Ielemia
19 Konei a pati a Ieova ne fai mai: “Fano o ‵togi se tiā kele mai i se tino faite mea ki kele.+ Puke a nisi toeaina o te fenua mo nisi toeaina mai i faitaulaga, 2 kae olo ki te Vanu o te Tama Tagata a Hinomo,+ i te auala ki loto o te Mataloa o Potisete. Kae folafola atu i konā a muna e fai atu ne au ki a koe. 3 Ka fai atu koe, ‘Faka‵logo mai ki pati a Ieova, koutou e tupu o Iuta mo tino kolā e ‵nofo i Ielusalema. Konei a pati a Ieova o kautau, te Atua o Isalaelu ne fai mai:
“‘“Ko pili o aumai ne au se fakalavelave ki te koga tenei, kae ko so se tino e logo i ei ka poi masei.* 4 E fai penā ona ko te mea ne tiaki ne latou au+ kae fai a te koga tenei ke se iloa ne au.+ I loto i ei, e ofo atu olotou taulaga ki nisi atua, kolā ne seki iloa ne latou mo olotou tupuga mo tupu o Iuta, kae ko oti ne faka‵fonu ne latou te koga tenei ki toto o tino e seai ne olotou ‵se.+ 5 Ne faite ne latou a koga ma‵luga o Paala ko te mea ke ‵sunu olotou tama tāgata i te afi e pelā me ne taulaga ‵sunu kātoa e ofo atu ki a Paala,+ se mea telā ne seki fakatonu atu ne au io me faipati e uiga ki ei, kae seki māfua mai foki i toku loto.”’*+
6 “‘“Tela la, kiloke! ka oko mai a aso,” ko te folafolaga a Ieova, “ka se toe taku i ei te koga tenei ko Tofeta io me ko te Vanu o te Tama Tagata o Hinomo kae ko te Vanu o te Tamatega.+ 7 Kae ka fakamakosu ne au a palani a Iuta mo Ielusalema i te koga tenei, kae ka fai ne au latou ke pa‵kū i te pelu i mua o olotou fili kae e auala i lima o latou kolā e taumafai o tamate latou. Kae ka tuku atu ne au olotou foitino ‵mate e pelā me ne meakai ki manu eva o te lagi mo manu fe‵kai o te lalolagi.+ 8 Kae ka fai ne au te fakai tenei e pelā me se mea fakamataku kae se mea fakatauemu.* A tino katoa e olo atu i konā ka ‵pula ‵toka atu mo te ofo kae fakatauemu ki ana mala katoa.+ 9 Kae ka fai ne au a latou ke ‵kai ki ‵kano o olotou tama tāgata mo tama fāfine, kae ko latou taki tokotasi ka ‵kai ki ‵kano o olotou tuakoi, ona ko te nikoiga mo te manavase i te taimi ko fakatamilo ei latou ne olotou fili mo tino kolā e taumafai o tamate latou.”’+
10 “Tenā ko ‵foa ei ne koe te tiā i mua o tāgata kolā ne olo mo koe, 11 kae fai atu ki a latou, ‘Konei a pati a Ieova o kautau ne fai mai: “Tenei te auala ka ‵foa ei ne au a tino konei mo te fakai tenei, e pelā me se tino e ‵foa ne ia se mea ne faite ne te tino faite mea ki kele ko te mea ke se mafai eiloa o toe faite; kae ka tanu ne latou a tino ‵mate i Tofeta ke oko ki te taimi ko seai se avanoaga mo tanu latou.”’+
12 “‘Tenā te mea ka fai ne au ki te koga tenei,’ ko te folafolaga a Ieova, ‘mo tino e ‵nofo i ei, ke fai te fakai tenei e pelā mo Tofeta. 13 Kae ko fale o Ielusalema mo fale o tupu o Iuta ka se ‵ma e pelā mo te koga tenei, ko Tofeta,+ ao, ko fale katoa kolā e ofo atu ne latou i luga i olotou tuafale a taulaga ki te kautau kātoa o te lagi+ mo te koga e ‵ligi ne latou i ei a taulaga meainu ki nisi atua.’”+
14 I te taimi ne foki mai ei a Ielemia mai i Tofeta, te koga ne uga ei a ia ne Ieova ke ‵valo i ei, ne tu a ia i te koga ateatea o te fale o Ieova kae fai atu ki tino katoa: 15 “Konei a pati a Ieova o kautau, te Atua o Isalaelu ne fai mai, ‘Ko aumai nei ne au ki luga i te fakai tenei mo ana tamā fakai katoa a te puapuaga telā ne faipati au e uiga ki ei, me ne ita fitifiti latou ma faka‵logo ki aku pati.’”+