Faataoto
5 Taku tama, saga tonu mai ki toku poto.
Fakalogo faka‵lei* ki toku atamai i te faiga o faka‵tauga ‵lei,+
2 Ko te mea ke mafai o puipui ne koe te malosi o tou mafaufau
Kae leoleo a te iloaga fakatasi mo ou laugutu.+
3 Me i laugutu o se fafine masei* e ‵moti e pelā me se hani,+
Kae ko tena gutu e ‵mole atu i lō te sinu.+
4 Kae oti aka loa e ‵kona eiloa tou fafine e pelā me se lakau ‵kona+
Kae e ‵kai pelā me se pelu e ‵kai matalua.+
5 Ana vae e olo ifo ki te mate.
Ana kalafaga e olo ‵tonu atu ki te Tanuga.*
6 E se mafaufau a ia ki te ala o te ola.
Ko fano valevale tena auala, kae ko se iloa ne ia me fano a ia ki fea.
7 Nei la, e aku tama, faka‵logo mai ki a au
Kae ke mo a ma ‵fuli kea‵tea mai aku pati e fai atu.
8 Faka‵mao kea‵tea mai tou fafine;
Ke mo a ma fakapilipili atu ki te mataloa o tena fale,+
9 Ko te mea ke mo a ma galo te āva o nisi tino ki a koe+
Kae tau ne koe a mea ma‵sei i te fia o tausaga;+
10 Ko te mea ke mo a ma fakaaoga ne tino fakaa‵tea ou koloa+
Kae ko mea kolā ne galue koe ki ei ko ave ki te fale o se tino fakaa‵tea.
11 I a koe ma tagi fi‵ta i te fakaotiga o tou olaga
I te taimi ko gasolo ei o vāivāi tou foitino+
12 Kae fai atu koe: “Ko oko eiloa au i te takalialia ki polopolokiga!
Ko oko eiloa i te sē fiafia o toku loto ki polopolokiga ‵mafa!
13 Au ne seki fakalogo ki leo o tino e akoako ne latou au
Io me saga tonu atu ki oku faiakoga
14 Ko oko mai au ki kaugutu o te fakamaseiga katoatoa
I loto i te fakapotopotoga kātoa.”+
15 Inu ki vai mai tau vaikeli eiloa
Mo vai e ‵tafe mai i tau vaikeli.+
16 E a, e ‵tau o fakasalalau atu ou vaipuna ki tua,
Ko au vai e ‵tafe mai ki loto i malae o te fakai?+
17 Ke fai eiloa a mea konā ma koe tokotasi,
Kae e se mō tino fakaa‵tea kolā e fakatasi mo koe.+
18 Ke manuia eiloa ou vaipuna,
Kae ke fia‵fia fakatasi koe mo tau avaga telā ne fai i te taimi koi talavou ei koe,+
19 Se tia telā e alofagina, se kouti mata fiafia o mauga.+
Ke malie eiloa koe ki ana ū i taimi katoa.
Ke fiafia faeloa koe ki tena alofa.+
20 Tela la, e taku tama, kaia e ‵tau ei koe o fiafia ki se fafine masei*
21 Me i auala o te tagata e ‵tu i mua o mata o Ieova;
E iloilo ne ia ana ala katoa.+
22 A te tino amio masei ka maleigina eiloa ne ana mea ‵se,
Kae ka ‵poa aka a ia i loto i lōpu o tena agasala.+
23 Ka mate a ia ona ko te sē lava o polopolokiga
Kae takasēsē kea‵tea ona ko te lasi o tena valea.