Te Muamua Tupu

9 I te otiga eiloa ne faite ne Solomona a te fale o Ieova, te fale* o te tupu,+ mo mea katoa kolā ne manako a Solomona ke faite,+ 2 ne fakasae atu a Ieova ki a Solomona i te lua o taimi, e pelā eiloa mo tena fakasaeatuga ki a ia i Kipeona.+ 3 Ne fai atu a Ieova ki a ia: “Ko oti ne lagona ne au a tau ‵talo mo tau fakatagi mō se fakamagaloga telā ne fai mai ne koe i oku mua. Ko oti ne fakatapu ne au te fale tenei ne faite ne koe mai te fakatumauga faeloa o toku igoa i ei,+ kae ko oku mata mo toku loto ka tuku faeloa i konā.+ 4 Kae ko koe, kafai e sasale koe i oku mua e pelā mo te auala ne sasale i ei tou tamana ko Tavita+ ne sasale mo tena loto fakamaoni+ mo te amiotonu,+ mai te faiga o mea katoa ne fakatonu atu ne au ki a koe,+ kae fakalogo koe ki aku tulafono fo‵liki mo aku fakamasinoga,+ 5 tenā ka fakatu aka ei ne au te nofogaaliki o tou malo i luga i Isalaelu ki te se-gata-mai, e pelā eiloa mo taku tautoga ki tou tamana ko Tavita penei, ‘Ka se mafai eiloa o seai se tagata i tou gafa e sagasaga i luga i te nofogaaliki o Isalaelu.’+ 6 Kae kafai koe mo au tama tāgata e ‵fuli kea‵tea mai te tau‵tali mai i a au kae e se faka‵logo ki aku fakatonuga mo aku tulafono fakavae kolā ne tuku atu ne au ki otou mua, kae olo koutou o tavini atu ki nisi atua kae ifo atu ki a latou,+ 7 ka fakaseai ne au a Isalaelu mai i luga i te laukele ne tuku ne au ki a latou,+ kae ko te fale telā ne fakatapu ne au mō toku igoa ka ave kea‵tea mai oku mua,+ kae ko Isalaelu ka fai pelā me se mea fai fa‵kata* kae se mea fakaitaita a tino katoa.+ 8 Kae ko te fale tenei ka fai pelā me se faka‵tuga o mea ne fakamasei.+ So se tino e fakasili atu i konā ka kilo atu ki ei mo te ofo mo te fakatauemu kae fai aka, ‘Kaia ne fai ei ne Ieova a te mea tenā ki te fenua tenei mo te fale tenei?’+ 9 Tenā ka fai atu ei latou, ‘Ne fai penā me ne tiakina ne latou a Ieova te lotou Atua, telā ne aumai ne ia olotou tupuga ki tua mo te fenua ko Aikupito, kae ‵piki ‵mau latou ki nisi atua kae ifo ki ei kae tavini atu ki a latou. Tenā te pogai ne aumai ei ne Ieova a puapuaga katoa konei ki a latou.’”+

10 I te fakaotiga o tausaga e 20, kolā ne faite i ei ne Solomona a fale e lua, ko te fale o Ieova mo te fale* o te tupu,+ 11 ne avatu ne Hilamo+ te tupu o Tulo a laupapa mai alasi mo iunipa ki a Solomona mo aulo kolā ne manako a ia ki ei,+ kae ne avatu ne te Tupu ko Solomona ki a Hilamo a fakai e 20 i te fenua o Kalilaia. 12 Ne fano a Hilamo mai Tulo o onoono ki fakai kolā ne tuku atu ne Solomona ki a ia, kae ne seki lotomalie a ia ki ei.* 13 Ana muna: “Ne a vaegā fakai konei ne tuku mai ne koe ki a au, e toku taina?” Tenā ne fakaigoa ei ki te Fenua o Kapulo* ke oko mai eiloa ki te aso nei. 14 I te taimi tenā, avatu ei ne Hilamo ki te tupu a taleni* aulo e 120.+

15 Tenei te tala o tino kolā e ‵tau o ga‵lue fakagamua mō te tupu+ ke faite te fale o Ieova,+ tena fale,* te Koga Maluga,*+ te ‵pui o Ielusalema, Hasola,+ Mekito+ mo Kesela.+ 16 (Ne vau a te Falao te tupu o Aikupito o fai se taua kae ne puke ne ia a Kesela kae ‵sunu ki te afi, kae tamate foki ne ia a tino Kanana+ kolā ne ‵nofo i te fakai. Tenā ne tuku atu ei ne ia te fakai tenā mo fai tena meaalofa fakamāvae* ki tena tama fafine,+ te avaga a Solomona.) 17 Ne toe faite ne Solomona a Kesela mo Peta-holono i Lalo,+ 18 Palata+ mo Tamala i te koga lavaki i loto i te fenua, 19 e pelā foki mo fakai katoa o Solomona e ‵teu i ei a mea, fakai e ‵tu i ei a kaliota,+ fakai o tāgata faka‵tele solofanua, mo so se mea e manako a Solomona ke faite i Ielusalema, i Lepanona, penā foki loa mo fenua katoa e pule a ia ki ei. 20 Kae pelā mo tino katoa kolā ne ‵toe mai i tino Amoli, tino Heti, tino Pelise, tino Hivi mo tino Iepuse+ kolā e se aofia i tino Isalaelu,+ 21 ko tino ne ‵tupu mai i a latou kolā ne ‵toe i te fenua—ko latou kolā ne seki mafai ne tino Isalaelu o fakaseai atu—ne fakatonu ne Solomona ke ga‵lue fakagamua e pelā me ne pologa ke oko mai ki te aso nei.+ 22 Kae ne seki fai ne Solomona a tino Isalaelu e pelā me ne pologa,+ me i a latou ko ana toa ‵mafi, tavini, pelenise, ofisa o kautau, mo takitaki o tino faka‵tele kaliota mo tāgata faka‵tele solofanua. 23 E toko 550 a takitaki o pule lagolago kolā ne onoono ki te faiga o te galuega a Solomona, ko tino fakatonutonu o tino kolā ne fai ne latou a galuega.+

24 Kae ko te tama fafine a te Falao+ ne vau mai te Fakai o Tavita+ ki tena fale telā ne faite ne Solomona mō ia; tenā faite ei ne ia te Koga Maluga.*+

25 E tolu taimi i te tausaga+ ne ofo atu ei ne Solomona a taulaga ‵sunu mo taulaga ‵kai fakatasi i luga i te fatafaitaulaga telā ne faite ne ia mō Ieova,+ kae ofo atu foki a mea ma‵nogi i luga i te fatafaitaulaga, telā e tu i mua o Ieova, tenā ne fakaoti ei ne ia te faitega o te fale.+

26 Ne faite foki ne te Tupu ko Solomona se fuāvaka i Esionikepa,+ i tafa o Elata, i te tafatai o te Tai Kula i te fenua o Etoma.+ 27 Ne uga ne Hilamo ana tavini fakatasi mo te fuāvaka,+ mo kauvaka apo ke ga‵lue fakatasi mo tavini a Solomona. 28 Ne olo atu latou ki Ofeila+ kae puke mai ne latou i konā e 420 taleni aulo kae aumai ki te Tupu ko Solomona.