Numela
25 I te taimi ne ‵nofo atu ei a tino Isalaelu i Sitima,+ ne kamata o fai ne tino a amioga fakatauavaga sē ‵tau mo fāfine Moapi.+ 2 Ne ‵kami ne fāfine a tino i taimi e fai ei olotou taulaga ki olotou atua,+ kae ko tino ne kamata o ‵kai kae ifo ki lalo ki atua o fāfine konā.+ 3 Tenā ne ‵kau atu ei a tino Isalaelu ki te tapuakiga* ki a Paala o Peolo,+ kae ne kaitaua malosi a Ieova ki Isalaelu. 4 Muna Ieova ki a Mose: “Puke a takitaki* katoa o tino konei kae noua atu latou i mua o Ieova i te ao malamalama,* ko te mea ke ‵fuli kea‵tea te kaitaua o Ieova telā e ‵ka pelā me se afi mai Isalaelu.” 5 Tenā ne fai atu ei a Mose ki famasino o Isalaelu:+ “E ‵tau mo koutou taki tokotasi o tamate a tāgata kolā ne ‵kau ki te tapuakiga* ki a Paala o Peolo.”+
6 Kae i te taimi eiloa tenā, ne vau se tagata Isalaelu e tokotasi kae ne aumai ne ia ki tafa o ana taina se fafine Mitiana+ i mua eiloa o Mose mo te fakapotopotoga kātoa o tino Isalaelu, i te taimi koi ‵tagi mautuutu ei latou i te mataloa o te faleie o maopoopoga. 7 I te taimi ne lavea ei ne Fineaso,+ te tama tagata a Eleasalo te tama tagata a Alona te faitaulaga a te mea tenā, ne tu fakavave a ia ki luga mai te fakapotopotoga o tino kae puke te tao i tena lima. 8 Tenā ne tautali atu ei a ia i tua o te tagata Isalaelu ki loto i te faleie, kae ‵velo fakatasi ne ia a lāua, te tagata Isalaelu mo te fafine i tena tinae. I konā eiloa, ne gata ei te mala telā ne poko i tino Isalaelu.+ 9 A tino kolā ne ‵mate i te mala tenā e ‵tusa mo te toko 24,000.+
10 Tenā ne fai atu ei a Ieova ki a Mose: 11 “Ko oti ne ‵fuli kea‵tea ne Fineaso,+ te tama tagata a Eleasalo te tama tagata a Alona te faitaulaga a toku kaitaua mai tino Isalaelu me ne seki talia ne ia a faifaiga sē fakamaoni ke fai mai ki a au i loto i a latou.+ Tela la, ne seki tamate ne au a tino Isalaelu ona ko toku manako ke tapuaki mai fua latou ki a au tokotasi.+ 12 Tela la, ke fai atu, ‘Ko tuku atu ne au ki a ia taku feagaiga o te filemu. 13 Kae ka fai pelā me se feagaiga tumau o te tulaga fakafaitaulaga o ia mo ana tama mai tua o ia,+ me ne seki talia ne ia a faifaiga sē fakamaoni ke fai ki tena Atua,+ kae ne fai ne ia te faka‵māga mō tino Isalaelu.’”
14 A te igoa o te tagata Isalaelu telā ne tamate fakatasi mo te fafine Mitiana ko Semeli te tama tagata a Salu, se takitaki o se kāiga o tino Simeona i olotou tamana. 15 A te igoa o te fafine Mitiana telā ne tamate ko Kosipi te tama fafine a Siula;+ a tou tagata se takitaki o se kaukāiga i olotou tamana i Mitiana.+
16 Fakamuli ifo ne fai atu a Ieova ki a Mose: 17 “Fakapuapuaga atu a tino Mitiana, kae tamate atu latou,+ 18 me ne fakapuapuaga ne latou a koutou ki olotou faifaiga faitogafiti i te mea telā ne tupu i Peolo+ mo te mea ne tupu ki a Kosipi te tama fafine a se takitaki o Mitiana,+ ko te lotou tuagane telā ne tamate i te aso ne tupu ei te mala i Peolo.”+