Ielemia
22 Konei a pati a Ieova ne fai mai: “Fano ki te fale* o te tupu o Iuta, kae fakaoko atu te fekau tenei ki ei. 2 E ‵tau mo koe o fai atu, ‘Fakalogo mai ki pati a Ieova, e te tupu o Iuta telā e sagasaga i te nofogaaliki o Tavita, ko koe mo au tavini mo ou tino, ko latou kolā e ulu mai i mataloa o ‵pui konei. 3 Konei a pati a Ieova ne fai mai: “Fakamaluga aka a te fakamasinoga tonu mo te amiotonu. Fakasao aka a te tino ne kaisoa ana mea mai i lima o te tino ‵fao mea. Ke mo a ma fai fakamasei se tino fakaa‵tea, kae ke mo a ma fakapakia so se tamaliki e seai sena tamana io me se fafine ko mate tena avaga.+ Kae ke mo a ma fakama‵ligi a toto o tino e seai ne olotou ‵se i te koga tenei.+ 4 Me kafai e faka‵logo faka‵lei koutou ki te fekau tenei, ko mafai ei o ulu atu a tupu kolā e saga‵saga i te nofogaaliki o Tavita+ ki loto i mataloa o ‵pui o te fale tenei, e ‵tele i luga i kaliota mo solofanua, ko latou mo olotou tavini mo olotou tino.”’+
5 “‘Kae kafai e se faka‵logo koutou ki pati konei, e tauto atu au i a au eiloa,’ ko te folafolaga a Ieova, ‘me ka fai a te fale tenei mo fai se koga ne fakamaseigina.’+
6 “Me konei a pati a Ieova ne fai mai e uiga ki te fale o te tupu o Iuta,
‘A koe e fai pelā mo Kileata ki a au,
E pelā mo koga ma‵luga o Lepanona.
Kae ka fai ne au koe e pelā me se koga lavaki;
E seai se fakai o koe ka ‵nofo i ei a tino.+
7 Kae ka ‵tofi ne au ne tino fakamasei mea ke taua atu ki a koe,
Ko tino taki tokotasi mo olotou meatau.+
Ka ‵kati ki lalo ne latou ou toe alasi ‵lei eiloa
Kae fai ke ‵siga ki loto i te afi.+
8 “‘Kae e uke a atufenua ka afe mai ki te fakai tenei kae fai atu te suā tino ki te suā tino: “Kaia ne fai ei ne Ieova te mea tenei ki te fakai lasi tenei?”+ 9 Kae ka tali mai latou: “Me ne tiaki ne latou te feagaiga a Ieova te lotou Atua kae ifo ki lalo i nisi atua kae tavini atu ki ei.”’+
10 Ke mo a ma tagi mautuutu ki se tino ko mate,
Kae ke mo a ma alofa ki a ia.
I lō te fai penā, tagi malosi ki te tino telā ka fano kea‵tea,
Me ka se toe foki mai a ia o onoono ki te fenua ne fanau a ia i ei.
11 “Me konei a pati a Ieova ne fai mai e uiga ki a Saluma*+ te tama tagata a Iosia, te tupu o Iuta telā ko te pule i lō tena tamana ko Iosia+ kae ko oti ne fano kea‵tea mo tena koga: ‘Ka se toe foki atu a ia ki konā. 12 Me ka mate a ia i te koga ne ave fakapagota ne latou a ia ki ei, kae ka se toe lavea ne ia te fenua tenei.’+
13 Kalofa eiloa i te tino e faite tena fale e aunoa mo te amiotonu
Mo ana potu i luga e aunoa mo te fakamasinoga tonu,
Telā e fai ne ia tena tuakoi ke tavini atu ki a ia e aunoa mo se ‵togi,
Kae ita ma ‵togi atu tena peofuga;+
14 Ko te tino e fai aka, ‘Ka faite ne au mo oku se fale e uke ana potu
Kae ‵lasi ana potu i luga.
Ka faka‵piki ne au a famalama ki ei
Kae ‵pui ki te alasi kae pēni ki te lanu kula.’
15 E a, ka tumau eiloa koe i te pule atu me e sili atu koe i nisi tino i te fakaaogaga o alasi?
A tou tamana foki ne kai kae inu,
Kae ne fakamaluga aka ne ia te fakamasinoga tonu mo te amiotonu,+
Kae ne ‵lei a mea katoa ne fai ne ia.
16 Ne ‵pulu ne ia a te tagi a te tino puapuagatia mo te tino mativa,
Kae ne manuia eiloa.
‘E a, e se tenā te uiga o te iloa ne koe au?’ ko te folafolaga a Ieova.
17 ‘Kae ko ou mata mo tou loto ne tuku eiloa i au mea ne maua i auala sē ‵tonu,
I te fakama‵ligiga o toto o tino e seai ne olotou ‵se,
Mo te faiga o togafiti ke maua a tupe mo te ‵fao mea.’
18 “Tela la, konei a pati a Ieova ne fai mai e uiga ki a Ieoiakimo+ te tama tagata a Iosia, te tupu o Iuta,
‘Ka se ‵tagi fanoa‵noa latou ki a ia:
“Oi aue, e toku taina! Oi aue, e toku tuagane!”
Ka se ‵tagi fanoa‵noa latou ki a ia:
“Oi aue, e toku matai! Oi aue, tena ‵malu!”
19 Ka tanu a ia e pelā mo te asini māfai ko tanu,+
E toso valevale kae ‵pei kea‵tea,
Ki tua mo mataloa o ‵pui o Ielusalema.’+
20 Fano ki luga i Lepanona kae tagi,
Fakamaluga aka tou leo i Pasana,
Kae tagi mai i Apalima,+
Me i tino katoa kolā e fia‵fai malosi ki a koe ko oti ne tuki palapala.+
21 Au ne faipati atu ki a koe i te taimi ne tokagamalie ei koe.
Kae ne fai mai koe, ‘Au e se fakalogo.’+
Tenei eiloa tau masani talu mai te taimi koi talavou ei koe,
Me i a koe ne seki fakalogo eiloa ki toku leo.+
22 Ka tausi ne se matagi au tausi mamoe katoa,+
Kae ko tino kolā e fia‵fai malosi ki a koe ka ave fakapagota.
Tenā ko mavale kae masiasi ei koe ona ko ou puapuaga katoa.
23 A koe telā e nofo i Lepanona,+
E fai ofaga i luga i alasi,+
Ka tagi fi‵ta koe ma oko mai a logo‵maega ki a koe,
E tigaina e pelā me se fafine ka fai o fanau!”+
24 “‘E pelā eiloa mo au e ola,’ ko te folafolaga a Ieova, ‘kafai foki loa e fai a Konia*+ te tama tagata a Ieoiakimo,+ te tupu o Iuta e pelā me ko te mama fakamailoga i toku lima fakaatamai, ka ‵futi ne au koe kea‵tea mai i konā! 25 Ka tuku atu ne au koe ki lima o latou kolā e taumafai o tamate koe, ki lima o latou kolā e mataku koe ki ei, ki lima o te tupu o Papelonia ko Nepukanesa,* mo lima o tino Kaletaia.+ 26 Kae ka ‵pei kea‵tea ne au a koe mo tou mātua telā ne fanau ne ia koe ki te suā fenua telā ne seki fanau i ei koe, kae ka mate koe i konā. 27 Kae ka se toe ‵foki mai eiloa latou ki te fenua e ma‵nako latou ki ei.+
28 E mata, a te tagata tenei ko Konia se ulo fakatakalialia fua kae mafāfā,
Se ulo telā e se manako ki ei se tino?
Kaia ne ‵pei ifo ei a ia mo ana tino
Kae ‵pei atu ki se fenua e se iloa ne latou?’+
29 E te lalolagi,* te lalolagi, te lalolagi, faka‵logo mai ki pati a Ieova.
30 Konei a pati a Ieova ne fai mai:
‘Tusi ki lalo me i te tagata tenei e seai ne ana tama,
E pelā me se tagata telā ka se manuia eiloa i tena olaga kātoa
Me e seai se tino e tupu mai i a ia ka manuia
Māfai e sagasaga i te nofogaaliki o Tavita kae pule atu ki Iuta.’”+