Iopu
29 Ne toe faka‵soko a te faipatiga* a Iopu, ana muna:
2 “Moi fai eiloa ne nofo au i te fia masina ko ‵teka,
I aso ne tausi ei au ne te Atua,
3 I te taimi ne fakamaina mai ei ne ia tena moli ki luga i toku ulu,
I te taimi ne sasale ei au i te pouliga e auala i tena mainaga,+
4 I te taimi* koi talavou ei au,
I te taimi ne maua ei ne au se va fakataugasoa ‵lei mo te Atua,+
5 I te taimi koi fakatasi mai ei te Atua Malosi Katoatoa ki a au,
I te taimi ne ‵nofo mai ei aku tama‵liki* i oku tafa,
6 I te taimi ne ufi ei oku kalafaga i pata,
Kae ‵tafe mai i kaupapa a vaitafe o sinu ma aku.+
7 I te taimi ne fano sāle ei au ki mataloa o te ‵pui o te fakai,+
Kae sagasaga i nofoga i te malae,+
8 Ka lavea au ne tama‵liki tāgata kae fakatafa latou kea‵tea,*
Ke oko ki tāgata ma‵tua e ‵tu latou ki luga, ko ‵tu i ei.+
9 A pelenise e taofi te lotou fai‵pati;
E tuku olotou lima ki luga i olotou gutu.
10 A leo o tāgata takutakua ko se lagona;
A olotou alelo ko ‵piki ki te feitu ki luga o olotou gutu.
11 So se tino e lagona ne ia au, e faipati ki mea ‵lei e uiga ki a au,
Kae ko latou kolā e lavea ne latou au e molimau e uiga ki a au.
12 Me e fakasao ne au te tino mativa telā e kalaga mō se fesoasoani,+
Fakatasi mo te tamaliki e seai sena tamana mo so se tino telā e seai sena fesoasoani.+
13 A te tino telā ko pili o mate e fakamanuia ne ia au,+
Kae e fai ne au te loto o te fafine ko mate tena avaga ke fiafia.+
14 E pei au ki te amiotonu e pelā me ko oku gatu;
A taku fakamasinoga tonu ne fai pelā me se gatu ‵loa* mo se pulou laugatu.
15 Ne fai au e pelā me ne mata ki tino ‵kivi
Mo vae ki tino vae ma‵sei.
17 E ‵fati ne au a kauvae o te tino fai mea ‵se+
Kae ‵fao ne au mai i ana nifo a te mea ne ‵po ne ia.
18 E masani sāle au o fai atu, ‘Au ka mate i toku fale,*+
Kae ko oku aso ka uke eiloa e pelā me ne one.
19 Ka ‵solo atu oku aka ki loto i vai,
Kae ko te ‵sau ka nofo eiloa i te po kātoa i luga i oku kaula.
20 A toku ‵malu e fakafou faeloa,
Kae ka sana atu faeloa ne au a te kausana i toku lima.’
21 A tino e fakalogo‵logo mai mo te fia‵fia,
E fakatali‵tali malie ki aku pati fakatonutonu.+
22 Ka oti au ne faipati, e se toe ai ne olotou pati e fai;
E ‵tagi ‵gali aku pati ki olotou taliga.
23 Ne faka‵tali latou ki a au e pelā me faka‵tali ki te vaiua;
E faka‵maga malosi olotou gutu e pelā me faka‵maga ki te vaiua i te tau e ‵somo aka ei a lau o lakau.+
24 Kafai e fakamisikata au ki a latou, ko oko eiloa i te lotou loto fia‵fia ki ei;
A te mata fiafia i oku mata e fakamalosi atu ki a latou.*