Ielemia
21 Ne oko mai te fekau a Ieova ki a Ielemia i te taimi ne uga atu ei ne te Tupu ko Setekaia+ ki a ia a Pasula+ te tama tagata a Malakita mo Sefanaia+ te tama tagata a Maseia, te faitaulaga, kae fakatagi atu ki ei: 2 “Fakamolemole, fesili atu ki a Ieova mō tatou, me i te tupu o Papelonia ko Nepukanesa* ko taua mai ki a tatou.+ E se taumate ka fai ne Ieova se mea fakaofoofogia e tasi mō tatou, ko te mea ke fano kea‵tea a ia mai i a tatou.”+
3 Muna a Ielemia ki a latou: “Konei a pati e ‵tau o fai atu ne koe ki a Setekaia, 4 ‘Konei a pati a Ieova te Atua o Isalaelu ne fai mai: “Ka ‵fuli ne au a meatau o te taua konā i otou lima ke taua atu ki a koutou, ko meatau kolā e taua atu ei koutou ki te tupu o Papelonia+ mo tino Kaletaia kolā e ‵nofo i tua o ‵pui o te fakai o nikoi koutou. Kae ka fakamaopoopo ne au latou ki loto i te kogaloto o te fakai tenei. 5 Kae ka taua atu eiloa au ki a koutou+ mo toku lima e ‵fola mo toku lima malosi, fakatasi mo te ita mo te kaitaua mo te saua lasi.+ 6 Ka ‵ta ne au a tino e ‵nofo i te fakai tenei, ko tāgata mo manu. Ka ‵mate eiloa latou e auala i se famai lasi.”’+
7 “‘“Mai tua i ei,” ko te folafolaga a Ieova, “ka tuku atu ne au a te Tupu ko Setekaia o Iuta mo ana tavini mo tino o te fakai tenei—ko latou kolā ne ‵sao i te famai, te pelu mo te oge—ki lima o te tupu o Papelonia ko Nepukanesa*, ki lima o olotou fili, mo lima o latou kolā e taumafai o tamate latou.+ Ka ‵ta ne ia latou ki te pelu. Ka se alofa eiloa a ia ki a latou, io me fakaasi atu te alofa atafai io me ko te alofa fakamagalo.”’+
8 “Kae e ‵tau o fai atu koe ki tino konei, ‘Konei a pati a Ieova ne fai mai: “Ko tuku atu nei ne au i otou mua a te auala o te ola mo te auala o te mate. 9 A tino kolā e ‵toe mai i te fakai tenei ka ‵mate i te pelu, i te oge mo te famai. Kae ko so se tino e fano ki tua kae fakamalalo ki tino Kaletaia kolā e nikoi ne latou a koutou ka tumau i te ola, kae ka fai tena ola e pelā me se taui ne maua i te taua.”’+
10 “‘“Me ko oti ne ‵teke ne au te fakai tenei kae ka maua i ei a fakalavelave kae e seai ne mea ‵lei i ei,”+ ko te folafolaga a Ieova. “Ka tuku atu ki lima o te tupu o Papelonia,+ kae ka ‵sunu ne ia ki te afi.”+
11 “‘Ki te kāiga o te tupu o Iuta: Faka‵logo mai ki pati a Ieova. 12 E te kāiga o Tavita, konei a pati a Ieova ne fai mai:
“Fakamaluga aka a te fakamasinoga tonu i tafataeao katoa,
Kae fakasao aka a te tino ne kaisoa ana mea mai i lima o te tino ‵fao mea,+
Ko te mea ke se ‵ka a toku kaitaua e pelā me se afi+
Ko ‵ka i ei e aunoa mo se tino ke tamate ne ia
Ona ko otou faifaiga matagā.”’+
13 ‘Ko ‵teke atu nei au ki a koutou, e tino kolā e ‵nofo i te vanu,
E te kaupapa o te laukele laugatasi,’ ko te folafolaga a Ieova.
‘E pelā mo koutou kolā e fai mai: “Ko oi ka fanaifo o taua mai ki a matou?
Kae ko oi ka ulu mālō mai ki loto i omotou koga ‵nofo?”
14 Ka fakasala ne au koutou,
E ‵tusa eiloa mo otou faifaiga,’+ ko te folafolaga a Ieova.
‘Kae ka faka‵ka ne au ana togavao,
Kae ka ‵ka i ei a mea katoa i ana tafa.’”+