Teutelonome

22 “Kafai e lavea ne koe se pulumakau io me se mamoe a tou taina ko tekateka kea‵tea, ke mo a ma se saga atu koe ki ei.+ E ‵tau eiloa o takitaki atu ne koe ki tou taina. 2 Kae kafai tou taina e se nofo pili mai ki a koe io me e se iloa ne koe a ia, e ‵tau o aumai ne koe te manu ki tou fale, kae nofo eiloa mo koe ke oko ki te taimi e ‵sala mai ei tou taina ki ei. Tenā ko fakafoki ei ne koe ki a ia.+ 3 Tenā te mea e ‵tau o fai ne koe ki tena asini, ana gatu, mo so se mea a tou taina ne galo kae ne maua ne koe. E se ‵tau mo koe o se saga atu ki ei.

4 “Kafai e lavea ne koe se asini io me se pulumakau a tou taina e siga i te auala, ke mo a ma sē saga atu koe ki ei. E ‵tau eiloa o fesoasoani atu koe ki a ia o fakatu aka tena manu ki luga.+

5 “E se ‵tau o pei se fafine ki gatu tāgata, io me pei se tagata ki gatu fāfine. A te tino e fai penā e takalialia ki ei a Ieova tou Atua.

6 “Kafai e maua ne koe i tou auala se ofaga o se manu eva i luga i se lakau io me i te laukele mo punua io me ko ana fua, kae ko te mātua e nofo i luga i ana punua io me ko ana fua, e se ‵tau mo koe o puke te mātua fakatasi mo ana punua.+ 7 E ‵tau o afuli ne koe te mātua ke fano, ko mafai ei o puke ne koe a punua ma koe. Fai a te mea tenei ko te mea ke fanofano ‵lei a mea katoa mō koe kae ka ola leva koe.

8 “Kafai e faite ne koe se fale fou, e ‵tau foki mo koe o faite se ‵pui i luga i te tuafale o tou fale,+ ko te mea ke mo a ma agasala koe i te fakamaligi toto māfai e tō se tino mai tou fale.

9 “E se ‵tau mo koe o ‵toki ne fuaga kese‵kese e lua i tou togavine.+ Kafai e fai penā, ka avatu katoa a mea kolā e ‵fua mai i fuaga konā e pelā foki mo fuataga e ‵fua mai i te togavine ki te koga tapuaki.

10 “E se ‵tau mo koe o fakaga‵lue tasi a te pulumakau tagata mo te asini ke fakamalū ei te laukele.+

11 “E se ‵tau mo koe o pei ki gatu kolā ne faite ki vulu fakatasi mo lino.+

12 “E ‵tau o fai ne koe ne fele i feitu e fa o te gatu telā e pei ne koe.+

13 “Kafai e puke ne se tagata se fafine mo fai tena avaga kae ‵moe fakatauavaga mo ia, kae fakamuli ifo ko takalialia a ia ki tou fafine,* 14 kae ‵losi atu me ne fai ne tou fafine a amioga matagā kae taku valea ei tena igoa kae fai atu: ‘Ne puke ne au te fafine tenei, kae i te taimi ne ‵moe fakatauavaga ei māua, e seai ne fakamaoniga ne maua ne au i a ia se tamafine ‵ma,’ 15 e ‵tau o fakaasi atu ne te tamana mo te mātua o te tamaliki fafine ki toeaina i te mataloa o te fakai a fakamaoniga me i te lā tamaliki fafine se tamafine eiloa. 16 E ‵tau mo te tamana o te tamaliki fafine o fai atu ki toeaina, ‘Ne avatu ne au taku tama fafine mo fai te avaga a te tagata tenei, kae ko takalialia* a ia ki tou fafine 17 kae ‵losi mai a ia me ne fai ne tou fafine a amioga matagā i ana pati: “Ko iloa ne au me e seai ne fakamaoniga i tau tama fafine se tamafine ‵ma.” Tenei la te fakamaoniga me i taku tama fafine se tamafine ‵ma eiloa.’ Tenā ko ‵fola ei ne lāua te sulukafu i mua o toeaina o te fakai. 18 Ko puke ei ne toeaina o te fakai+ a te tagata tenā o polopoloki.+ 19 Ka fakasala ne latou a ia ki te 100 sekela* siliva kae tuku atu ki te tamana o te tamaliki fafine, me ne fakamasei ne te tagata se tamafine o Isalaelu,+ kae ka fai eiloa tou fafine mo fai tena avaga. E se talia eiloa ke ‵tala ne tou tagata te lā avaga i aso katoa e ola ei a ia.

20 “Kae kafai e tonu te ‵losiga a te tagata, kae e seai se fakamaoniga me i te tamaliki fafine se tamafine ‵ma eiloa, 21 e ‵tau o aumai ne latou te tamaliki fafine ki te mataloa o te fale o tena tamana, ko peipei ei ne tāgata o te fakai a tou fafine ke mate, me ne fai ne ia se amioga fakatakalialia+ i Isalaelu mai te faiga o amioga fakatauavaga sē ‵tau* i te fale o tena tamana.+ Tela la, e ‵tau mo koe o tapale kea‵tea a te mea masei mai i a koutou.+

22 “Kafai e maua atu se tagata e ‵moe mo se fafine telā ko te avaga a te suā tagata, e ‵tau mo lāua o tamate, te tagata telā ne ‵moe tasi mo te fafine e pelā foki mo te fafine tenā.+ Tela la, e ‵tau mo koe o tapale kea‵tea a te mea masei mai Isalaelu.

23 “Kafai ne ‵sai feagaiga se tamafine ‵ma mo se tagata, kae ne fetaui tou fafine mo se isi tagata i te fakai kae ‵moe fakatasi mo tou fafine, 24 e ‵tau o aumai ne koutou a lāua ki mataloa o te fakai kae peipei ki fatu ke ‵mate, te tamaliki fafine me ne seki pakalaga a ia i loto i te fakai mo te tagata tenā me ne fakamasiasi ne ia te avaga a tena tuakoi.+ Tela la, e ‵tau mo koe o tapale kea‵tea a te mea masei mai i a koutou.

25 “Kae kafai ne fetaui te tagata mo te fafine ko oti ne ‵sai feagaiga mo te suā tagata i te fatoaga kae puke ne te tagata a tou fafine ke ‵moe tasi lāua, e ‵tau fua o tamate a te tagata telā ne ‵moe tasi mo tou fafine, 26 kae e se ‵tau mo koe o fai se mea ki te tamaliki fafine. E seai se agasala ne fai ne te tamaliki fafine e ‵tau ei o tamate a ia. E ‵pau eiloa a te mea tenei mo se tagata telā e taua mo tena tuakoi kae tamate ne ia.+ 27 Me ne fetaui tou tagata mo te fafine i te fatoaga kae ne pakalaga te tamaliki fafine telā ne ‵sai feagaiga, kae e seai se tino i konā ke fakasao ne ia tou fafine.

28 “Kafai ne fetaui se tagata mo se tamafine ‵ma telā e seki ‵sai feagaiga kae puke ne tou tagata a te fafine kae ‵moe fakatasi mo ia kae maua atu lāua,+ 29 e ‵tau mo te tagata telā ne ‵moe mo tou fafine o tuku atu ki te tamana o te tamaliki fafine e 50 sekela siliva, kae ka fai tou fafine mo fai te avaga a te tagata tenā.+ Me ne fakamasiasi ne te tagata tou fafine, kae ka se talia eiloa ke ‵tala ne tou tagata te lā avaga i aso katoa e ola ei a ia.

30 “E seai se tagata e ‵tau o puke ne ia te avaga a tena tamana, ko te mea ke se fakamasiasi ne ia tena tamana.*+