Numela

18 Tenā ne fai atu ei a Ieova ki a Alona: “A koe mo au tama tāgata mo te kāiga o tou tamana kolā e ‵nofo mo koe ka fakasala māfai e fai ne koutou se mea ‵se ki te koga tapuaki,+ kae ko koe mo au tama tāgata ka fakasala mō so se mea ‵se e fai i te otou tulaga fakafaitaulaga.+ 2 Ke puke mai foki ou taina mai te matakāiga o Levi, ko te matakāiga o ou tupuga, ko te mea ke ‵kau fakatasi latou mo koe kae tavini atu ki a koe+ mo au tama tāgata i mua o te faleie o te Feagaiga.+ 3 E ‵tau o fakataunu ne latou olotou tiute ki a koe mo te faleie kātoa.+ Kae e se ‵tau mo latou o fakapili‵pili atu ki meāfale o te koga tapu mo te fatafaitaulaga, ko te mea ke se ‵mate latou io me ko koe.+ 4 Ka ‵kau atu latou ki a koe kae fai olotou tiute i te faleie o maopoopoga mo te taviniga kātoa i te faleie, kae e seai se isi tino* e ‵tau o fakapilipili atu ki a koutou.+ 5 E ‵tau mo koutou o fai otou tiute ki te koga tapu+ mo te fatafaitaulaga,+ ko te mea ke se toe kaitaua+ te Atua ki tino Isalaelu. 6 Ko oti ne puke ne au otou taina, ko tino Levi, mai tino Isalaelu e pelā me se meaalofa mō koutou.+ Ne tuku atu latou ki a Ieova ke fai ne latou te taviniga i te faleie o maopoopoga.+ 7 E panaki mo koe mo au tama tāgata a te tiute fakafaitaulaga ki te fatafaitaulaga mo mea i loto i te ‵pui laugatu,+ kae e ‵tau o fai ne koutou te taviniga tenei.+ Ko oti ne tuku atu ne au te taviniga fakafaitaulaga e pelā me se meaalofa ki a koutou, kae ko so se tino* telā e fakapilipili atu ki ei e ‵tau o tamate.”+

8 Ne toe faipati atu a Ieova ki a Alona: “Ne ‵tofi eiloa ne au a koe ke pule i meaalofa kolā e tuku mai ki a au.+ Ko oti ne tuku atu ne au ki a koe mo au tama tāgata se vaega o mea tapu kolā ne tuku fakameaalofa mai ne tino Isalaelu e pelā me se tusaga tumau.+ 9 Ka fai ma koe a te mea tenei mai toe taulaga tapu kolā ne ofo atu i luga i te afi: ko taulaga katoa e fai ne latou e aofia i ei olotou taulaga meakai+ mo olotou taulaga mō agasala+ mo olotou taulaga mō mea ‵se+ kolā e aumai ne latou ki a au. E fai a te mea tenā e pelā me se mea tafasili i te tapu mō koe mo au tama tāgata. 10 E ‵tau o kai ne koe a te mea tenā i se koga tafasili i te tapu.+ E mafai o kai ki ei so se tagata. Ka fai eiloa e pelā me se mea tapu ki a koe.+ 11 Konei foki a mea e fai ma koe: ko meaalofa kolā e tuku fakameaalofa+ mai ne tino Isalaelu fakatasi mo taulaga fakagasuesue katoa.+ Ko oti ne tuku atu ne au a mea konā ki a koe mo au tama tāgata mo au tama fāfine kolā e ‵nofo mo koe e pelā me se tusaga tumau.+ So se tino i tou fale telā e ‵ma e mafai o kai ki ei.+

12 “A toe sinu ‵lei katoa mo toe uaina ‵fou kae ‵lei katoa mo saito, ko fuataga muamua+ kolā e tuku atu ne tino ki a Ieova, e tuku atu ne au ki a koe.+ 13 A fuataga ‵sulu muamua katoa mai olotou laukele, kolā ka aumai ne latou ki a Ieova, ka fai ma koe.+ So se tino i tou fale telā e ‵ma e mafai o kai ki ei.

14 “A mea katoa kolā e tausi mō se mea tapu* i Isalaelu e ‵tau o fai ma koe.+

15 “A toekimua o mea ola katoa,+ kolā ka tuku atu ne latou ki a Ieova, faitalia me se tagata io me se manu, e ‵tau o fai ma koe. Kae e ‵tau eiloa o sui ne koe te toekimua a se tino,+ kae e ‵tau foki o sui ne koe te toekimua a se manu sē ‵ma.+ 16 E ‵tau o sui ne koe ki te togi o te fesuiakiga māfai ko tasi te masina tena matua io me matua atu, e ‵tusa mo te togi fakatautau telā e lima sekela*+ siliva e ‵tusa mo te sekela masani o te koga tapu. A te mea tenā e 20 kile.* 17 Ko te toekimua pulumakau tagata fua io me ko te toekimua mamoe tagata io me ko te toekimua kouti e se ‵tau o sui ne koe.+ A mea konā ne mea e tapu. E ‵tau o fakamatulutulu atu ne koe olotou toto ki luga i te fatafaitaulaga,+ kae e ‵tau o ‵sunu ne koe olotou gako e pelā me se taulaga e ofo atu i luga i te afi kae manogi gali ki a Ieova.+ 18 A ‵kano o manu konā e ‵tau o fai ma koe. E pelā eiloa mo te ivi fatafata o te taulaga fakagasuesue mo te vae fakaatamai, e ‵tau eiloa o fai ma koe a mea konā.+ 19 A meaalofa tapu katoa a tino Isalaelu kolā ka tuku fakameaalofa atu ki a Ieova,+ ko oti ne tuku atu ne au ki a koe mo au tama tāgata mo au tama fāfine kolā e ‵nofo tasi mo koe, e pelā me se tusaga tumau.+ A te mea tenā se feagaiga tumau o te masima* i mua o Ieova mō koe mo au fanau kolā e ‵nofo tasi mo koe.”

20 Ne toe fai atu a Ieova ki a Alona: “Ka seai sou tofi e maua i te lotou fenua, kae ka seai sou manafa e maua mai i a latou.+ Au ko tou vaega mo tou tofi i loto i tino Isalaelu.+

21 “Kilo mai me ko oti ne tuku atu ne au ki tino Levi a te tasi-vae-sefulu o koga katoa+ o Isalaelu e pelā me se tofi o latou ke sui ei te taviniga telā e fai ne latou, ko te taviniga i te faleie o maopoopoga. 22 Ke se toe fakapili‵pili atu a tino Isalaelu ki te faleie o maopoopoga i a latou ma agasala kae ‵mate i ei. 23 E ‵tau o fai ne tino Levi a te taviniga i te faleie o maopoopoga, kae ka fakasala latou māfai e fai ne latou se mea ‵se.+ A te mea tenei se tulafono fakavae tumau i otou kautama katoa, me e se ‵tau o maua ne latou se tofi i loto i tino Isalaelu.+ 24 Me ko oti ne tuku atu ne au ki tino Levi e pelā me se tofi a te tasi-vae-sefulu o meaalofa a tino Isalaelu kolā ka tuku atu ne latou ki a Ieova. Tenā te pogai ne fai atu ei au ki a latou, ‘E se ‵tau o maua se lotou tofi i loto i tino Isalaelu.’”+

25 Tenā ne fai atu ei a Ieova ki a Mose: 26 “E ‵tau o fai atu koe ki tino Levi, ‘Ka maua ne koutou mai tino Isalaelu te tasi-vae-sefulu telā ne tuku atu ne au ki a koutou mai i a latou mō fai te otou tofi,+ kae e ‵tau o tuku fakameaalofa atu ne koutou mai i ei se tasi-vae-sefulu o te tasi-vae-sefulu e pelā me se meaalofa ki a Ieova.+ 27 Ka fai a te mea tenā e pelā me se meaalofa a koutou, e pelā eiloa me ne saito i te koga tuki saito+ io me ko mea katoa ne maua mai i te mea ‵tau uaina io me ko te mea ‵tau sinu. 28 I te auala tenei ka tuku atu foki ne koutou se meaalofa ki a Ieova mai vaega katoa o te tasi-vae-sefulu kolā e maua ne koutou mai tino Isalaelu, kae e ‵tau o tuku atu ne koutou mai mea konā a te meaalofa mō Ieova ki a Alona te faitaulaga. 29 E ‵tau o avatu ne koutou so se vaegā meaalofa ki a Ieova mai toe mea ‵lei o meaalofa katoa kolā ne tuku atu ki a koutou,+ e pelā me ne mea tapu.’

30 “Kae e ‵tau mo koe o fai atu ki a latou, ‘Kafai e tuku fakameaalofa atu ne koe a toe mea ‵lei o mea konā, tenā ko fai ei ne tino Levi e pelā me ne mea ne maua mai i te koga tuki saito mo mea ne maua mai i te mea ‵tau uaina io me ko te mea ‵tau sinu. 31 E mafai ne koutou mo tino o otou kāiga o ‵kai ki ei i so se koga, me tenā te otou peofuga ona ko te otou taviniga e fai i te faleie o maopoopoga.+ 32 Ka se agasala koutou i te mea tenei māfai e tuku atu ne koutou a toe mea ‵lei mai i mea konā, kae e se ‵tau mo koutou o fakamasei a mea tapu a tino Isalaelu, i a koutou ma ‵mate.’”+