Numela

27 Tenā ne o‵mai ei a tama fāfine a Selofeata+ te tama tagata a Hefa, te tama tagata a Kileata, te tama tagata a Makila, te tama tagata a Manase, mai te kāiga o Manase te tama tagata a Iosefa. A igoa o ana tama fāfine ko Mahala, Noa, Hokala, Milika mo Tilesa. 2 Ne ‵tu atu latou i mua o Mose, Eleasalo te faitaulaga, mo takitaki+ mo te fakapotopotoga kātoa, i te mataloa o te faleie o maopoopoga, kae fai atu: 3 “A te motou tamana ne mate i te koga lavaki, kae ne seki aofia a ia i te potukau telā ne maopoopo fakatasi o ‵teke ki a Ieova, ko tino kolā ne ‵lago atu ki a Kola.+ Ne mate a ia ona ko tena agasala kae e seai ne ana tama tāgata. 4 Kaia e ‵solo kea‵tea ei te igoa o te motou tamana mai tena kāiga ona ko te mea e seai sena tama tagata? Tuku mai se motou tofi mai mea a taina o te motou tamana.” 5 Tenā ne avatu ei ne Mose te lotou tagi ki mua o Ieova.+

6 Ne fai atu ne Ieova a pati konei ki a Mose: 7 “E ‵tonu a tama fāfine a Selofeata. E ‵tau eiloa o tuku ne koutou ki a latou te lotou tofi mai mea a taina o te lotou tamana, kae tuku atu te tofi o te lotou tamana ki a latou.+ 8 Kae fai atu ki tino Isalaelu, ‘Kafai e mate se tagata kae seai sena tama tagata, e ‵tau o fai ne koutou se faiga ke tuku atu tena tofi ki tena tama fafine. 9 Kae kafai e seai sena tama fafine, e ‵tau o tuku atu ne koutou a tena tofi ki ana taina. 10 Kae kafai e seai ne ana taina, e ‵tau o tuku atu ne koutou tena tofi ki taina o tena tamana. 11 Kae kafai e seai ne taina o tena tamana, e ‵tau o tuku atu ne koutou a tena tofi ki te ‵toe kāiga pili o ia, ko fai ei mō ia te tofi tenā. E fai a te mea tenei e pelā me se tulafono fakavae e ‵tusa mo ikuga o fakamasinoga mō tino Isalaelu, e pelā eiloa mo te fakatonuga a Ieova ne fai ki a Mose.’”

12 Tenā ne fai atu ei a Ieova ki a Mose: “Fano ki luga i te mauga o Apalima+ kae kilo ki te fenua telā ka tuku atu ne au ki tino Isalaelu.+ 13 Kafai ko oti ne lavea ne koe, a koe ka mate kae tanu foki e pelā mo ou tino,+ e pelā eiloa mo tou taina ko Alona,+ 14 me i te taimi ne kinau ei a te fakapotopotoga mo au i te koga lavaki o Siina, ne ‵teke ne koulua taku fakatonuga ke faka‵malu au i olotou mua e auala i vai konā.+ A mea konei ko vai o Melipa+ i Katesa+ i te koga lavaki o Siina.”+

15 Tenā ne fai atu ei a Mose ki a Ieova: 16 “Ke fili aka ne Ieova, te Atua o te ola o tino katoa, se tagata ke pule ki te fakapotopotoga 17 telā ka fano ki tua kae toe foki mai ki mua o latou kae ka ‵taki latou ki tua kae toe aumai latou ki loto, ko te mea ke se fai a te fakapotopotoga a Ieova e pelā me ne mamoe e seai se lotou tausi mamoe.” 18 Kae ne fai atu a Ieova ki a Mose: “Puke a Iosua te tama tagata a Nuno, se tagata fai mea mafai, kae tuku atu tou lima ki luga i a ia.+ 19 Tenā ko fakatu ei ne koe a ia i mua o Eleasalo te faitaulaga kae i mua o te fakapotopotoga kātoa, kae ‵tau mo koe o fakasopo aka a ia i mua o latou ke fai pelā me se takitaki.+ 20 E ‵tau o tuku atu ne koe ne vaega o tau pulega* ki a ia,+ ko te mea ke faka‵logo ki a ia a te fakapotopotoga o tino Isalaelu katoa.+ 21 Ka tu atu a ia i mua o Eleasalo te faitaulaga, telā ka fakafesilisili ne ia a ia e auala i te Ulima+ i mua o Ieova. Ona ko tena fakatonuga ka olo latou ki tua kae ona ko tena fakatonuga ka ‵mai latou ki loto, ko ia mo tino Isalaelu katoa kolā e fakatasi mo ia mo te fakapotopotoga kātoa.”

22 Ne fai ne Mose a mea katoa ne fakatonu atu ne Ieova ki a ia. Ne puke ne ia a Iosua kae fakatu atu i mua o Eleasalo te faitaulaga mo te fakapotopotoga kātoa, 23 kae tuku atu ana lima ki luga i a ia kae fakatonu atu a ia ke fai pelā me se takitaki,+ e ‵tusa eiloa mo pati ne fai atu ne Ieova e auala i a Mose.+