Esoto

25 Tenā ne fai atu ei a Ieova ki a Mose: 2 “Fai ki tino Isalaelu ke fai mai olotou meaalofa ki a au mai tino taki tokotasi kolā e loto fia‵fia o tuku mai, e ‵tau o puke ne koe taku meaalofa.+ 3 Konei a meaalofa e ‵tau o talia ne koutou mai i a latou: ko aulo,+ siliva,+ kopa,+ 4 filo lanu moana, vulu lanu violeta,* filo lanu kula,* laugatu lino ‵lei, fulufulu o kouti, 5 pa‵kili o mamoe ne vali ke kula, pa‵kili o takesa,* laupapa mai te lakau ko te akasia,+ 6 sinu mo faka‵ka a moli,+ sinu pasama mo faū+ a tino mo mea manogi ‵gali,+ 7 fatu ko te onika mo nisi fatu ke faka‵mau ki te efota*+ mo te ufi fatafata.*+ 8 E ‵tau o faite ne latou se koga tapuaki mō oku, kae ka ‵nofo fakatasi+ au mo latou. 9 E ‵tau o faite ne koutou te faleie tapu mo mea katoa i loto i ei, kae tau‵tali faka‵lei i te ata telā ka fakaasi atu ne au ki a koe.+

10 “E ‵tau o faite ne latou se pusa mai te lakau ko te akasia, e lua mo te āfa kupita* te loa, kae tasi mo te āfa kupita te lauefa kae tasi mo te āfa kupita te maluga.+ 11 Tenā ko ufi atu ei ne koe ki te tinā aulo,+ i loto mo tua, kae ‵tau foki o fusi fakatamilo ne koe ki se tamā fusi aulo a tena kaugutu.+ 12 Ko faite ei ne koe ne ligi aulo e fa kae faka‵piki atu mai luga i ana vae e fa, e lua a ligi i te feitu e tasi kae e lua i te suā feitu. 13 Ko faite ei ne koe ne amo mai te lakau ko te akasia kae ufi atu ki te aulo.+ 14 Ka faulu ne koe a amo i loto i ligi i feitu o te Pusa ko te mea ke amo ki ei a te Pusa. 15 Ka tuku eiloa a amo konā i loto i ligi o te Pusa; e se ‵tau o tapale kea‵tea mai i ei.+ 16 Ka tuku eiloa ne koe i loto i te Pusa a te Feagaiga telā ka tuku atu ne au ki a koe.+

17 “Ka faite ne koe te ‵pono ki te tinā aulo, e lua mo te āfa kupita te loa kae tasi mo te āfa kupita te lauefa.+ 18 E ‵tau o faite ne koe a kelupi e lua ki aulo, ka faite ne koe a mea konā ki aulo kolā ne tukituki, i mata e lua o te ‵pono.+ 19 Faite a kelupi i mata e lua, e tasi te kelupi i mata takitasi o te ‵pono. 20 E ‵tau o ‵fola ki luga a kapakau o te avā kelupi konā ko malu i ei te ‵pono o te pusa i lā kapakau,+ kae ka fakafesagai a mea konā. A mata o kelupi e ‵tau o ‵fuli ki te ‵pono. 21 Ka tuku ne koe te ‵pono+ i luga i te Pusa, kae ka tuku eiloa ne koe ki loto i te Pusa a te Feagaiga telā ka tuku atu ne au ki a koe. 22 Ka fakasae atu au ki a koe i konā kae faipati atu ki a koe mai luga i te ‵pono o te pusa.+ I te va o kelupi e lua kolā e ‵tu i luga i te pusa o te Feagaiga, ka fakailoa atu ne au ki a koe a mea katoa kolā ka fakatonu atu ne au ki a koe mō tino Isalaelu.

23 “Ka faite foki ne koe se taipola+ mai te lakau ko te akasia, e lua kupita te loa kae e tasi te kupita te lauefa kae e tasi mo te āfa kupita te maluga.+ 24 Ka ufi ne koe ki te tinā aulo, kae faite se fusi aulo e fakatamilo i ei. 25 Ka faite ne koe a kaugutu e ‵tusa mo te lauefa o te alofilima* e tasi, kae ‵tuki fakatamilo i feitu katoa o te taipola tenā mo se fusi aulo e fakatamilo i te laupapa tenā. 26 Ka faite ne koe ne ligi aulo e fa kae faka‵piki atu ki kōna e fa kolā e ‵piki ki ei a vae e fa o te taipola. 27 E ‵tau o faka‵mau a ligi konā ke pili ki te laupapa telā e ‵tuki fakatamilo i te taipola ko te mea ke faulu ki ei a amo mo amo a te taipola. 28 Ka faite ne koe a amo mai te lakau ko te akasia kae ufi atu ki te aulo ke amo ki ei a te taipola.

29 “Ka faite foki ne koe ana tīsi, ana ipu, ana sioki mo ana pōla kolā ka ‵ligi ne latou a taulaga o meainu ki ei. Ka faite ne koe a mea konā ki te tinā aulo.+ 30 Kae ka tuku ne koe te falaoa ne ofo atu ki te Atua ki luga i te taipola i oku mua i taimi katoa.+

31 “Ka faite ne koe se tugamoli+ ki te tinā aulo. E ‵tau o faite a te tugamoli ki aulo kolā ne tukituki. A tena tulaga, tena foitino, ana kaula, ana ipu, ana moe mo ana pula se vaega eiloa e tasi.+ 32 E ono a kaula ka faka‵piki atu ki te tugamoli, e tolu kaula i te feitu e tasi kae tolu kaula i te suā feitu. 33 E tolu a ipu e pelā mo pula o te alamoni i luga i kaula e tolu i te feitu e tasi, ko fakasolo atu ei a moe mo pula, kae i te suā feitu e tolu foki a ipu e pelā mo pula o te alamoni i luga i kaula e tolu, ko fakasolo atu ei a moe mo pula. E penā eiloa a foliga o kaula e ono kolā e ‵piki ki te foitino o te tugamoli. 34 I luga i te foitino o te tugamoli, e fa a ipu e pelā mo pula o te alamoni i luga i ei, ko fakasolo atu ei ana moe mo ana pula. 35 Ka isi se moe mai lalo o te avā kaula muamua kolā e ‵piki ki te foitino mo se moe mai lalo o te suā avā kaula mo se moe mai lalo o te suā avā kaula, mō kaula e ono kolā e ‵piki ki te foitino. 36 A moe mo kaula mo te tugamoli kātoa se vaega e tasi o te tinā aulo telā ne tukituki.+ 37 Ka faite ne koe a moli e fitu i ei, kae kafai ko faka‵ka a moli konā ka maina atu ki te koga kātoa i mua i ei.+ 38 E ‵tau o faite ana sikofi mo ana mea tuku malala ‵ka ki te tinā aulo.+ 39 E ‵tau o faite te mea tenā, fakatasi mo meāfale konei mai se taleni* e tasi o te tinā aulo. 40 Onoono ke faite faka‵lei ne koe a mea konā e ‵tusa eiloa mo te ata telā ne fakaasi atu ki a koe i luga i te mauga.+