Te Muamua Tupu

5 I te taimi ne logo ei a Hilamo te tupu o Tulo+ me ko oti ne ‵tofi a Solomona mo fai te tupu o sui tena tamana, ne uga atu ne ia ana tavini ki a Solomona, me i a Hilamo ne fai faeloa pelā me se taugasoa o Tavita.*+ 2 Kae ne avatu te fekau a Solomona ki a Hilamo:+ 3 “E iloa ‵lei ne koe i toku tamana ko Tavita ne seki mafai ne ia o faite se fale mō te igoa o Ieova tena Atua ona ko taua kolā ne fai atu ki a ia mai feitu katoa ke oko ki te taimi ne tuku ei ne Ieova ana fili mai lalo i ana alofivae.+ 4 Kae ko oti ne tuku mai ne Ieova toku Atua i te taimi nei a te malōlōga ki a au mai feitu katoa.+ E seai se tino e ‵teke mai ki a au kae seai ne mea ma‵sei e ‵tupu.+ 5 Tela la, au e mafaufau o faite se fale mō te igoa o Ieova toku Atua, e pelā eiloa mo te tautoga tenei a Ieova ki a Tavita toku tamana, ana muna: ‘A tau tama telā ka tuku ne au i luga i tou nofogaaliki o sui koe, ko ia tenā ka faite ne ia te fale mō toku igoa.’+ 6 Nei la, fakatonu ou tino ke ‵kati a alasi o Lepanona+ ma aku. Aku tavini ka ga‵lue tasi mo au tavini, kae ‵togi ne au a peofuga o au tavini e ‵tusa mo te ‵togi telā e fai mai ne koe, ona ko te mea e iloa ne koe me seai se tino i a matou e iloa ne ia o ‵kati a lakau e pelā mo tino Saitonu.”+

7 I te logoga a Hilamo i pati a Solomona, ne fiafia malosi a ia kae fai aka: “Ke vikia a Ieova i te aso nei, me ne tuku ne ia ki a Tavita se tama tagata poto ke pule ki tino e tokouke konei!”+ 8 Tenā ne avatu ei te fekau a Hilamo ki a Solomona: “Ko oti ne lagona ne au tau fekau telā ne uga mai. Ka fai ne au a mea katoa kolā e manako koe ki ei i te fakatokaga o lakau ko alasi mo iunipa.+ 9 Ka ave ifo ne aku tavini mai Lepanona ki te tai, ko saisai tasi ei ne au a lakau ke avatu i te tai ki te koga e fakasino mai ne koe ki a au. Ko fai ei ne au ke talatala i konā, ko ave ei ne koe kea‵tea. Ke fesuiaki mo lakau konā, ke fakatoka mai ne koe a meakai kolā e fakamolemole atu au ki ei ma toku kāiga.”+

10 Tenā ne fakatoka ei ne Hilamo a lakau ko alasi mo iunipa kolā ne manako ki ei a Solomona. 11 Kae ne tuku atu ne Solomona ki a Hilamo e 20,000 koli* o saito e pelā me ne meakai ma tena kāiga kae 20 koli o sinu olive ‵lei. Konā a mea ne tuku atu ne Solomona ki a Hilamo i tausaga katoa.+ 12 Kae ne tuku atu ne Ieova ki a Solomona a te poto, e pelā eiloa mo Tena tautoga ki a ia.+ Kae ne maua ne Hilamo mo Solomona se va filemu, kae ne fai ne lāua tokolua se feagaiga.

13 Ne ‵tofi aka ne te Tupu ko Solomona a tino kolā e ‵tau o ga‵lue mō te tupu mai Isalaelu kātoa; e toko 30,000 tāgata.+ 14 E uga atu ne ia latou ki Lepanona i potukau e taki toko 10,000 i masina takitasi. E ‵nofo latou i Lepanona i se masina e tasi kae lua masina i olotou fale; kae ko Atonilama+ se tokotasi o tino kolā ne ‵tofi aka ke galue fakagamua mō te tupu. 15 E toko 70,000 a tino ga‵lue masani a Solomona kae toko 80,000 a tino ‵kati fatu+ i mauga,+ 16 e pelā foki mo pule lagolago+ a Solomona e toko 3,300 kolā e ga‵lue pelā me ne tino fakatonutonu o onoono ki tino ga‵lue. 17 Mai luga i te fakatonuga a te tupu, ne keli aka ne latou a fatu ‵lasi,+ mo fatu ‵togi ‵mafa ke fakatakato ki ei te fakavae+ o te fale fakatasi mo fatu kolā ne ‵kati.+ 18 Tenā ne ‵kati ei ne tino ga‵lue a Solomona mo tino ga‵lue a Hilamo mo tino Kepola+ a fatu, kae fakatoka ne latou a lakau mo fatu mo faite te fale.