Esoto

5 Fakamuli ifo, ne olo atu a Mose mo Alona ki loto kae fai atu ki te Falao: “Konei a pati a Ieova te Atua o Isalaelu ne fai mai, ‘Uga atu oku tino ke olo ko te mea ke fai ne latou se ‵kaiga fiafia ki a au i te koga lavaki.’” 2 Kae ne fai atu te Falao: “Ko oi a Ieova,+ ke fakalogo au ki a ia kae uga atu a tino Isalaelu ke olo kea‵tea?+ E se iloa lele eiloa ne au a Ieova, kae e se gata i ei, ka se uga atu eiloa ne au a tino Isalaelu ke olo kea‵tea.”+ 3 Kae ne fai atu a lāua: “A te Atua o tino Epelu ko oti ne fesokotaki mai ki a matou. Fakamolemole, a matou e ma‵nako o ma‵laga atu ki te koga lavaki i aso e tolu o ofo atu a taulaga ki a Ieova te motou Atua;+ kafai e se olo matou, ka ‵ta ne ia matou ki famai io me ki te pelu.” 4 Ne tali atu te tupu o Aikupito ki a lāua: “Kaia ko taofi ei ne koulua e Mose mo Alona, a tino mai olotou galuega? ‵Foki o fai otou galuega!”*+ 5 Kae ne toe fai atu te Falao: “Kiloke ki te tokouke o tino i luga i te fenua, kae ko fai ne koulua ke malō‵lo a latou mai i olotou galuega.”

6 I te aso foki eiloa tenā ne fakatonu atu a te Falao ki tino fakaga‵lue tino mo tāgata fakatonutonu o galuega: 7 “E se ‵tau o tuku atu ne koutou a kausaito ki tino ke faite a puliki.+ Tuku eiloa latou ke olo o ‵tae mai olotou kausaito. 8 Kae e ‵tau o faimālō ne koutou a latou ke fakatumau te aofaki o puliki e faite e pelā eiloa mo taimi mua. Ke se fakafoliki ne koutou te aofaki, me i a latou ne tino paie. Tenā eiloa te pogai e ‵tagi mai ei latou, ‘A matou e ma‵nako o olo kea‵tea, a matou e ma‵nako o ofo atu a taulaga ki te motou Atua!’ 9 Fai ke ga‵lue malosi latou kae ke fakalavelave faeloa, ko te mea ke se ‵saga atu latou ki pati ‵loi.”

10 Ne olo atu a tino fakaga‵lue+ tino mo tāgata fakatonutonu o galuega kae fai atu ki tino: “Konei a pati a te Falao ne fai mai, ‘Ka se toe ai ne kausaito e tuku atu ne au ki a koutou. 11 Olo o ‵sala otou kausaito i so se koga e maua i ei, kae ko otou galuega ka se fakamu‵tana eiloa.’” 12 Tenā ne salalau atu ei a tino i te fenua kātoa o Aikupito o ‵tae mai a kausaito mo fai a kausaito ma‵lō. 13 Kae ne fai atu faeloa a tino fakaga‵lue tino ki a latou: “E ‵tau o fakaoti ne koutou taki tokotasi otou galuega i aso takitasi, e pelā eiloa mo taimi ne tuku sāle atu ei a kausaito ki a koutou.” 14 A tāgata fakatonutonu galuega a tino Isalaelu, kolā ne ‵tofi ne tino fakaga‵lue tino a te Falao ke onoono ki a latou, ne ‵kini foki.+ Ne fesili atu a tino fakaga‵lue tino ki a latou: “Kaia e se kātoa ei te aofaki otou puliki e pelā mo aso mua? Ne seki kātoa otou puliki i te aso anafi mo te aso nei.”

15 Ne olo atu a tāgata fakatonutonu o galuega a tino Isalaelu ki loto i te Falao kae fai atu te lotou fameo tenei: “Kaia ko fai ei ne koe au tavini penei? 16 E seai ne kausaito e tuku mai ki au tavini, kae e fai mai latou ki a matou, ‘Faite a puliki!’ E ‵kini ne latou au tavini, kae ko ou tino eiloa e ‵se.” 17 Kae ne fai atu a ia: “A koutou ne tino paie, a koutou ne tino paie!+ Tenā te pogai e fai mai ei koutou, ‘A matou e ma‵nako o olo kea‵tea, a matou e ma‵nako o ofo atu a taulaga ki a Ieova.’+ 18 Tela la, olo nei, toe ‵foki o ga‵lue! Ka seai ne kausaito e tuku atu ki a koutou, kae e ‵tau eiloa o tumau te aofaki o puliki e faite ne koutou.”

19 Tenā ne matea ei ne tāgata fakatonutonu o galuega a tino Isalaelu a te lasi o te fakalavelave telā ko pokotia latou i ei ona ko te fakatonuga tenei: “E se ‵tau eiloa o fakamu‵tana ifo te aofaki o puliki e faite ne koutou i aso takitasi.” 20 Mai tua i konā, ne fetaui latou mo Mose mo Alona, kolā ne ‵tu atu o fakafetaui ki a latou i te lotou o‵maiga ki tua mai i te Falao. 21 I konā eiloa, ne fai atu latou ki a lāua: “Ke kilo atu a Ieova kae fakamasino ne ia koulua, ona ko te mea ko oti ne fai ne koulua a te Falao mo ana tavini ke takalia‵lia mai ki a matou,* kae ko oti ne tuku ne koulua se pelu ki olotou lima ke tamate matou.”+ 22 Tenā ne saga atu ei a Mose ki a Ieova kae fai atu: “Ieova, kaia ko fakapuapuagatia ei ne koe a tino konei? Kaia ne uga mai ei ne koe au? 23 Talu mai te taimi ne fano ei au ki loto i te Falao o faipati ki a ia i tou igoa,+ ne fai fakamasei faeloa ne ia a tino konei,+ kae e seki faka‵sao aka eiloa ne koe ou tino.”+