Tanielu

5 E pelā mo te Tupu ko Pelesala,+ ne fai ne ia se ‵kaiga lasi ki te fia afe o ana tino tāua, kae ne inu uaina tou tagata i mua o latou.+ 2 Kae koi nofo a ia i lalo o te pulega a te uaina, ne fai te fakatonuga a Pelesala ke aumai a ipu aulo mo ipu siliva kolā ne puke mai ne tena tamana ko Nepukanesa mai i te faletapu i Ielusalema,+ ko te mea ke inu ki ei a te tupu mo ana tino tāua, ana avaga fakasalasala mo ana nisi avaga. 3 Tenā ne aumai ei ne latou a ipu aulo kolā ne puke mai i te faletapu o te Atua i Ielusalema, kae ne inu ki ei a te tupu mo ana tino tāua, ana avaga fakasalasala mo ana nisi avaga. 4 Ne inu latou ki uaina, kae ‵viki atu ki atua o aulo mo siliva, mo kopa, fiti, lakau mo fatu.

5 I te taimi eiloa tenā ne ‵sae aka ei a matikao lima o se tagata kae kamata o tusitusi i luga i te ‵pui o te palesi o te tupu telā e ‵luta tonu ki te tugamoli, kae ne mafai o lavea ne te tupu a te lima i te taimi e tusitusi ei. 6 Tenā ne fakalau‵kena ei te tupu kae ne mataku a ia i ana mafaufauga, kae ne gasue‵sue+ ana kautega kae pole‵pole ana tulivae.

7 Ne kalaga atu te tupu i se leo maluga ke ‵kami mai ana tino faivailakau, tino Kaletaia* mo tino iloilo fetū.+ Ne fai atu te tupu ki tāgata ‵poto o Papelonia: “So se tagata e mafai ne ia o faitau a tusitusiga konei kae fakamatala mai tena uiga ki a au ka fakapei ki gatu violeta, ka fakasafe atu se malele aulo ki tena ua,+ kae ka fai a ia mo fai te tokotolu o pule i te malo.”+

8 Tenā ne o‵mai ei a tāgata ‵poto a te tupu ki loto, kae ne seki mafai ne latou o fai‵tau io me fakamatala atu te uiga o te mea tenā ki te tupu.+ 9 Tenā ne mataku malosi ei te Tupu ko Pelesala kae ne fakalau‵kena ana mata; kae ko ana tino tāua ne ofo masei.+

10 Ona ko pati a te tupu mo ana tino tāua, ne ulu atu te tupu fafine ki te potu e fai ei te ‵kaiga. Ne fai atu te tupu fafine: “Te tupu, ke ola koe ki te se-gata-mai. Ke mo a ma mataku koe i ou mafaufauga, io me fakalau‵kena ou mata. 11 E isi se tagata* i tou malo telā e maua atu i ei se agaga o atua tapu. I aso o tou tamana, ne maua i a ia a te mainaga mo te ‵loto o te malamalama mo te poto e pelā mo te poto o atua.+ Ne fakasopo aka ne te Tupu ko Nepukanesa a ia ke fai mo pule o faitaulaga faivailakau, tino faivailakau, tino Kaletaia,* mo tino iloilo fetū;+ ne fai ne tou tamana a te mea tenei, e te tupu. 12 Me i a Tanielu, telā ne fakaigoa ne te tupu ki a Peletisala,+ e isi se agaga fakaa‵tea i a ia mo te iloa mo te malamalama ke fakamatala a uiga o moemiti, ke fakamatala a uiga o tupua, kae fakamatala atu a mea faiga‵ta.+ Nei la, ‵kami mai a Tanielu, kae ka fakamatala atu ne ia ki a koe te uiga o te mea tenā.”

13 Tenā ne aumai ei a Tanielu ki mua o te tupu. Ne fesili atu te tupu ki a Tanielu: “A koe ko Tanielu mai tino Iuta+ kolā ne puke fakapagota, telā ne aumai ki tua ne toku tamana te tupu mai i Iuta?+ 14 Au ne logo e uiga ki a koe me maua eiloa i a koe a te agaga o atua+ kae ko te mainaga mo te malamalama mo te poto tu ‵kese e isi i a koe.+ 15 Ne aumai a tāgata ‵poto mo tino faivailakau ki oku mua ke faitau mai a te tusitusiga tenei kae ke fakamatala mai te uiga ki a au, kae e seki mafai ne latou o fakamatala mai te uiga o te fekau i ei.+ 16 Kae ne logo au e uiga ki a koe me ne mafai ne koe o fakamatala+ mai a uiga o mea faiga‵ta. Nei la, kafai e mafai ne koe o faitau a tusitusiga konei kae fakamatala mai tena uiga ki a au, ka fakapei koe ki gatu violeta, ka fakasafe atu se malele aulo ki tou ua, kae ka fai koe mo fai te tokotolu o pule i te malo.”+

17 Tenā ne tali atu ei a Tanielu ki te tupu: “E mafai o taofi ne koe au meaalofa kae tuku atu au meaalofa ki nisi tino. Kae ka faitau atu ne au a tusitusiga ki te tupu kae fakamatala atu tena uiga ki a koe. 18 Kae e pelā mo koe, e te tupu, a te Atua Tafasili i te Maluga ne tuku atu ne ia ki a Nepukanesa tou tamana a te malo mo tena takutakua mo tena tulaga fakaaloalogina mo te ‵malu.+ 19 Ona ko te takutakua telā ne tuku atu ne Ia ki tou tagata, ne pole‵pole ei i te ma‵taku a tino katoa, atufenua mo ‵gana i ana mua.+ So se tino e manako a ia ki ei, ne tamate ne ia io me fakaola ne ia, kae ko so se tino e manako a ia ki ei, ne fakamaluga ne ia io me fakamasiasi ne ia.+ 20 Kae i te taimi ne oko atu ei ki tena loto a te fakamaualuga, kae loto makeke a ia, tenā ne fai ei ne ia ana mea mo te fakamatamata,+ ne tuku ifo a ia ki lalo mo te nofogaaliki o tena malo, kae ne ave kea‵tea tena tulaga ‵malu mai i a ia. 21 Ne ‵tuli kea‵tea a ia mai i tino, kae ko tena loto ne fai pelā mo te loto o se manu fekai, kae ne ‵nofo fakatasi a ia mo asini vao. Ne tuku atu ki a ia a mouku ke kai ki ei e pelā eiloa mo pulumakau, kae ko tena foitino ne ‵siu i te ‵sau o te lagi, ke oko ki te taimi ko iloa ei ne ia i te Atua Tafasili i te Maluga ko te Pule i malo o tāgata kae ka ‵tofi ne ia so se tino e manako a ia ki ei ke pule i ei.+

22 “Kae ko koe, e Pelesala tena tama tagata, ne seki fakamalalo tou loto, faitalia me ne iloa ne koe a mea katoa konei. 23 I lō te fai penā, ne fakamaluga aka ne koe a koe eiloa o ‵teke atu ki te Aliki o te lagi,+ kae fai ne koe ke aumai ne latou a ipu o tena fale ki a koe.+ Kae ko koe mo au tino tāua, au avaga fakasalasala mo au nisi avaga ne inu uaina ki mea konā kae ‵viki atu ki atua o siliva mo aulo, mo kopa, fiti, lakau mo fatu, ko atua kolā e se lavea a mea kae e se ‵logo i se mea io me se iloa se mea.+ Kae ne seki faka‵malu ne koe a te Atua telā e maua i ana lima a tou mānava+ mo ou auala katoa. 24 Tela la, ne uga mai ne ia te lima, kae ne tusi i ei a tusitusiga konei.+ 25 Kae konei a tusitusiga ne tusi i ei: MENE, MENE, TEKELE, mo UPELESA.

26 “Tenei te fakamatalaga o te uiga o pati: MENE, ko oti ne lau aka ne te Atua a aso o tou malo kae fakagata ne ia.+

27 “TEKELE, ko oti koe ne fua ki te fua mea ‵mafa kae e se kātoa tou ‵mafa.

28 “PELESA, a tou malo ko oti ne vaevae kae tuku atu ki tino Metai mo Pelesia.”+

29 Tenā ne fai ei te fakatonuga a Pelesala, kae fakapei ne latou a Tanielu ki gatu violeta kae fakasafe se malele aulo i tena ua; kae ne faka‵pula atu me ka fai a ia mo fai te tokotolu o pule i te malo.+

30 I te po eiloa tenā ne tamate i ei a Pelesala, te tupu o tino Kaletaia.+ 31 Kae ne maua ne Taliu+ te tino Metai a te malo; ana tausaga ko nofo ki te 62.