Ielemia
18 Konei a pati ne oko mai ki a Ielemia mai i a Ieova: 2 “Tu ki luga kae fano ki te fale o te tino faite mea ki kele,+ kae ka fai ne au ke lagona ne koe aku muna i konā.”
3 Tenā ne fano ei au ki te fale o te tino faite mea ki kele, kae ne galue a ia i te teka e faite ei a mea ki kele. 4 Kae ko te pōla ne faite ne te tino faite mea ki kele ne masei i ana lima. Tenā ne toe faite ei ne ia te suā pōla telā e mafaufau a ia me e fetaui ‵lei.
5 Tenā ne oko mai ei te fekau a Ieova ki a au, kae fai mai: 6 “‘E a, e se mafai ne au o fai ki a koutou te mea tenei ne fai ne te tino faite mea ki kele, e te kāiga o Isalaelu?’ ko te folafolaga a Ieova. ‘Kiloke! E pelā mo te kele i te lima o te tino faite mea ki kele, e penā foki koutou i toku lima, e te kāiga o Isalaelu.+ 7 So se taimi e faipati ei au e uiga ki te unu kea‵tea mo te ‵futi ki lalo mo te fakamaseiga o se atufenua io me se malo,+ 8 kae tiaki ne te atufenua tenā a amioga ma‵sei kolā ne faipati ‵teke atu au e uiga ki ei, ka ‵fuli foki toku mafaufau e uiga ki te fakalavelave telā ne manako au o fakaoko mai ki luga i ei.+ 9 Kae i so se taimi e faipati ei au e uiga ki te faitega mo te ‵tokiga o se atufenua io me se malo, 10 kae e fai ne ia a te mea masei i taku kilokiloga kae e se fakalogo ki toku leo, ka ‵fuli toku mafaufau e uiga ki te mea ‵lei e manako au o fai ki ei.’
11 “Nei la, fakamolemole, fai atu ki tāgata o Iuta mo tino kolā e ‵nofo i Ielusalema, ‘Konei a pati a Ieova ne fai mai: “Ko fakatoka nei ne au se fakalavelave kae fai se aofaga o ‵teke atu koutou. Fakamolemole, ke na fulitua atu ki otou auala ma‵sei, kae toe ‵fuli otou auala mo otou faifaiga.”’”+
12 Kae ne fai atu latou: “Ko seai se aoga!+ Me i a matou ka sa‵sale eiloa i mea e mafau‵fau matou ki ei, kae ka fai ne matou taki tokotasi a mea e ‵tusa mo te ma‵keke o omotou loto ma‵sei.”+
13 Tela la, konei a pati a Ieova ne fai mai:
“Fakamolemole, fesili atu koutou ki nisi atufenua.
Ko oi ne lagona ne ia se vaegā mea penei?
A te tamafine ‵ma o Isalaelu ko oti ne fai ne ia te ‵toe mea matagā eiloa.+
14 E mata, e ‵galo atu a kiona o Lepanona mai i kaupapa i luga i ana ‵sifoga?
Io me e a, ka ‵masa pakupaku a vai ‵moko kolā e ‵tafe mai i se koga ‵mao?
15 Kae ko oti au ne fakapuli ne oku tino.+
Me e ofo atu olotou taulaga ki se mea sē aoga,+
Kae e fai ne latou a tāgata ke ‵siga i olotou auala, ko ala o aso mua,+
Ke sa‵sale i auala fo‵liki kolā e se ‵lei kae e se laugatasi,
16 Ko te mea ke fai te lotou laukele mo fai se mea fakamataku+
Kae se mea e fakatauemu* ne latou ki te se-gata-mai.+
Ko tino katoa kolā e olo atu i konā ka ‵pula ‵toka atu mo te ofo ki ei kae lūlū olotou ulu.+
17 E pelā mo te matagi mai saegala, ka fakasalalau ne au latou i mua o te fili.
Ka ‵fuli atu toku tua ki a latou, kae e se ko oku mata, i te aso o te lotou puapuaga.”+
18 Kae ne fai mai latou: “O‵mai, ke fai ne tatou se togafiti ki a Ielemia,+ me ka se galo atu a te tulafono* mai i ‵tou faitaulaga io me ko pati fakatonutonu mai i tāgata ‵poto io me ko muna mai i pelofeta. O‵mai ke faipati ‵teke atu tatou ki a ia kae ke mo a ma ‵saga atu ki ana pati e fai mai.”
19 Ieova, saga mai ki a au,
Kae fakalogo aka ki pati kolā e fai ne oku fili.
20 E a, e ‵tau o ‵togi atu te ‵lei ki te masei?
Me ko oti ne keli ne latou se lua mō toku ola.+
Ke masaua te auala ne tu ei au i ou mua o faipati ki mea ‵lei e uiga ki a latou,
Ke ‵fuli kea‵tea tou kaitaua mai i a latou.
21 Tela la, tuku atu olotou tama tāgata ki te oge,
Kae tuku atu latou ki te malosi o te pelu.+
Ke fai olotou avaga fāfine ke ‵mate olotou tama‵liki mo olotou avaga.+
Ke tamate atu olotou tāgata ki se mala fakamataku,
Ke na ‵ta olotou tamataene ki te pelu i te taua.+
22 Fai ke lagona atu se ‵tagi mai i olotou fale
Māfai ko aumai fakapoi ne koe a tino kai‵soa ki a latou.
Me ko oti ne keli ne latou se lua ke puke au
Kae fakata‵kato a malei mō oku vae.+
23 Kae ko koe e Ieova,
E iloa ‵lei ne koe olotou aofaga katoa ke tamate au.+
Ke mo a ma ufiufi ne koe olotou mea ‵se,
Kae ke mo a ma ‵solo kea‵tea te lotou agasala mai i ou mua.