Esoto

4 Kae ne tali atu a Mose: “Kae kafai e se tali‵tonu latou ki a au kae e se faka‵logo ki toku leo,+ kae fai mai latou, ‘A Ieova e seki fakasae atu ki a koe.’” 2 Tenā ne fai atu ei a Ieova ki a ia: “Se a te mea tenā e puke i tou lima?” Ne tali atu a Mose: “Se tokotoko.” 3 Ana muna ki a Mose: “‵Pei ki lalo i te laukele.” Ne ‵pei ne Mose te tokotoko ki lalo i te laukele, kae ne liu gata;+ kae ne tele a Mose kea‵tea mai i ei. 4 Ne fai atu a Ieova ki a Mose: “‵Kapa atu tou lima kae puke ki tena felo.” Ne puke atu a Mose ki ei, kae ne toe liu tokotoko te gata i tena lima. 5 Tenā ne fai atu ei a te Atua: “E fai a te mea tenei ko te mea ke tali‵tonu latou i a Ieova te Atua o olotou tupuga, te Atua o Apelaamo, te Atua o Isaako, mo te Atua o Iakopo,+ ne fakasae atu eiloa ki a koe.”+

6 Ne toe fai atu a Ieova ki a ia: “Fakamolemole faulu tou lima ki loto i tou gatu.” Faulu ei ne Mose tena lima ki loto i tena gatu. I te tapalega ne ia ki tua, a tena lima ko ‵kena eiloa i te lepela e pelā me se kiona!+ 7 Ne toe fai atu te Atua: “Toe faulu tou lima ki loto i tou gatu.” Tenā ne toe faulu ei ne Mose tena lima ki loto i tena gatu. I te tapalega ne ia ki tua mai tena gatu, ne toe ‵lei tena lima e pelā eiloa mo nisi vaega katoa o tena foitino! 8 Ne fai atu te Atua: “Kafai e se tali‵tonu latou ki a koe io me e se ‵saga atu ki te fakailoga muamua, ka faka‵logo eiloa latou ki te suā fakailoga.+ 9 Kafai foki e se tali‵tonu latou ki fakailoga e lua konei kae e se faka‵logo ki tou leo, ko puke mai ei ne koe ne vai mai te Vaitafe o te Naila kae ‵ligi atu ki luga i te laukele, a te vai tenā mai te Naila ka liu toto i luga i te laukele.”+

10 Ne fai atu a Mose ki a Ieova: “Fakamolemole eiloa e Ieova, kae ko au e sē se tino e poto i te faipati, mai i taimi mua eiloa mo te taimi tenei e faipati mai ei koe ki tau tavini, me e tuai taku faipati* kae ‵lave foki toku alelo.”+ 11 Muna a Ieova ki a ia: “Ko oi ne faite ne ia te gutu o te tagata io me ko oi ne fai ne ia a tino ke gū‵gu, ‵tuli, ‵kite ‵lei, io me ‵kivi? E a, e se ko au, Ieova? 12 Tela la, na fano nei kae ka fakatasi atu eiloa au ki a koe i te taimi e faipati ei koe,* kae ka akoako atu ne au ki a koe a pati e ‵tau o fai ne koe.”+ 13 Kae ne fai atu a Mose: “Fakamolemole eiloa e Ieova, uga atu so se tino e manako koe o uga atu.” 14 Tenā ne kaitaua malosi ei a Ieova ki a Mose kae fai atu: “Kae e a tou taina, ko Alona+ te tino Levi? E iloa ne au me e apo a ia i te faipati. Kae tenā ko vau o fakafetaui ki a koe. Kafai e matea ne ia koe, ka fiafia malosi eiloa tena loto.+ 15 Tela la, e ‵tau o faipati atu koe ki a ia kae fakaasi atu ki ei aku pati,+ kae ka fakatasi atu eiloa au ki a koe mo ia i te taimi e faipati ei koe,+ kae ka akoako atu ne au ki a koulua a mea e ‵tau o fai. 16 Ka faipati a ia ki tino o sui koe, kae ka fai a ia mo fai tau tukumuna, kae ka fai a koe mo Atua ki a ia.*+ 17 Kae ka puke ne koe te tokotoko tenei i tou lima kae fakaaoga mo fai a fakailoga.”+

18 Ne foki atu a Mose ki a Ietelo te tamana o tena avaga+ kae fai atu ki a ia: “Fakamolemole, au ko manako o fano, o toe foki atu ki oku taina kolā e ‵nofo i Aikupito ke onoono aka me koi ola latou.” Muna a Ietelo ki a Mose: “Fano la mo te filemu.” 19 Mai tua ifo i ei, ne fai atu a Ieova ki a Mose i Mitiana: “Fano, toe foki ki Aikupito me ko oti ne ‵mate a tino katoa kolā ne salasala ke tamate ne latou a koe.”*+

20 Tenā ne puke ei ne Mose a tena avaga mo ana tama tāgata kae faka‵sopo ki luga i se asini, kae kamata o foki atu ki te fenua o Aikupito. E se gata i ei, ne puke foki ne Mose te tokotoko o te Atua tonu i tena lima. 21 Tenā ne fai atu ei a Ieova ki a Mose: “Kafai ko oko koe ki Aikupito, ke na fai eiloa ne koe a vavega katoa kolā ne tuku atu ne au ke fai ne koe i mua o te Falao.+ Kae ka talia ne au ke makeke tena loto,+ kae ka se uga atu ne ia a tino ke olo kea‵tea.+ 22 E ‵tau o fai atu koe ki te Falao, ‘Konei a pati a Ieova ne fai mai: “A Isalaelu ko taku tama tagata, ko taku toekimua.+ 23 Au e fai atu ki a koe, Uga taku tama tagata ke fano ko te mea ke tavini mai a ia ki a au. Kae kafai e ita koe ma uga a ia ke fano, ka tamate ne au tau tama tagata, ko tau toekimua.”’”+

24 I konā loa i te auala i tafa o se fale ‵moe, ne fetaui a Ieova+ mo tou tagata kae ne salasala ki se auala ke tamate ei a ia.+ 25 Oti aka loa, ne puke a Sepola+ ki se fatu mata ‵kai kae pilitome ne ia tena tama tagata kae fai ne ia ke patele tena pa‵kili ki luga i ana vae kae fai atu: “E fai te mea tenei ona ko koe se tagata fakaipoipo o te toto ki a au.” 26 Tenā ne tuku ei a ia ne te Atua ke fano. I te taimi tenā, ne fai atu tou fafine, “se tagata fakaipoipo o te toto,” ona ko te pilitome.

27 Tenā ne fai atu ei a Ieova ki a Alona: “Fano ki te koga lavaki o fakafetaui ki a Mose.”+ Ne fano a ia kae ne fetaui mo Mose i te mauga o te Atua tonu,+ kae sogi atu ki a ia. 28 Ne fakailoa atu ne Mose ki a Alona a pati katoa a Ieova, telā ne uga mai ne ia a ia,+ mo fakailoga katoa kolā ne fakatonu atu ne Ia ke fai.+ 29 Mai tua ifo, ne olo a Mose mo Alona o fakamaopoopo a toeaina katoa o tino Isalaelu.+ 30 Ne fakailoa atu ne Alona ki a latou a pati katoa a Ieova kolā ne fai ki a Mose, kae ne fai ne ia a fakailoga i mua+ o tino. 31 Ona ko te mea tenei ne tali‵tonu ei a tino.+ I te lagonaga ne latou i a Ieova ko saga atu ki tino Isalaelu+ kae ko oti ne lavea ne ia olotou puapuaga,+ ne totuli latou kae ifo ki lalo.