Iosua

8 Ne fai atu a Ieova ki a Iosua: “Sa mataku io me polepole.+ Puke ne koe a sotia katoa kae olo atu o taua ki Ai. Kiloke, ko oti ne tuku atu ne au ki a koe a te tupu o Ai, ana tino, tena fakai, mo tena fenua.+ 2 Ke fai ne koe ki te fakai o Ai mo tena tupu a te mea ne fai ne koe ki te fakai o Ieliko mo tena tupu,+ kae i te taimi nei e mafai o puke ne koe a mea e maua ne koe i te taua ma koe e pelā foki mo lafu manu katoa. Ke faka‵muni ne koe se kautau i te feitu ki tua o te fakai.”

3 Tenā ne olo atu ei a Iosua mo sotia katoa o taua atu ki Ai. Ne filifili ne Iosua e toko 30,000 toa ‵mafi kae uga atu latou i te po. 4 Ne fai atu ne ia ki a latou a te fakatonuga tenei: “Kiloke, e ‵tau mo koutou o ‵muni i te feitu ki tua o te fakai. Ke mo a ma olo koutou ke ‵mao ‵ki mo te fakai, kae e ‵tau o toka koutou katoa. 5 Kae ko au mo tino katoa konei ka fakapili‵pili atu ki te fakai, kae kafai ko o‵mai latou o taua ki a matou e pelā mo te taimi muamua,+ ka ‵tele kea‵tea matou mai i a latou. 6 Kafai ko o‵mai latou o afuli matou, kae ave ne matou a latou ke ‵mao mo te fakai, me ka fai aka latou, ‘Ko ‵tele kea‵tea foki latou mai i a tatou e pelā mo te taimi muamua.’+ Kae ka ‵tele kea‵tea eiloa matou mai i a latou. 7 Tenā ko ‵tu aka ei koutou mai i otou koga ‵muni kae puke te fakai; ka tuku atu ne Ieova te otou Atua a te fakai tenā ki otou lima. 8 I te taimi eiloa ko puke ei ne koutou a te fakai, e ‵tau o ‵sunu ne koutou ki te afi.+ E ‵tau o fai ne koutou e pelā eiloa mo muna a Ieova. Kiloke, ko oti ne tuku atu ne au ki a koutou a fakatonuga konei.”

9 Ne uga ne Iosua latou ke olo, māti atu ei ki te koga telā ka ‵muni ei latou; ne ‵muni latou i se koga i te va o Peteli mo Ai, ki te feitu ki togala o Ai, kae ko Iosua ne ‵nofo fakatasi mo ana tino i te po tenā.

10 I te alaakaga a Iosua i te tafataeao ‵malu ne fakamaopoopo mai ne ia a kautau katoa, kae ‵taki atu ne ia fakatasi mo toeaina o Isalaelu ki Ai. 11 Ne māti atu a sotia+ katoa kolā ne ‵nofo mo ia kae olo atu eiloa ki te feitu ki mua o te fakai. Ne ‵nofo latou i te feitu ki mātū o Ai, kae e isi se vanu i te kogāloto o latou mo Ai. 12 I te taimi tenā, ko oti ne ave ne ia a tāgata e toko 5,000 o faka‵muni+ i te va o Peteli+ mo Ai, i te feitu ki togala o te fakai. 13 Ne fakatu aka ne tāgata a te koga ke ‵nofo ei latou i te feitu ki mātū o te fakai,+ kae ko leoleo tafa ki tua ne ‵nofo i te feitu ki togala o te fakai,+ kae ko Iosua ne fano i te po tenā ki te kogaloto o te vanu.

14 Kae i te taimi ne lavea ei ne te tupu o Ai a te mea tenei, ne olo fakavave atu a ia fakatasi mo tāgata o te fakai i te tafataeao ‵malu o taua atu ki tino Isalaelu i se koga telā e mafai o lavea mai i ei a te koga laugatasi. Kae e se iloa lele eiloa ne ia me e isi se kautau e ‵muni i te feitu ki tua o te fakai kolā ka taua atu ki a ia. 15 I te taimi ne taua atu ei a tāgata Ai, ne ‵tele kea‵tea a Iosua mo Isalaelu kātoa i te auala ki te koga lavaki.+ 16 Tenā ne fakatonu atu ei ki tino katoa i te fakai ke ‵tele o afuli a latou; kae i te taimi ne afuli ei ne latou a Iosua ne gasolo loa o ‵mao latou mai te fakai. 17 E seai eiloa se tagata ne ‵toe i Ai mo Peteli me ne olo atu katoa o afuli a tino Isalaelu. Ne tiaki ne latou a mataloa o te fakai ke ma‵tala kae olo o afuli a tino Isalaelu.

18 Ne fai atu a Ieova ki a Iosua: “Sisi aka te tao tenā i tou lima kae fakasaga atu ki Ai,+ me ka tuku atu ne au ki ou lima a te fakai tenā.”+ Tenā ne sisi aka ei ne Iosua a te tao i tena lima kae fakasaga atu ki te fakai. 19 I te taimi eiloa ne sisi aka ei tena lima, ne ‵tu fakavave aka te kautau kolā ne ‵muni kae ‵tele atu ki loto i te fakai kae puke ne latou. Ne ‵sunu fakavave ne latou te fakai.+

20 I te ‵kilomaiga o tāgata Ai ki olotou tua, lavea ei ne latou te au e fanaka ki te lagi, kae ko seai se lotou malosi o ‵tele atu ki se isi koga. Kae ko tāgata kolā ne ‵tele ki te koga lavaki ne ma‵fuli mai o taua atu ki a latou. 21 I te laveaga ne Iosua mo Isalaelu kātoa me ko oti ne puke ne tāgata kolā ne ‵muni a te fakai, kae lavea foki ne latou a te au mai te fakai e fanaka ki luga, ne ma‵fuli mai latou o taua atu ki tāgata Ai. 22 Kae ne o‵mai a nisi tino ki tua mo te fakai o taua ki a latou, kae ko seai se koga ke ‵tele ki ei a tāgata Ai, me e isi ne tino Isalaelu i te feitu e tasi kae ko nisi tino o latou i te suā feitu, kae ne tamate ne latou a tino konā ke oko ki te taimi ko seai eiloa se tino e ola io me se tino ne sao i ei.+ 23 Kae ne puke ne latou a te tupu o Ai+ kae aumai ki mua o Iosua.

24 I te otiga ne tamate ne tino Isalaelu a tino katoa e ‵nofo i Ai i te vao, i te koga lavaki telā ne afuli ne latou a tino Isalaelu ki ei, kae ko oti ne tamate atu a latou katoa ki te pelu, ne olo atu ei a Isalaelu kātoa ki Ai o tamate a tino i ei ki te pelu. 25 A tino katoa kolā ne ‵mate i te aso tenā, ko tāgata mo fāfine, e ‵tusa mo te toko 12,000, ko tino Ai katoa. 26 Ne seki tuku ifo eiloa ne Iosua tena lima telā e sisi i te tao+ ke oko ki te taimi ko oti ne ‵ta fakapalele ei ne ia a tino katoa e ‵nofo i Ai.+ 27 Kae ne puke ne tino Isalaelu a lafu manu katoa mo mea katoa i te fakai ma latou, e ‵tusa mo fakatonuga ne tuku ne Ieova ki a Iosua.+

28 Tenā ne ‵sunu ei ne Iosua te fakai ko Ai kae fakaseai e pelā me se fakaputuga kaiga,+ ke oko mai eiloa ki te aso nei. 29 Ne fakatautau ne ia te tupu o Ai i luga i se pou* ke oko eiloa ki te afiafi, kae i te taimi ko pili ei o tō te mata o te la, ne fakatonu atu a Iosua ke tuku ifo tena foitino mai te pou.+ Kae ne ‵pei atu ne latou ki te mataloa o te fakai kae fakatu ne latou se fakaputuga fatu mai luga i ei, kae koi tu mai eiloa ki te aso nei.

30 Tenā foki te taimi ne faite ei ne Iosua se fatafaitaulaga i te Mauga o Epalu+ ki a Ieova te Atua o Isalaelu, 31 e pelā eiloa mo te fakatonuga ne fai atu ne Mose te tavini a Ieova ki tino Isalaelu kae tusi i loto i te tusi o te Tulafono+ a Mose: “Se fatafaitaulaga telā ne faite ki fatu kātoa kae seki fakaaoga eiloa ki ei se mea faigaluega fiti.”+ Ne ofo atu ne latou i luga i ei a taulaga ‵sunu ki a Ieova e pelā foki mo taulaga ‵kai fakatasi.+

32 Tenā ne tusi ei ne ia i luga i fatu konā se ‵kopi o te Tulafono+ telā ne tusi ne Mose i mua o tino Isalaelu.+ 33 Ne ‵tu atu a tino Isalaelu katoa, olotou toeaina, ofisa, mo olotou famasino i feitu e lua o te Pusa i mua o faitaulaga Levi kolā ne sau ne latou a te pusa o te feagaiga a Ieova. Ne ‵nofo atu foki i konā a tino fakaa‵tea mo tino tonu o te fenua.+ Ne ‵tu atu a te āfa o latou i mua o te Mauga o Kelisima, kae ko te suā āfa i mua o te Mauga o Epalu+ (e pelā eiloa mo te fakatonuga ne fai muamua atu ne Mose te tavini a Ieova),+ ke fakamanuia atu a tino Isalaelu. 34 Oti aka, faitau ei ne ia i se leo maluga a pati katoa i te Tulafono,+ ko fakamanuiaga+ mo fakamalaiaga,+ e ‵tusa mo mea katoa kolā e tusi i te tusi o te Tulafono. 35 E seai eiloa se pati i pati katoa a Mose kolā ne fakatonu atu ki a Iosua ne seki faitau atu ki luga i mua o te fakapotopotoga kātoa o Isalaelu,+ e aofia i ei a fāfine mo tama‵liki mo tino fakaa‵tea+ kolā e ‵nofo* tasi latou.+