Numela

30 Ne faipati atu a Mose ki ulu+ o matakāiga o Isalaelu, ana muna: “Konei a pati ne fakatonu mai ne Ieova: 2 Kafai e fai ne se tagata se tautoga+ ki a Ieova io me se feagaiga+ e uiga ki mea kolā ka se fai ne ia, e se ‵tau eiloa o soli ne ia ana pati konā.+ E ‵tau o fai ne ia a mea katoa kolā ne tauto atu a ia me ka fai ne ia.+

3 “Kae kafai e fai ne se fafine se tautoga ki a Ieova io me fai sena tautoga e uiga ki mea kolā ka se fai ne ia i te taimi koi talavou ei a ia kae koi nofo atu i te fale o tena tamana 4 kae e logo tena tamana i tena tautoga io me ko tena tautoga e uiga ki mea kolā ka se fai ne ia kae e se ‵teke atu tena tamana ki ei, ka fakatumau eiloa ana tautoga katoa konā, kae ko ana tautoga katoa ne fai e uiga ki mea kolā ka se fai ne ia ka fakatumau eiloa. 5 Kae kafai e se talia ne tena tamana māfai e logo a ia me ne fai ne tou fafine ana tautoga io me ko tautoga e uiga ki mea kolā ka se fai ne ia, ka se fakatumau eiloa ana tautoga konā. Ka fakamagalo a ia ne Ieova me ne seki talia ne tena tamana tena tautoga.+

6 “Kae kafai e avaga tou fafine kae koi nofo a ia mai lalo i tena tautoga io me ko te tautoga telā ne fai fakavave ne ia 7 kae ko logo tena avaga i ei kae e se ‵teke atu tou tagata ki ei i te aso ne logo ei a ia, ka fakatumau eiloa ana tautoga io me ko tautoga e uiga ki mea kolā ka se fai ne ia. 8 Kae kafai e se talia ne tena avaga te tautoga a tou fafine i te aso ne logo ei a ia, e mafai o fakaseaoga ne ia te tautoga io me ko te tautoga telā ne fai fakavave ne tou fafine,+ kae ka fakamagalo a ia ne Ieova.

9 “Kae kafai e fai ne se fafine ko mate tena avaga io me ko oti ne ‵tala tena avaga se tautoga, a mea katoa kolā ne tauto a ia ki ei ka tumau eiloa i a ia.

10 “Kae kafai ne fai ne se fafine te tautoga io me ko te tautoga e uiga ki mea kolā ka se fai ne ia kae koi nofo a ia i te fale o tena avaga 11 kae ne logo tena avaga i ei kae ne seki ‵teke io me talia ne ia, ka fakatumau eiloa ana tautoga katoa io me ko so se tautoga e uiga ki mea kolā ka se fai ne ia. 12 Kae i te aso ne logo ei tena avaga kae fakaseaoga katoatoa ne ia so se tautoga io me ko tautoga e uiga ki mea kolā ka se fai ne ia, ka se fakatumau eiloa a mea konā.+ Ko oti ne fakaseaoga ne tena avaga a mea konā, kae ka fakamagalo ne Ieova tou fafine. 13 E ‵tau o talia ne tena avaga io me fakaseaoga ne tena avaga so se tautoga io me se feagaiga e aofia i ei se tautoga e uiga ki mea ka se fai ne ia. 14 Kae kafai e se ‵teke atu tena avaga ki mea konā mai te suā aso ki te suā aso, ko talia eiloa ne tou tagata a tautoga katoa a tou fafine io me ko tautoga e uiga ki mea ka se fai ne ia. E talia ne tou tagata me ne seki ‵teke ne ia i te aso ne logo ei a ia me ne fai ne tou fafine ana tautoga. 15 Kae kafai e fakaseaoga fakamuli ne tou tagata, i se vaitaimi mai tua o te aso ne logo ei a ia, ka fakasala a ia ona ko agasala a tou fafine.+

16 “Konei a tulafono fo‵liki ne fakatonu atu ne Ieova ki a Mose e uiga ki se tagata avaga mo tena avaga, e pelā foki mo se tamana mo tena tama fafine koi talavou telā e nofo i tena fale.”