Iosua
24 Ne fakamaopoopo mai ne Iosua a matakāiga katoa o Isalaelu i Sekema kae fakamaopoopo mai foki a toeaina o Isalaelu, olotou ulu o kāiga, olotou famasino mo olotou ofisa+ kae ne ‵tu atu latou i mua o te Atua tonu. 2 Ne fai atu a Iosua ki tino katoa: “Konei a pati a Ieova te Atua o Isalaelu ne fai mai, ‘A otou tupuga+ ne ‵nofo i te suā feitu o te Vaitafe* i aso mua eiloa+—ko Tala te tamana o Apelaamo mo te tamana o Nakoli—kae ne masani o tavini atu latou ki nisi atua.+
3 “‘Fakamuli ifo ne puke ne au a te otou tupuga ko Apelaamo+ mai te suā feitu o te Vaitafe* kae fai ke sasale i loto i te fenua kātoa o Kanana kae ke fakatokouke ana tama.*+ Ne tuku ne au ki ei a Isaako;+ 4 kae ki a Isaako ne tuku ne au ki ei a Iakopo mo Esau.+ Fakamuli ifo ne tuku ne au ki a Esau a te Mauga o Seila ke fai mō ia;+ kae ko Iakopo mo ana tama tāgata ne olo ifo ki lalo i Aikupito.+ 5 Ne uga fakamuli atu ne au a Mose mo Alona,+ kae ne fai ne au ke isi ne mala i Aikupito,+ tenā ne aumai ei ne au koutou ki tua. 6 I te taimi ne aumai ei ne au otou tupuga ki tua mo Aikupito+ kae oko atu koutou ki te tai, ne afuli ne tino Aikupito otou tupuga ki kaliota tau mo olotou kautau ke oko atu ki te Tai Kula.+ 7 Ne kamata o ‵tagi atu latou ki a Ieova,+ tenā ne fai ei ne ia ke pouli te va o koutou mo tino Aikupito kae faka‵tafe mai te tai ki luga i a latou kae ufi ei latou,+ kae ne lavea ne koutou ki otou mata a te mea ne fai ne au i Aikupito.+ Tenā ne ‵nofo ei koutou i te koga lavaki i te fia o tausaga.*+
8 “‘Kae ne aumai ne au koutou ki te laukele o tino Amoli kolā ne ‵nofo i te suā feitu* o te Iolitana, kae ne taua atu latou ki a koutou.+ Kae ne tuku atu ne au latou ki otou lima ko te mea ke mafai o puke mō koutou a te lotou laukele, kae ‵ta fakapalele ne au latou i otou mua.+ 9 Tenā ne tu aka ei a Palako te tama tagata a Sipola, te tupu o Moapi, kae taua atu ki Isalaelu. Tenā ne ‵kami mai ei ne ia a Palaamo te tama tagata a Piolo ke fakamalaia koutou.+ 10 Kae ne seki fakalogo eiloa au ki a Palaamo.+ Tenā ne fakamanuia faeloa ne ia koutou,+ kae ne faka‵sao ne au koutou mai i ana lima.+
11 “‘Tenā ne olo ei koutou ki te suā feitu o te Iolitana+ kae oko atu ki Ieliko.+ Ne taua atu ki a koutou a takitaki* o Ieliko, ko tino Amoli, tino Pelise, tino Kanana, tino Heti, tino Kilikase, tino Hivi mo tino Iepuse, kae ne tuku atu ne au latou ki otou lima.+ 12 Tenā ne uga ei ne au te lagonaga mataku* ke mua i a koutou, kae ne afuli kea‵tea i ei a latou mai otou mua+—ko tupu e tokolua o tino Amoli. E seki fai penā e auala i otou pelu io me ko otou kausana.+ 13 Tela la, ne tuku atu ne au ki a koutou se laukele telā ne seki galue fi‵ta koutou ki ei mo fakai kolā ne seki faite ne koutou,+ kae ne ‵nofo koutou i ei. A koutou e ‵kai mai togavine mo togaolive kolā e seki ‵toki ne koutou.’+
14 “Tela la, ke na ma‵taku ki a Ieova kae tavini atu ki a ia i te loto fakamaoni* mo te amiotonu,*+ kae fakaseai atu a atua kolā ne tavini ki ei otou tupuga i te suā feitu o te Vaitafe* mo Aikupito,+ kae ke tavini atu ki a Ieova. 15 Kae kafai e se ‵lei ki a koutou a te tavini atu ki a Ieova, ke filifili la koutou i te aso nei me ko oi ka tavini koutou ki ei,+ me ko atua o otou tupuga kolā ne tavini atu latou ki ei i te suā feitu o te Vaitafe*+ io me ko atua o tino Amoli kolā e ‵nofo nei koutou i olotou laukele.+ Kae ko au mo toku kāiga, ka tavini eiloa matou ki a Ieova.”
16 Kae ne tali atu a tino: “E seki mafau‵fau eiloa matou ke tiakina a Ieova kae tavini atu ki nisi atua. 17 Ko Ieova te motou Atua ne aumai ne ia matou mo omotou tupuga ki tua mo te fenua ko Aikupito,+ kea‵tea mai te koga ne ‵nofo pologa+ ei matou, kae ne fai ne ia a fakailoga fakaofoofogia konei i omotou mua+ kae ne tausi faeloa ne ia matou i te auala kātoa ne sa‵sale matou i ei e pelā foki mo fenua katoa ne ui atu matou i ei.+ 18 Ne afuli kea‵tea ne Ieova a tino katoa, e aofia ei a tino Amoli, kolā ne ‵nofo muamua i te laukele tenei. Tela la, a matou foki ka tavini eiloa ki a Ieova, me i a ia ko te ‵tou Atua.”
19 Tenā ne fai atu ei a Iosua ki tino konā: “A koutou e se mafai o tavini atu ki a Ieova, me i a ia se Atua tapu;+ a ia se Atua telā e manako ke tapuaki+ atu fua koutou ki a ia tokotasi. Ka se fakamagalo ne ia otou amioga solitulafono* mo otou agasala.+ 20 Kafai e tiaki ne koutou a Ieova kae tavini atu ki atua fakaa‵tea, ka fulitua atu foki a ia ki a koutou kae fakaseai atu koutou faitalia me ko oti ne fai ne ia a mea ‵lei mō koutou.”+
21 Kae ne fai atu a tino konā ki a Iosua: “Ikai, a matou ka tavini atu eiloa ki a Ieova!”+ 22 Tenā ne fai atu ei a Iosua ki tino konā: “A koutou ko molimau ki a koutou eiloa me ko otou loto eiloa ne filifili ei ne koutou ke tavini atu ki a Ieova.”+ Kae ne fai atu latou: “A matou ko molimau ki ei.”
23 “Tela la, ave kea‵tea a atua fakaa‵tea konā mai i a koutou, kae tuku atu otou loto ki a Ieova te Atua o Isalaelu.” 24 Ne fai atu a tino konā ki a Iosua: “A matou e tavini atu eiloa ki a Ieova te motou Atua, kae ka faka‵logo matou ki tena leo!”
25 Ne fai ne Iosua se feagaiga mo tino konā i te aso tenā kae fai ne ia se tulafono foliki mo se fakatonuga mō latou i Sekema. 26 Tenā ne tusi ei ne Iosua a pati konei i te tusi o Tulafono a te Atua+ kae puke ne ia se fatu lasi+ kae fakatu mai lalo o se lakau lasi telā e tu i tafa o te koga tapuaki o Ieova.
27 Ne toe fai atu a Iosua ki tino katoa: “Kiloke! A te fatu tenei ka fai pelā me se molimau ki a tatou,+ me ko oti ne lagona ne ia a mea katoa ne faipati mai ne Ieova ki a tatou, kae ka fai pelā me se molimau ki a koutou, ko te mea ke se fakafiti ne koutou te otou Atua.” 28 Tenā ne uga atu ei ne Iosua a tino ke olo, ko tino taki tokotasi ki olotou tofi.+
29 I te otiga o mea konei, ne mate atu ei a Iosua te tama tagata a Nuno te tavini a Ieova, kae ko 110+ ana tausaga. 30 Tenā ne tanu ei ne latou a ia i te kogā fenua o tena tofi i Timenata-sela,+ telā e tu i te koga maugā o Efalaima, i te feitu ki mātū o te Mauga o Kaasa. 31 Ne tumau eiloa o tavini atu a Isalaelu ki a Ieova i aso katoa o Iosua mo aso katoa o toeaina kolā ne ola kae ko oti ne mate atu a Iosua kae ne iloa ne latou a faifaiga ne fai ne Ieova mō Isalaelu.+
32 A ivi o Iosefa+ kolā ne puke mai ne tino Isalaelu mai Aikupito, ne tanu ifo i Sekema i te vaega o te manafa telā ne ‵togi mai ne Iakopo mai tama tāgata a Hamola,+ te tamana o Sekema, ki tupe e 100;+ kae ne fai mo fai te tofi o tama tāgata a Iosefa.+
33 Ne mate foki a Eleasalo te tama tagata a Alona.+ Ne tanu ne latou a ia i te Tamā Mauga o Fineaso tena tama tagata,+ telā ne tuku atu ki a ia i te koga maugā o Efalaima.