Ielemia
17 “A te agasala a Iuta ko oti ne tusi ki lalo ki te ‵peni fiti.
Ne tā i olotou loto ki te taemani makaikai
Kae i luga foki i suki o olotou fatafaitaulaga,
2 E masaua ne olotou tama tāgata olotou fatafaitaulaga mo olotou pou lakau tapu*+
I tafa o se lakau ola ‵lei, i tamā mauga ma‵luga,+
3 I luga i mauga i te vao.
Ou kope mo ou koloa katoa ka tuku atu ne au ke kaisoa+
—Ao, ko ou koga ma‵luga ona ko agasala i loto i ou kogā fenua.+
4 Ka tiaki ne koe, i tou loto eiloa, a tou tofi telā ne tuku atu ne au ki a koe.+
Kae ka fai ne au koe ke tavini atu ki ou fili i se fenua e se iloa ne koe,+
Me ne fakaoso ne koe toku kaitaua e pelā me se afi.+
Ka ‵ka eiloa toku kaitaua i taimi katoa.”
5 Konei a pati a Ieova ne fai mai:
“Ke malaia a te tagata* telā e talitonu fua ki tino,+
Telā e fakalagolago ki malosi o tino,+
Kae ko tena loto e ‵fuli kea‵tea mai i a Ieova.
6 Ka fai a ia e pelā me se lakau e tu tokotasi i te toafa.
E se lavea ne ia a te mea ‵lei māfai ko oko mai,
Kae ka nofo a ia i koga e seai ne vai i ei i te koga lavaki,
I se fenua e ‵fonu i masima telā e seai se tino e mafai o ola i ei.
8 Ka fai a ia e pelā me se lakau ne ‵toki i tafa o vai,
Telā e ‵tele atu ana aka ki tamā vaitafe.
E se lagona ne ia māfai ko oko mai te ‵vela,
Kae ko ana lau ka lauolaola faeloa.+
Kae i te tausaga o te tau la e se manavase a ia,
Io me taofi aka te ‵fua mai o ana fuataga.
9 A te loto e sili atu tena faitogafiti* i lō so se isi mea aka kae e fakamataku.*+
Ko oi e mafai o iloa ne ia?
10 Au, Ieova, e iloilo ne au a loto,+
E sukesuke ne au a toe mafaufauga ‵loto,*
Ke tuku atu ki tino taki tokotasi e ‵tusa mo olotou auala,
E ‵tusa mo fuataga o olotou galuega.+
11 E pelā me se manu eva o te vao telā e fakamaopoopo ne ia a fua kolā e seki faka‵to ne ia,
Ka tiaki ne latou a ia i te kogaloto o tena olaga,
Kae i te fakaotiga ka fai a ia e pelā me se tino valea.”
12 A te nofogaaliki ‵malu telā ne fakamaluga aka i te kamataga,
Ko te koga e tu ei te ‵tou koga tapuaki.+
13 Ieova, ko koe te fakamoemoega o Isalaelu,
A latou katoa kolā e tiaki ne latou koe ka ma‵vale.
A latou kolā e ‵fuli kea‵tea mai i a koe* ka tusi olotou igoa i te ‵pefu,+
Me ne tiaki ne latou a Ieova, te pogai o te vai o te ola.+
14 Faka‵lei mai au, e Ieova, kae ka ‵lei au.
Fakasao mai au, kae ka sao au,+
Me ko koe eiloa e tavae ne au.
15 Kiloke! E isi ne tino kolā e fai mai ki a au:
“Tefea te muna a Ieova?+
Fakamolemole, fakaoko mai aka!”
16 Kae e pelā mo au, ne seki tele au kea‵tea mai i te tautali atu i a koe e pelā me se tausi mamoe,
Kae ne seki olioli foki au ke oko mai te aso o te puapuaga.
E iloa ‵lei ne koe a mea katoa ne faipati oku laugutu ki ei;
Ne ‵tupu katoa a mea konā i ou mua!
17 Sa fai pelā me se mea fakamataku ki a au.
A koe ko toku lafiga i te aso o te puapuaga.
18 Fai ke masiasi a tino kolā e fakasaua mai ki a au,+
Kae sa fai ke mavale au.
Fai ke oko atu ki a latou te mataku.
Kae sa fai ke oko mai ki a au te mataku.
Fakaoko atu te aso o te puapuaga ki a latou,+
Kae tuki pala atu latou kae fakaseai katoatoa atu latou.*
19 Konei a pati a Ieova ne fai mai ki a au: “Fano o tu i mataloa o tama tāgata a tino kolā e olo i ei a tupu o Iuta ki loto mo tua, mo mataloa katoa o ‵pui o Ielusalema.+ 20 E ‵tau mo koe o fai atu ki a latou, ‘Faka‵logo mai ki muna a Ieova, koutou e tupu o Iuta, ko tino Iuta katoa, mo tino katoa e ‵nofo i Ielusalema, kolā e ulu mai i mataloa konei. 21 Konei a pati a Ieova ne fai mai: “Ke fakaeteete koutou, kae ke mo a ma amo ne amoga i te Sapati io me aumai ki loto i mataloa o ‵pui o Ielusalema.+ 22 E se ‵tau mo koutou o aumai ne amoga a koutou ki tua mo otou fale i te Sapati; kae e se ‵tau mo koutou o fai so se galuega.+ Tausi te Sapati ke ‵malu, e pelā eiloa mo taku fakatonuga ki otou tupuga.+ 23 Kae ne seki faka‵logo latou io me tuku mai olotou taliga, kae ne ita latou mo te loto ma‵keke ma faka‵logo io me talia a pati polopoloki.”’+
24 “‘“Kae kafai e faka‵logo faka‵lei mai koutou ki a au,” ko te folafolaga a Ieova, “kae e se aumai ne koutou ne amoga ki loto i mataloa o ‵pui o te fakai tenei i te Sapati, kae e tausi ne koutou te Sapati ke ‵malu kae e se fai ne galuega i ei,+ 25 tenā ko ulu mai ei a tupu mo pelenise kolā e saga‵saga i te nofogaaliki o Tavita+ ki loto i mataloa o ‵pui o te fakai tenei, e ‵tele i kaliota mo solofanua, ko latou mo olotou pelenise, ko tāgata o Iuta mo tino kolā e ‵nofo i Ielusalema;+ kae ko te fakai tenei ka ‵nofo i ei a tino i taimi katoa. 26 Kae ka o‵mai a tino mai i fakai o Iuta, mai i koga i tafatafa o Ielusalema, mai te fenua o Peniamina,+ mai i koga ma‵lalo,+ mai i koga maugā, kae mai i te Nekepi,* e aumai ne latou a taulaga ‵sunu kātoa,+ nisi taulaga,+ taulaga meakai,+ pulu lipano, mo taulaga fakafetai ki te fale o Ieova.+
27 “‘“Kae kafai e se faka‵logo mai koutou ki a au mai te tausiga o te Sapati ke ‵malu kae e se amo ne koutou a amoga kae aumai a amoga konā ki loto i mataloa o ‵pui o Ielusalema i te Sapati, ka ‵sunu ne au ana mataloa ki te afi, kae ka ‵ka i ei a taoa ma‵losi o Ielusalema+ kae ka se mafai o tamate.”’”+