Numela

20 I te masina muamua, ne olo atu a te fakapotopotoga kātoa o tino Isalaelu ki te koga lavaki o Siina, kae ne ‵nofo atu latou i Katesa.+ Tenā te koga ne mate ei a Miliama+ kae ne tanu atu a ia i konā.

2 E seai ne vai a te fakapotopotoga,+ kae ne maopoopo fakatasi latou o ‵teke atu ki a Mose mo Alona. 3 Ne kinau atu a tino ki a Mose,+ olotou muna: “E ‵lei atu moi ne ‵mate matou i te taimi ne ‵mate ei omotou taina i mua o Ieova! 4 Kaia ne aumai ei ne koe te fakapotopotoga a Ieova ki te koga lavaki tenei ke ‵mate matou i ei fakatasi mo omotou manu?+ 5 Kae kaia ne ‵taki mai ei ne koe matou kea‵tea mo Aikupito ki te koga matagā tenei?+ E se mafai o ola i ei a fuagalakau, mati, vine io me ko pomekalanite, kae seai foki ne vai inu i ei.”+ 6 Tenā ne olo atu ei a Mose mo Alona ki mua o te fakapotopotoga ki te mataloa o te faleie o maopoopoga kae faka‵siga ifo mo lā mata e ‵fuli ki te laukele, kae ne fakasae mai i ei te ‵malu o Ieova ki a lāua.+

7 Tenā ne fai atu ei a Ieova ki a Mose: 8 “Puke te tokotoko kae fakamaopoopo mai te fakapotopotoga kātoa, ko koulua mo tou taina ko Alona, kae faipati atu ki te kaupapa i olotou mua eiloa ko te mea ke mafai o ‵sali mai ei te vai, kae ka aumai ne koe a vai mai te kaupapa kae tuku atu ki te fakapotopotoga mo olotou manu ke inu i ei.”+

9 Ne puke ne Mose te tokotoko mai mua o Ieova,+ e pelā eiloa mo Tena fakatonuga ki a ia. 10 Tenā ne fakamaopoopo ei ne Mose mo Alona te fakapotopotoga ki mua o te kaupapa, kae fai atu ki a latou: “Faka‵logo mai, koutou e tino ‵teke! E a, e ‵tau mo māua o aumai ne vai mō koutou mai te kaupapa tenei?”+ 11 I konā, ne sisi aka ei te lima o Mose kae ‵kini ne ia te kaupapa fakalua taimi ki tena tokotoko, kae ne ‵sali mai i ei a vai e uke, kae ne kamata o inu+ a te fakapotopotoga kātoa mo olotou manu.

12 Fakamuli ifo, ne fai atu a Ieova ki a Mose mo Alona: “Ona ko te mea ne seki fakaasi mai ne koulua te fakatuanaki ki a au kae faka‵malu au i mua o tino Isalaelu, ka se ave ne koulua a te fakapotopotoga tenei ki te fenua telā ka tuku atu ne au ki a latou.”+ 13 A vai konei ko vai o Melipa,*+ te koga telā ne kinau i ei a tino Isalaelu mo Ieova ko te mea ke faka‵malugina a ia i loto i a latou.

14 Tenā ne uga atu ei ne Mose a avefekau mai Katesa ki te tupu o Etoma:+ “Konei a pati a tou taina ko Isalaelu+ ne fai mai, ‘E iloa ‵lei ne koe a fakalavelave kolā ne fe‵paki mo matou. 15 Ne olo atu omotou tupuga ki Aikupito,+ kae ne ‵nofo matou i Aikupito i tausaga* e uke,+ kae ne fai fakamasei matou mo omotou tupuga ne tino Aikupito.+ 16 Fakamuli loa, ne ‵tagi atu matou ki a Ieova+ kae ne lagona ne ia matou kae uga mai se agelu+ kae ne aumai kea‵tea matou mai Aikupito, kae konei matou ko ‵nofo i Katesa, se fakai telā e tu i te tuakoi o tou fenua. 17 Fakamolemole, talia mai ke olo atu matou i loto i tou fenua. Ka se olo atu matou i loto i otou fatoaga io me ko otou togavine, kae ka se inu matou ki vai mai otou vaikeli. Ka sa‵sale atu matou i te Auala o te Tupu e aunoa mo te ‵kilo atu ki te feitu fakaatamai io me ko te feitu fakamaui ke oko loa ki te taimi ko ‵to ei matou ki tua mo te otou fenua.’”+

18 Muna a Etoma ki a ia: “E se talia koutou ke o‵mai i loto i te motou fenua. Kafai e o‵mai koutou, ka fanatu au mo te pelu o fakafetaui ki a koe.” 19 Ne fai atu a tino Isalaelu: “Ka olo atu matou i loto i te auala lasi; kae kafai e inu matou mo omotou manu ki otou vai, ka ‵togi atu eiloa ne matou.+ E seai se mea aka e ma‵nako matou ki ei kae na ko te sa‵sale atu fua i loto i te otou fenua ki te suā feitu.”+ 20 Kae ne toe fai atu a ia: “E se talia koutou ke o‵mai i loto i konei.”+ I konā, ne vau ei a Etoma o taua atu ki a ia fakatasi mo tino e tokouke mo tena kautau malosi. 21 Ne seki talia eiloa ne Etoma a tino Isalaelu ke olo i loto i tena fenua; tenā ne olo ei kea‵tea a tino Isalaelu mai i a ia.+

22 Ne tiakina ne te fakapotopotoga kātoa o tino Isalaelu a Katesa kae olo atu ki te Mauga o Holo.+ 23 Tenā ne fai atu ei a Ieova ki a Mose mo Alona i te Mauga o Holo i te tuakoi o te fenua ko Etoma: 24 “A Alona ka fakatasi atu ki ana tupuga.*+ Ka se ulu atu a ia ki loto i te fenua telā ka tuku atu ne au ki tino Isalaelu, me i a koulua ne ‵teke ki taku fakatonuga e uiga ki te vai o Melipa.+ 25 Puke a Alona mo tena tama tagata ko Eleasalo kae aumai lāua ki luga i te Mauga o Holo. 26 Tapale a gatu+ o Alona kae fakapei atu ki a Eleasalo+ tena tama tagata, kae ko Alona ka mate i konā.”*

27 Ne fai eiloa ne Mose te fakatonuga a Ieova, kae ne ‵kake aka latou ki luga i te Mauga o Holo i mua o te fakapotopotoga kātoa. 28 Tenā ne tapale ei ne Mose a gatu o Alona kae fakapei atu ki a Eleasalo tena tama tagata. Oti aka, ne mate atu a Alona i konā i luga i te taulu o te mauga.+ Kae ko Mose mo Eleasalo ne olo ifo ki lalo mai te mauga. 29 I te iloaga ne te fakapotopotoga kātoa me ko mate a Alona, ne ‵tagi mautuutu ei a tino Isalaelu katoa ona ko Alona i aso e 30.+