo te tagata tenā, e ‵tau eiloa o ‵togi ne ia te aofaki tupe telā e ‵tau o ‵togi ki ei se tamafine.
18 “E se ‵tau o talia ne koe se fafine faivailakau ke ola.+
19 “So se tino e ‵moe mo se manu e ‵tau eiloa o tamate.+
20 “So se tino e ofo atu sena taulaga ki se isi atua kae e se ki a Ieova fua e tokotasi, e ‵tau eiloa o tamate.+
21 “E se ‵tau o fai fakamasei ne koutou se tino fakaa‵tea io me fakasaua atu ki a ia,+ me i a koutou ne ‵nofo foki e pelā me ne tino fakaa‵tea i te fenua o Aikupito.+
22 “E se ‵tau o fakapuapuaga ne koutou se fafine ko mate tena avaga io me ko te tamaliki ko seai sena tamana.*+ 23 Kafai e fakapuapuaga ne koe a ia kae tagi mai a ia ki a au, ka lagona eiloa ne au tena tagi;+ 24 kae ka kaitaua au, ko tamate ei ne au koutou ki te pelu, ko fai ei otou avaga mo fai ne fāfine ko ‵mate olotou avaga, kae ko otou tama‵liki ka seai ne olotou tamana.
25 “Kafai e tuku fakakaitalafu ne koe ne tupe ki oku tino ma‵tiva,* se tino telā e ‵nofo fakatasi mo koe, e se ‵tau o fai koe e pelā me se tino e fakakaitalafu tupe*—e se ‵tau o fakapasene+ ne koe te tupe tenā ki a ia.
26 “Kafai e puke ne koe se gatu o tou tuakoi ke puipui ki ei tena kaitalafu,*+ e ‵tau o fakafoki ne koe te gatu ki a ia māfai ko tō te mata o te la. 27 Me tenā fua tena gatu e tasi e pei a ia ki ei, ko tena gatu e kafu a ia* ki ei; kae ka moe a ia ki te a?+ Kafai e tagi mai a ia ki a au, ka lagona eiloa ne au tena tagi, me i a au e alofa atafai.*+
28 E se ‵tau o fakamalaia* ne koe a te Atua+ io me se takitaki* o koutou.+
29 “E se ‵tau o fakatalave koe i te ofoatuga o taulaga mai i au fuagalakau, sinu mo uaina e uke.+ E ‵tau o tuku mai ne koe a toekimua o au tama tāgata ki a au.+ 30 Tenei te mea e ‵tau o fai ne koe ki tau pulumakau tagata mo tau mamoe:+ E ‵tau o ‵nofo mo tena mātua i aso e fitu. Kae i te valu o aso ko tuku mai ei ne koe ki a au.+
31 “E ‵tau o fai koutou mo fai oku tino tapu,+ kae e se ‵tau o ‵kai koutou ki ‵kano o se manu i te vao telā ne saesae ne se manu fekai.+ E ‵tau o ‵pei atu ne koutou ki kuli.