Teutelonome

23 “E seai se tagata ne ‵pena io me ne ‵kati kea‵tea ana koga tapu e talia ke fai pelā me se vaega o te fakapotopotoga a Ieova.+

2 “E seai se tamaliki tagata fuataka e talia ke fai pelā me se vaega o te fakapotopotoga a Ieova.+ Ke oko foki eiloa ki te sefulu o kautama e seai se tino mai tena gafa e talia ke fai pelā me se vaega o te fakapotopotoga a Ieova.

3 “E seai se tino Amoni io me se tino Moapi e talia ke fai pelā me se vaega o te fakapotopotoga a Ieova.+ Ke oko foki eiloa ki te sefulu o kautama, e seai eiloa se tino mai i olotou gafa e talia ke fai pelā me se vaega o te fakapotopotoga a Ieova, 4 me ne seki o‵mai latou o fesoasoani ki a koutou o avatu ne meakai mo vai ma koutou i te otou auala o olo ki tua mo Aikupito,+ kae ona foki ko te ‵togiga ne latou a Palaamo, te tama tagata a Piolo mai Petolo i Mesopotamia ke fakamalaia ne ia koe.+ 5 Kae ko Ieova tou Atua ne ita ma fakalogo ki a Palaamo.+ I lō te fai penā, ne ‵fuli ne Ieova tou Atua a te fakamalaiaga tenā ki se fakamanuiaga mō koe,+ me i a Ieova tou Atua e alofa atu eiloa ki a koe.+ 6 E se ‵tau eiloa o ‵sala koe ki mea e ‵lei ei latou io me ko mea e manuia ei latou i aso katoa o tou olaga.+

7 “E se ‵tau mo koe o takalialia ki se tino Etoma, me i a ia ko tou taina.+

“E se ‵tau mo koe o takalialia ki se tino Aikupito, me i a koe ne fai pelā me se tino fakaa‵tea i tena fenua.+ 8 A olotou tama‵liki ne fa‵nau mai i te tolu o kautama e mafai o fai pelā me ne vaega o te fakapotopotoga a Ieova.

9 “Kafai ko taua atu koe ki ou fili, fakaeteete ke mo a ma fai ne koe se mea masei.+ 10 Kafai ko se ‵ma se tagata ona ko vai kolā e ‵sali mai i tena koga tapu,+ e ‵tau mo ia o fano ki tua mo te fakai kae se toe ulu ki loto i ei. 11 Kafai ko oko ki te afiafi, e ‵tau o koukou a ia ki vai, ko mafai ei o toe foki atu ki loto i te fakai māfai ko tō te mata o te la.+ 12 E ‵tau o isi se koga fakapito* i tua o te fakai e fakatoka mo olo sāle koutou ki ei. 13 E ‵tau o aofia i au mea faigaluega se lakau. Kafai e fano koe ki ou tinae i tua o te fakai, e ‵tau o keli ne koe se lua ki te lakau tenā mo tanu ou fekau. 14 Me i a Ieova tou Atua e sasale faeloa i loto i te fakai+ o fakasao koe kae tuku atu ou fili ki ou lima, kae e ‵tau eiloa o tapu+ tou fakai, ko te mea ke se lavea ne ia se mea masei i a koe kae ‵fuli kea‵tea o se ‵kau fakatasi mo koe.

15 “E se ‵tau o fakafoki ne koe se pologa ki tena matai māfai ne tele kea‵tea mai tena matai kae fanatu ki a koe. 16 E mafai o ‵nofo fakatasi a ia mo koe i so se koga e filifili ne ia mai i ou fakai, i so se koga e manako a ia ki ei. E se ‵tau mo koe o fai fakamasei a ia.+

17 “E seai se tama fafine a Isalaelu e ‵tau o fai pelā me se fafine talitāgata i te faletapu,+ e se ‵tau foki o fai se tama tagata a Isalaelu e pelā me se tagata talitāgata i te faletapu.+ 18 E se ‵tau mo koe o aumai te ‵togi o se fafine talitāgata io me ko te ‵togi o* se tagata talitāgata* ki loto i te fale o Ieova tou Atua ke fakataunu ei se tautoga, me i te avā mea konā ne mea fakatakalia‵lia ki a Ieova tou Atua.

19 “E se ‵tau mo koe o fai ke ‵togi ne tou taina a te pasene,+ faitalia me ko te pasene o tupe io me ko meakai, io me ko so se mea telā e mafai o fakapasene ne se tino. 20 E mafai o fai ne koe ke ‵togi mai ne tino mai fenua fakaa‵tea a te pasene,+ kae e se ‵tau mo koe o fai ki tou taina ke ‵togi ne ia te pasene,+ ko te mea ke fakamanuia koe ne Ieova tou Atua i au mea katoa e fai i te fenua ka fano koe o puke mō koe.+

21 “Kafai e fai ne koe se tautoga ki a Ieova tou Atua,+ ke mo a ma fakatuai koe o fakataunu te mea tenā.+ Me tenā eiloa te mea e manako a Ieova tou Atua ke fai ne koe; i a koe ma agasala i te mea tenā.+ 22 Kae kafai e se fai ne koe se tautoga, ka se agasala koe i te mea tenā.+ 23 E ‵tau o tausi ne koe a pati ko oti ne ‵to mai i ou laugutu,+ kae e ‵tau mo koe o fakataunu a te tautoga ne tō mai i tou gutu e pelā me se taulaga o te lotomalie ki a Ieova tou Atua.+

24 “Kafai e ulu atu koe ki te togavine o tou tuakoi e mafai o kai koe ki fuagavine i ei ke makona koe, kae ke mo a eiloa ma ‵fao ne koe ne fuagavine ki loto i tau ato.+

25 “Kafai e fano koe ki te fatoaga saito a tou tuakoi, e mafai o tau ne koe a kausaito ma‵tua ki ou lima kae ke mo a eiloa ma ‵kati ne koe a saito i te fatoaga o tou tuakoi ki te naifi ‵kati saito.+