Iosua
9 I te taimi ne ‵logo ei a tupu katoa i te feitu ki togala o te Iolitana+ i te mea ne tupu, a latou katoa kolā ne ‵nofo i koga maugā, i te Sefila,* i te matafaga o te Tai Lasi,*+ e penā foki mo tino i te feitu ki mua o Lepanona—ko tino Heti, tino Amoli, tino Kanana, tino Pelise, tino Hivi mo tino Iepuse+— 2 ne ‵kau fakatasi katoa latou o taua atu ki a Iosua mo Isalaelu.+
3 Ne ‵logo foki a tino e ‵nofo i Kipeona+ i te mea ne fai ne Iosua ki Ieliko+ mo Ai.+ 4 Ne gasue‵sue latou mo te poto kae tuku atu olotou meakai ki loto i taga masae‵sae i luga i olotou asini, fakatasi mo taga uaina kolā ne ma‵pa kae ko oti ne toe ‵sui faka‵lei; 5 ne ‵pei foki latou ki taka masae‵sae kolā ko oti ne toe ‵sui faka‵lei mo gatu masae‵sae. A olotou falaoa katoa ko ma‵lō fāka loa kae ko malipi‵lipi foki. 6 Tenā ne olo atu ei latou ki a Iosua i te koga e nofo ei a ia i Kilikala+ kae fai atu ki a ia mo tāgata Isalaelu: “A matou ne o‵mai mai i se fenua ‵mao. Nei la, ke fai aka se feagaiga i te va o tatou.” 7 Kae ne fai atu a tāgata Isalaelu ki tino Hivi:+ “Kāti a koutou ne tino fua e ‵nofo pili mai. E mafai pefea o fai ne matou se feagaiga mo koutou?”+ 8 Ne tali atu latou ki a Iosua: “A matou ko au tavini.”
Tenā ne fai atu ei a Iosua ki a latou: “Ko oi koutou, kae ne o‵mai koutou mai fea?” 9 Ne fai atu latou ki a ia: “Au tavini ne o‵mai mai i se fenua ‵mao ‵ki+ ona ko te igoa o Ieova tou Atua, me ko oti ne ‵logo matou i tena takutakua mo mea katoa ne fai ne ia i Aikupito+ 10 mo mea katoa ne fai ne ia ki tupu e tokolua o tino Amoli kolā ne ‵nofo i te suā feitu* o te Iolitana, ko te tupu o Hesepono ko Sekono+ mo te tupu o Pasana ko Oko,+ telā ne nofo i Asatalota. 11 Tenā ne fai mai ei omotou toeaina mo tino katoa o te fenua ki a matou, ‘Puke ne meakai ma koutou i te malaga kae olo atu o fakafetaui ki a latou. Fai atu ki a latou: “Ka fai matou mo fai otou tavini;+ ke fai aka nei se feagaiga i te va o tatou.”’+ 12 A falaoa konei ne aumai ne matou koi ‵vela eiloa i te aso ne tiakina ei ne matou omotou fale ke o‵mai ki konei. Kae nei e lavea ne koutou me ko ma‵lō ‵ki eiloa kae ko malipi‵lipi foki.+ 13 Kae ko taga uaina konei koi ‵fou eiloa i te taimi ne utu ei ne matou, kae nei ko oti ne ma‵pa.+ Kae ko omotou gatu mo taka ko masae‵sae ona ko te loa o te malaga.”
14 I konā eiloa, puke* ei ne tāgata konā a nisi meakai a latou, kae e seki fesili atu latou ki a Ieova e uiga ki ei.+ 15 Ne fai ne Iosua ke maua se va filemu mo latou+ kae fai foki se feagaiga mo latou ke mo a ma tamate latou, kae tenā te mea ne tauto atu a takitaki o te fakapotopotoga ke fai ne latou.+
16 Mai tua o aso e tolu, i te otiga ne fai ne latou se feagaiga mo tino konā, ne ‵logo latou me i tino konā e ‵nofo fua i se koga pili mai, i te koga eiloa tenā e ‵nofo ei latou. 17 Tenā ne olo atu ei a tino Isalaelu ki olotou fakai i te tolu o aso; a olotou fakai ko Kipeona,+ Kafila, Pelota mo Kiliata-iealima.+ 18 Kae ne seki taua atu a tino Isalaelu ki a latou me ko oti ne fai ne takitaki o te fakapotopotoga se tautoga ki a latou e auala i a Ieova+ te Atua o Isalaelu. Tenā ne kamata ei o mui‵mui a te fakapotopotoga kātoa e uiga ki takitaki o te fenua. 19 Ona ko te mea tenei, ne fai atu a takitaki katoa ki te fakapotopotoga kātoa: “Ona ko te tautoga ne fai ne matou mo latou e auala i a Ieova te Atua o Isalaelu, e se ‵tau o ‵ta ne tatou a latou. 20 Tenei te mea ka fai ne tatou: Ka tuku ne tatou a latou ke ola, ko te mea ke se malaia tatou ona ko te ‵tou tautoga ne fai mo latou.”+ 21 Kae ne toe fai atu a takitaki: “Tuku ke ola latou, kae ka fai latou mo fai a tino fai fafie mo tino asu vai a te fakapotopotoga kātoa.” Tenei eiloa te tautoga ne fai atu ne takitaki ki a latou.
22 Ne kalaga atu a Iosua ki a latou ke o‵mai kae fai atu: “Kaia ne fakatogafiti ei ne koutou a matou kae fai mai, ‘A matou ne tino mai i se koga ‵mao ‵ki mai i a koutou,’ kae tela la a koutou e ‵nofo tasi fua mo matou?+ 23 Mai i te taimi nei a koutou ka fakamalaiagina,+ kae ka ‵nofo faeloa koutou i te tulaga o se pologa e pelā me ne tino fai fafie mo tino asu vai mō te fale o toku Atua.” 24 Ne tali atu latou ki a Iosua: “Ne fai ne matou te mea tenā me ne fakailoa faka‵lei mai ki au tavini me ne fakatonu atu a Ieova tou Atua ki tena tavini ko Mose ke tuku atu ki a koutou a te fenua kātoa kae ke ‵ta fakapalele a tino katoa i ei mai i otou mua.+ Ne ma‵taku matou i a matou ma tamate ne koutou,+ kae tenā te pogai ne fai ei ne matou te mea tenei.+ 25 Nei la, ko tuku atu eiloa matou ki tau pulega.* Fai eiloa ne koe ki a matou a te mea telā e mafaufau koe me e ‵lei kae tonu.” 26 Kae tenā eiloa te mea ne fai ne ia ki a latou; ne faka‵sao ne ia latou mai i lima o tino Isalaelu, kae ne seki tamate ne latou a tino konā. 27 Kae i te aso tenā, ne fai ne Iosua a latou e pelā me ne tino fai fafie mo tino asu vai mō te fakapotopotoga+ kātoa mo te fatafaitaulaga a Ieova i te koga telā e filifili ne Ia,+ kae ne tumau eiloa latou penā ke oko mai ki te aso nei.+