Iosua

17 Ne tu te vili+ ki te matakāiga o Manase,+ me i a ia ko te toekimua a Iosefa.+ Kae ona ko Makila,+ te toekimua a Manase, te tamana o Kileata, se tagata o te taua, ne maua ei ne ia a Kileata mo Pasana.+ 2 Kae ne tu atu te vili ki tino katoa kolā ne ‵tupu mai i a Manase e ‵tusa mo olotou kāiga, ko tama tāgata a Apiese,+ ko tama tāgata a Heleka, ko tama tāgata a Asilielu, ko tama tāgata a Sekema, ko tama tāgata a Hefa, mo tama tāgata a Semita. Konei a tino ne ‵tupu mai i a Manase te tama tagata a Iosefa, ko tāgata e ‵tusa eiloa mo olotou kāiga.+ 3 Kae ko Selofeata+ te tama tagata a Hefa, te tama tagata a Kileata, te tama tagata a Makila, te tama tagata a Manase, e seai ne ana tama tāgata, ne tama fāfine fua, kae konei a igoa o ana tama fāfine: ko Mahala, Noa, Hokala, Milika mo Tilesa. 4 Ne olo atu latou ki mua o Eleasalo+ te faitaulaga, Iosua te tama tagata a Nuno mo takitaki kae fai atu: “Ko Ieova ne fakatonu ne ia Mose ke tuku mai ki a matou se tofi fakatasi mo omotou kāiga tāgata.”+ Tela la, e ‵tusa eiloa mo te fakatonuga a Ieova, ne tuku atu ne ia ki a latou te tofi fakatasi mo taina o te lotou tamana.+

5 E isi foki ne vaega e sefulu kolā ne maua ne Manase i tafa o laukele o Kileata mo Pasana, kolā e ‵tu i te suā feitu* o te Iolitana,+ 6 me i fāfine mai te matakāiga o Manase ne maua te lotou tofi fakatasi mo ana tama tāgata, kae ko te laukele o Kileata ne tuku atu mō te ‵toega o tino katoa kolā ne ‵tupu mai i a Manase.

7 Kae ko te tuakoi o Manase ne vau mai i Asela ke oko eiloa ki Mikimetata,+ telā e fakasaga atu ki Sekema,+ kae ne tele atu loa te tuakoi tenā ki saute* ki te laukele o tino e ‵nofo i Enitapua. 8 A te laukele o Tapua+ ne tuku atu ki a Manase, kae ko te fakai o Tapua i te tuakoi o Manase i o tino kolā ne ‵tupu mai i a Efalaima. 9 Kae ne fanaifo te tuakoi ki lalo i te Vanu o Kanaha, ki te feitu ki saute o te vanu. E isi ne fakai o Efalaima e ‵tu fakatasi mo fakai o Manase,+ kae ko te tuakoi o Manase e tu ki te feitu ki mātū o te vanu, kae gata i te tai.+ 10 A te feitu ki saute i o Efalaima, kae ko te feitu ki mātū i o Manase, kae ko tena tuakoi ko te tai,+ kae i te feitu ki mātū e oko atu eiloa latou* ki Asela mo te feitu ki saegala, ki a Isakala.

11 I kogā fenua o Isakala mo Asela, ne tuku atu ki a Manase a Peta-seana mo ana fakai fo‵liki, Ipeleamo+ mo ana fakai fo‵liki, ko tino e ‵nofo i To+ mo ana fakai fo‵liki, ko tino e ‵nofo i Enetolo+ mo ana fakai fo‵liki, ko tino e ‵nofo i Tanaka+ mo ana fakai fo‵liki, ko tino e ‵nofo i Mekito mo ana fakai fo‵liki, ne fakai ma‵luga e tolu.

12 Kae ko tino kolā ne ‵tupu mai i a Manase ne seki mafai o puke ne latou a fakai konei; ne ‵nofo eiloa a tino Kanana i te fenua tenei.+ 13 I te taimi ko gasolo ei o ma‵losi a tino Isalaelu, ne fai ne latou ke galue ‵mafa+ a tino Kanana, kae seki afuli eiloa kea‵tea ne latou.+

14 Ne fai atu a tino ne ‵tupu mai i a Iosefa ki a Iosua: “Kaia ne tuku mai ei ne koe ki a matou* se tofi e tasi,+ mo se vaega e tasi o te laukele ke fai mo omotou tofi? A matou nei e tokouke ‵ki, me i a Ieova ko oti ne fakamanuia ne ia matou ke oko mai eiloa ki te taimi nei.”+ 15 Ne tali atu a Iosua ki a latou: “Kafai e tokouke ‵ki a koutou, olo ki te togavao o ‵vele se koga mō koutou i te fenua o tino Pelise+ mo tino Lefaima,+ me ko tō fo‵liki a koga maugā o tino Efalaima+ mō koutou.” 16 Tenā ne fai atu ei a tino ne ‵tupu mai i a Iosefa: “E se lava a koga maugā mō matou, kae ko tino Kanana katoa kolā e ‵nofo i te vanu* e isi ne olotou kaliota tau+ mo fiti makai‵kai,* ko latou kolā i Peta-seana+ mo ana fakai fo‵liki* mo latou kolā i te Vanu* o Ieseleelu.”+ 17 Ne fai atu ne Iosua a pati konei ki tama a Iosefa, ki a Efalaima mo Manase: “A koutou ne tino tokouke, kae ko koutou e ma‵losi ‵ki. Ka se maua fua ne koutou se tofi e tasi,+ 18 kae ko koga maugā ka fai foki mō koutou.+ E tiga eiloa e fai pelā me se togavao, e ‵tau o ‵vele ne koutou, kae tenā te gataga o te otou kogā fenua. Me ka afuli ne koutou kea‵tea a tino Kanana, faitalia me e ma‵losi latou kae isi foki ne olotou kaliota tau mo fiti makai‵kai i ei.”*+