Esoto
24 Tenā ne fai atu ei a ia ki a Mose: “Olo aka ki a Ieova, ko koe mo Alona, Natapu mo Apiu+ mo toeaina e toko 70 mai tino Isalaelu, kae ifo mai i se koga tai ‵mao. 2 Ko Mose fua e ‵tau o fanatu ki a Ieova; kae e se ko nisi tino, e se ‵tau o olo aka a tino fakatasi mo ia.”+
3 Tenā ne fanaifo ei a Mose kae fai atu ki tino a pati katoa ne fai mai ne Ieova mo ikuga o fakamasinoga katoa,+ kae ne tali atu a tino katoa i se leo e tasi: “A matou e loto fia‵fia+ o fai a pati katoa konā ne fai mai ne Ieova.” 4 Ne tusi ki lalo ne Mose a pati katoa a Ieova.+ Tenā ne ala aka a ia i te tafataeao ‵malu kae faite i te tafito o te mauga se fatafaitaulaga mo pou e 12 ke fetaui mo matakāiga e 12 o Isalaelu. 5 Oti aka, uga atu ei ne ia a tamataene Isalaelu ke ofo atu ne latou a taulaga ‵sunu kae ofo atu a pulumakau tāgata e pelā me ne taulaga ‵kai fakatasi+ ki a Ieova. 6 Tenā ne puke ei ne Mose te āfa o toto konā kae tuku atu ki loto i pōla, kae ko te suā āfa ne fakamatulutulu ne ia ki luga i te fatafaitaulaga. 7 Ne puke ne ia te tusi o te feagaiga kae faitau atu ki tino i se leo maluga.+ Kae ne fai atu a latou: “A matou e loto fia‵fia o fai a pati katoa konā ne fai mai ne Ieova, kae ka faka‵logo+ matou ki ei.” 8 Ne puke ne Mose a toto kae fakamatulutulu atu ki luga i tino+ kae fai atu: “Tenei te toto o te feagaiga telā ne fai ne Ieova mo koutou e ‵tusa mo pati katoa konei.”+
9 Ne olo aka a Mose mo Alona, Natapu mo Apiu, mo toeaina e toko 70 o Isalaelu ki luga i te mauga, 10 kae ne lavea ne latou te Atua o Isalaelu.+ Mai i lalo i ana vae e isi se mea e foliga mai e pelā me se fola e fai ki fatu ko safaila, kae e ‵ma pakipaki eiloa e pelā mo te lagi.+ 11 Ne seki fai fakamasei ne ia a tāgata lauiloa o Isalaelu,+ kae ne lavea ne latou se fakaasiga e uiga ki te Atua tonu kae ne ‵kai kae inu foki latou.
12 Ne fai atu a Ieova ki a Mose: “Vau ki a au i luga i te mauga kae nofo malie i konei. Ka tuku atu ne au ki a koe a papa fatu kolā ka tusi ne au i ei a tulafono mo fakatonuga ke akoako ei latou.”+ 13 Ne ‵tu aka a Mose mo tena tino fesoasoani ko Iosua+ kae ne fanaka a Mose ki luga i te mauga o te Atua tonu.+ 14 Kae ne fai atu a ia ki toeaina: “Faka‵tali i konei ke ‵foki mai māua ki a koutou.+ Konā a Alona mo Hulo+ e ‵nofo fakatasi koutou. So se tino e isi sena tagi e mafai o fanatu ki a lāua.”+ 15 Tenā ne fanaka ei a Mose ki luga i te mauga telā ko ufi ne te kaumana.+
16 Ne tumau eiloa te ‵malu o Ieova+ i luga i te mauga o Sinai,+ kae ne ufi ne te kaumana a te mauga i aso e ono. I te fitu o aso ne kalaga atu a ia ki a Mose mai te kaumana. 17 Ki tino Isalaelu kolā ne kilo‵kilo atu ki ei, a te saemaiga o te ‵malu o Ieova ne fai pelā me se afi e ‵ka i luga i te taulu o te mauga. 18 Tenā ne ulu atu ei a Mose ki loto i te kaumana kae fanaka ki luga i te mauga.+ Ne nofo atu a Mose i luga i te mauga i ao e 40 mo po e 40.+