Esoto

23 “E se ‵tau mo koe o fakasalalau* se tala sē tonu.+ Sa kau ki se tino masei mai te fai mo fai se molimau ‵pelo.+ 2 E se ‵tau mo koe o tautali i te tokoukega o tino ke fai se mea masei, e se ‵tau o ‵fuli ne koe se fakamasinoga tonu mai te faiatuga o se molimau ke fia‵fia ki ei a te tokoukega o tino.* 3 E se ‵tau mo koe o fakailoga tino māfai e isi se tagi a se tino mativa.+

4 “Kafai e fetaui koe mo te pulumakau tagata io me se asini a tou fili telā ne takasēsē atu kea‵tea, e ‵tau o fakafoki ne koe te manu tenā ki a ia.+ 5 Kafai e lavea ne koe te asini a te tino telā e takalialia ki a koe e siga i lalo mo tena amoga, e se ‵tau o fulitua koe ki ei o fano. E ‵tau o fesoasoani atu koe ki a ia ke ave kea‵tea te amoga tenā.+

6 “E se ‵tau mo koe o ‵fuli a te fakaikuga tonu ne fai ki te tagi a se tino mativa i a koutou.+

7 “Ke mo a eiloa ma aofia koe i ‵losiga ‵se, kae ke mo a ma tamate ne koe a tino e seai ne olotou ‵se mo tino amio‵tonu, me ka se taku ne au a tino amio ma‵sei e pelā me ne tino amio‵tonu.*+

8 “E se ‵tau o talia ne koe se ‵togi fakakolekole, me i te ‵togi fakakolekole e faka‵kivi ne ia a mata o te tino kae e mafai o ‵fuli fakakotua i ei a pati a tino amio‵tonu.+

9 “E se ‵tau mo koe o fakapuapuaga se tino fakaa‵tea. E iloa ne koutou a lagonaga o te tino fakaa‵tea,* me ne ‵nofo koutou e pelā me ne tino fakaa‵tea i te fenua o Aikupito.+

10 “E ‵tau o ‵toki ne koe ou laukele ki fuaga kae tau ana fuataga i loto i tausaga e ono.+ 11 Kae i te fitu o tausaga e seai ne galuega e ‵tau o fai ki ei kae e ‵tau fua o tuku penā, kae ko tino ma‵tiva konā e ‵nofo fakatasi koutou ka ‵kai mai i ei, kae ko mea e tiaki ne latou, ka kai ne manu fe‵kai o te vao. Tenā te mea e ‵tau o fai ne koe ki tau togavine mo tau togaolive.

12 “E ‵tau o galue koe i aso e ono; kae i te fitu o aso ko ‵tau o taofi au galuega katoa, ko te mea ke mafai o malō‵lo tau pulumakau tagata mo tau asini, kae ke maua ne te tama tagata a tau tavini fafine mo te tino fakaa‵tea se malosi fou.+

13 “E ‵tau o fakaeteete koutou o fai a mea katoa ne fai atu ne au ki a koutou,+ kae e se ‵tau o takutaku ne koutou a igoa o nisi atua; e se ‵tau eiloa o lagona atu i otou laugutu.*+

14 “E tolu taimi i te tausaga e ‵tau ei o fakamanatu ne koe se ‵kaiga fiafia ki a au.+ 15 Ka fakamanatu ne koe a te ‵Kaiga Fiafia o Falaoa sē Faka‵fete.+ Ka kai koe ki falaoa sē faka‵fete i aso e fitu, e pelā eiloa mo taku fakatonuga ki a koe i te taimi tonu i te masina o Apipa,*+ me tenā te taimi ne vau ei koe ki tua mo Aikupito. E seai eiloa se tino e ‵tau o vau ki oku mua e aunoa mo ne mea i ana lima.+ 16 E ‵tau foki o fakamanatu ne koe a te ‵Kaiga Fiafia o te ‵Tauga o Fuataga* muamua o au galuega kolā ko ma‵tua, ko mea kolā ne ‵toki ne koe i te fatoaga;+ mo te ‵Kaiga Fiafia o te Fakamaopoopomaiga o Fuataga* i te fakaotiga o te tausaga, ko te taimi telā ka fakamaopoopo mai ei ne koe mai te fatoaga a fuataga o au galuega.+ 17 E tolu taimi i te tausaga e ‵tau ei o ‵tu atu otou tāgata katoa i mua o te Aliki tonu, ko Ieova.+

18 “E se ‵tau mo koe o ofo atu te toto o taku taulaga fakatasi mo so se mea faka‵fete. Kae ko taulaga gako kolā e ofo atu i aku ‵kaiga fia‵fia, e se ‵tau o tuku i konā i te po kātoa ke oko ki te tafataeao.

19 “E ‵tau o aumai ne koe a te ‵toe fuataga ‵lei o fuataga ma‵tua muamua mai tau fatoaga ki te fale o Ieova tou Atua.+

“E se ‵tau mo koe o saka se tamā kouti ki vai ū o tena mātua.+

20 “Ka uga atu ne au se agelu ke fano i ou mua+ o puipui koe i te auala kae ke aumai ne ia koe ki te koga telā ko oti ne fakatoka ne au.+ 21 Saga tonu atu ki a ia kae fakalogo ki tena leo. Ke mo a ma ‵teke ki a ia, me ka se fakamagalo ne ia otou amioga solitulafono,+ me e fanatu a ia i toku igoa. 22 Kae kafai e fakalogo faka‵lei koe ki tena leo kae fai a mea katoa e fai atu ne au, ka fakaasi atu ne au toku ita ki ou fili kae ‵teke atu ki tino kolā e ‵teke atu ki a koe. 23 Me i taku agelu ka fanatu i ou mua kae ka aumai ne ia koe ki tino Amoli, tino Heti, tino Pelise, tino Kanana, tino Hivi mo tino Iepuse, kae ka fakaseai ne au a latou.+ 24 E se ‵tau mo koe o ifo ki olotou atua io me takolekolegina ke tapuaki atu ki a latou, kae e se ‵tau mo koe o fakaakoako ki olotou mea e fai.+ I lō te fai penā, e ‵tau o fakaseai ne koe latou kae ofa ki lalo olotou pou fatu tapu.+ 25 E ‵tau mo koutou o tavini atu ki a Ieova te otou Atua,+ kae ka fakamanuia ne ia otou meakai mo meainu.+ Ka ave kea‵tea ne au a masaki mai i a koutou.+ 26 Ka seai se fafine i te otou fenua e lele sena tama io me e se fanafanau,+ ka fai ne au koe ke ola leva.*

27 “Koi tuai o lavea ne latou a koe kae ko leva ne ‵logo latou e uiga ki a au kae ka pole‵pole i te ma‵taku,+ kae ka fai ne au a tino katoa kolā e fe‵paki mo koe ke ‵numi valevale, kae ka fai ne au ou fili katoa ke ‵tele kea‵tea mai i a koe me ko taka‵vale.*+ 28 Kae ka fai ne au ke ma‵taku a tino kae koi tuai o oko atu koutou,+ kae ka afuli kea‵tea a tino Hivi, tino Kanana mo tino Heti mai i otou mua.+ 29 Ka se afuli ne au latou kea‵tea mai i otou mua i se tausaga e tasi, ko te mea ke se lavaki te fenua kae fakauke aka i ei a manu fe‵kai o te vao kolā ka mafai o ‵ta ne latou a koutou.+ 30 Ka afuli malielie ne au a latou kea‵tea mai i otou mua ke oko ki te taimi ko tokouke ei koutou kae ko ‵nofo tumau foki koutou i te fenua.+

31 “Ka fakasino ne au tou tuakoi mai te Tai Kula ke oko atu ki te Tai Metitilani,* kae mai te koga lavaki ke oko ki te Vaitafe;*+ me ka tuku atu ne au a tino o te fenua ki otou lima, kae ka afuli ne koe latou kea‵tea mai i otou mua.+ 32 E se ‵tau mo koe o fai se feagaiga mo latou io me ko olotou atua.+ 33 E se ‵tau o ‵nofo latou i tou fenua i te mea ma fai ne latou koe ke agasala mai ki a au. Kafai e tavini atu koe ki olotou atua, ka fai eiloa a te mea tenā mo fai se malei ki a koe.”+